5
Wapechu aꞌaruná ke wanapona meꞌetení. Riká kapichájero watakaꞌajika ejomi. Eyá wapéchumi jáchoꞌojo richiyá, riꞌijnakáloje apú wanapona, wajé iꞌimajíkare, chojé. Riká wanapona, Tupana laꞌajíkare chojé riꞌijnajé, rijwaꞌaté weꞌemajé matajnako jeꞌechú chu.
2 Kaja wayaꞌó marí wanapona, ejaꞌawá chu weꞌemakare, waꞌaté, raú wawata wanapona apiyákakana apú wanapona, jeꞌechú chu weꞌemajíkare waꞌaté, aú.
3 Wajé wanapona, jeꞌechú chu weꞌemajíkare waꞌaté, iꞌimajeri wajló wapechu aꞌaruná ke. Unká manapónaru kalé wapechu iꞌimajika re.
4 Wajñaꞌá chapú kaje yajwé panaku wanapona; weꞌemaká marí ejaꞌawá chu ketana, waꞌaté, eꞌiyonaja kalé unká wawátala rikapichátakana waliyá. Wajé napónaji wawata wajluwa, rijwaꞌaté weꞌemakáloje makapichako jeꞌechú chu. Lanakiya wanapona, kapichákajo penaje iꞌimakare, kapichájero.
5 Ilé ke riꞌimakáloje wajló penaje Tupana lamáꞌatari riká wapé. Kaja raꞌá wajló Ripechu, raú waweꞌepí ñaké kaja raꞌajika wajló nakaje wajló penaje iꞌimajíkare jeꞌechú chu.
6 Ilé ke nakaje iꞌimajíkale wajló, kaphí wapechu ñakeja. Nuweꞌepí marí ejaꞌawá chu nuꞌumaká ketana, unká nuñakaré wani chu kalé nuká, unkale nuꞌumalá jeꞌechú chu wawakáraꞌajeri Jesucristo waꞌaté.
7 Meꞌetení unká wamala riká, eꞌiyonaja wapechu iꞌimá kaphí nakaje unká wamálare chojé.
8 Kaphí richojé wapechu, ñakele wawata marí wanapona yuríkana, weꞌemakáloje Jesucristo waꞌaté.
9 Wawata piyukeja nakaje laꞌakana palá, riꞌimakáloje palá Jesucristo nakú. Weꞌemá marí ejaꞌawá chu kaꞌajná, weꞌemajé jeꞌechú chu kaꞌajná, wawátaka piyukeja nakaje laꞌakana palá,
10 piyuke weká táraꞌajikole Jesucristo jimaje, rimakáloje wanaku mékeka rijló nakaje walaꞌakare marí ejaꞌawá chu weꞌemaká ketana. Rejomi raꞌajé wajló pajluwano, pajluwano ke, nakaje walaꞌakare wemí. Puꞌuwaré walaꞌakare kaꞌajná, palá walaꞌakare kaꞌajná, piyukeja nakaje walaꞌakare lokoꞌopáneje raꞌajé wajló walaꞌakare wemí.
Tupana wátaka inaꞌuké pechu iꞌimaká palá rinaku yukuna marí
11 Tupana kemaje piyukeja nakaje walaꞌakare nakú mékeka riꞌimaká rijló. Riweꞌepí weꞌemaká riyukuna riwátaka ke. Ñakele wawata iweꞌepika riyukuna iꞌimajeño weká, unká pajlákachina kalé weká.
12 Unká wawátala wanakuwá puraꞌakano palá ijló. Wemá ilé ke wanakuwá, raú ipechu iꞌimakáloje palá wanaku ajopana eꞌiyá penaje. Apala ajopana iphaño inaku Tupana purákaꞌalo yukuna iꞌimajé. Neká kaꞌajná laꞌañó nanakuwá ajopana cháꞌatajeño ke, eꞌiyonaja unká paala napechu. Ilé kajena apiyákakaloje inakojó penaje wemá wanakuwá ijló ilé ke.
13 ¿Meke kaꞌajná ajopana pechu wanaku: palá péchuruna neká, ke kaꞌajná, mapechúruna neká, ke kaꞌajná? Ilé ke weká, waꞌakáloje iñathé penaje.
14 Waweꞌepí íkiꞌija Jesucristo wátaka weká, raú ritakaꞌá piyukeja inaꞌukena chaya iꞌimaká. Piyukeja puꞌuwaré walaꞌakare chaya ritakaꞌá iꞌimaká, wapumí chojé ke. Ripalamane aú piyukeja raꞌapiyá jemaꞌajeño, kaja takaꞌakaño ke weká puꞌuwaré laꞌakanajlo.
15 Jesucristo takaꞌarí piyukeja inaꞌukena chaya iꞌimaká. Ñakele piyukeja weká, raꞌapiyá jemaꞌajeño riꞌimatákarena kapichákajo liyá, unká laꞌalaño nakaje wajlúwaja. Rijló walaꞌá nakaje, ritakaꞌakale wachaya iꞌimaká. Wajló penaje kaja rimakápoꞌo piño iꞌimaká, ñaké iꞌimakale rijloja kalé walaꞌá nakaje.
16 Chuwa unká wemalá inaꞌuké nakú, ajopana kemaká nanaku ke kaja. Ajopana kemájika Jesucristo nakú iꞌimajika, ke kaja numájika rinaku najwaꞌaté. Ajopana puraꞌakeño rinaku puꞌuwaré, raú nupechu iꞌimaké: “Nemaká rinaku, ke kaꞌajná riká”. Eyá chuwa, kaja nuweꞌepí unká ñaké kalé riká.
17 Iná iꞌimakachu pajluwaja keja Jesucristo waꞌaté, wajé iná pechu. Jupichumi iná pechu yuriro iná yámojo; wajé chuwá iná iꞌijnatá iná péchuwa reyá iná tukumó.
18 Tupana liyaja riká piyukeja; Jesucristo palamane aú palá wapechu iꞌimaká Tupana nakú. Raꞌá kaja weká riyukuna iꞌimajeño penaje; raꞌapiyá jemaꞌakana aú, palá kaja napechu iꞌimaká Tupana nakú.
19 Marí ke kemakánaka riká: Jesucristo takaꞌakale wapumí chojé aꞌawaná apiyákanami nakú iꞌimaká, raú unká Tupana amala raꞌapiyá jemaꞌajeño: “puꞌuwaré laꞌajeñó”, ke. Raꞌá weká riyukuna iꞌimajeño penaje.
20 Wephá inaku Jesucristo apumí chojé ke, Tupana yukuna jaꞌapátaje ijló. Raꞌapiyá jemaꞌakana aú palá ipechu iꞌimajika Tupana nakú. Mawó wemaká ijló, iyuríkaloje Tupana laꞌaká ipechu palá.
21 Unká wani Jesucristo laꞌalá puꞌuwaré, eꞌiyonaja wapumí chojé ke Tupana weꞌepika rinaku: “puꞌuwaré laꞌajerí”, ke. Riwajá riꞌimaká wapumí chojé, puꞌuwaré walaꞌakare pachá, ñakele chuwa unká japi laꞌalaño puꞌuwaré ke weká Tupánajlo. Jesucristo chojé iꞌimakana aú iná iꞌimaká pajluwa keja rijwaꞌaté.