Tupana iꞌimataka inaꞌuké kapichákajo liyá yukuna iꞌimakana nakuja neꞌemaká. Riyukuna marí
4
Ñaké iꞌimakale, unká wapechu laꞌaló ujwí Tupana yukuna iꞌimakana liyá. Ripechu iꞌimakale palá wanaku, raꞌá wajló marí jápakaje iꞌimaká.
2 Unká walaꞌalá nakaje mapeja wamichoꞌonoja. Wapáñaꞌojla ajopana jimaje, naweꞌepíkela rinakojé. Ñakele walaꞌá puꞌuwaká nakaje, unká kaja wapajlala inaꞌuké waꞌaté. Unká kaja wemalá mapeja Ripurákaꞌalo nakú: “Marí ke kemakana riká”, ke, unkachu rimalá ñaké. Kewákaje purákaꞌaloji chuwaja weꞌejnatá riká, unká wapiyákala riká. Walaꞌá piyuke nakaje Tupana jimaje ke, ajopana inaꞌukena pechu watánaꞌakaloje wanakojé raú.
3 Tupana iꞌimataka inaꞌuké kapichákajo liyá yukuna iꞌimakana nakuja weká. Chuwa puꞌuwakaje riyukuna inaꞌukejlo; kapichájeño penájena iꞌimajíkañojloja kalé meꞌechuje joꞌó riká.
4 Unká nemaꞌalá Tupana jaꞌapiyá, Jiñá Chiꞌinárikana laꞌakale neká mapechúruna ke, naweꞌepika piyá meke palá wani Jesucristo laꞌaká iná nakojé. Tupana pechu ke kaja péchuri Jesucristo.
5 Unká wayukuno iꞌimakana nakú kalé weká; wawakáraꞌajeri Jesucristo yukuna weꞌemá inaꞌukejlo. Walaꞌá wekó ijwaꞌaté jápajeño keja, wawátakale íkiꞌija riká.
6 Tupana keñoꞌótaka ejaꞌawá iꞌimaká wakajé, riwakáraꞌa mejámaꞌatani pataká kalajeruni eꞌiyajé. Chuwa ñaké kaja rilaꞌaká puꞌuwaká wajló nakaje, waweꞌepíkaloje raú meke palánika riká. Jesucristo nakojé weꞌepíkana aú waweꞌepí mékajeka Tupana.
Iná pechu iꞌimakáloje kaphí Jesucristo chojé chapú kaje amákana aú yukuna marí
7 Mapéjaruna weká, iꞌichilá keja weká, eꞌiyonaja re weꞌiyá Tupana Pechu, raú ja kalé walaꞌá palá. Kaja keja weká, ajopana weꞌepíkaloje raú unká wapalamane kalé walaꞌaká palá.
8 Marí ke iꞌimakaño weká: Pulapé wamaka keꞌiyapé nojé chapú kaje yajwé, eꞌiyonaja unká richáꞌatala weká. Reꞌiyajé unká wani waweꞌepila mékeka ráchoꞌojiko wajló, eꞌiyonaja kalé unká wapechu laꞌaló ujwí raú.
9 Chapú wani neꞌiyajena laꞌaká weꞌemaká, eꞌiyonaja unká kupákejanami ke kalé weꞌemaká Tupana liyá. Nalaꞌá kewí wani wanapona, eꞌiyonaja unká nakapichátala weꞌemaká.
10 Jesucristo iꞌimaká marí ejaꞌawá chu wakajé, pulapé nawátaka rinókana iꞌimaká. Ñaké kaja wajló riká: weꞌejnaká ewá, neꞌiyajena wátaño wenókana, weꞌemakale Jesucristo yukuna najló. Ripalamane aú riꞌimatá weká, nakapichátaka piyá weká.
11 Marí ejaꞌawá chu weꞌemaká ketana, weꞌemajika kapichákajo eꞌiyá. Ilé keja riꞌimajika wajló weꞌechú kaꞌalá keja, walaꞌakale Jesucrístojlo nakaje. Eꞌiyonaja raꞌá wañathé nakaje laꞌakana aú, ajopana amákaloje palá rilaꞌakárena weká.
12 Tupana purákaꞌalo jaꞌapátakana nakú weꞌemakale, inaꞌuké nakiyana wátaño wenókana. Kapichákajo eꞌiyá weꞌemá ijló Tupana purákaꞌalo yukuna iꞌimaká, iꞌimakáloje matajnako raꞌapiyá jemaꞌakana aú.
13 Tupana purákaꞌalo lanaꞌakéjami chu pajluwaja kemari: “Kaphí nupechu Tupana chojé aú kalé nuꞌumá riyukuna ajopánajlo”, ke. Ripechu nakú riꞌimaká, ke kaja wapechu rinaku, raú kalé weꞌemá ajopánajlo riyukuna.
14 Tupana makápoꞌotari Jesucristo takaꞌakaje chiyá iꞌimaká, raú waweꞌepí rimakápoꞌotajika weká ñaké kaja. Rejomi riwáꞌaje weká ijwaꞌaté jeꞌechú chojé, weꞌemakáloje rijwaꞌaté re.
15 Ilé ke riꞌimajíkale wajló, wamá kajrú chapú kaje yajwé meꞌetení, riꞌimakáloje palá ijló. Raú richaje, richaje ke, íkiꞌirunaka inakiyana iꞌimajika ripalamane. Ñakele íkiꞌiruna iká puraꞌajiko Tupana waꞌaté, iꞌimakáloje palá rilaꞌakare iká yukuna rijló.
16 Ilé ke riꞌimakale, unká wapechu laꞌaló ujwí. Tajnákajo nakú wanapona, eyá weꞌechú kaꞌalá keja richaje, richaje ke, wapechu iꞌimaká kaphí Tupana chojé.
17 Unká kaphini wani kalé wajló chapú kaje yajwé, wamákare marí ejaꞌawá chu, meketánaja wamákale riyajwé. Palá wani weꞌemajika jeꞌechú chu matajnako, ñakele unká kaphini wani kalé chapú kaje yajwé wamákare meꞌetení.
18 Unká weꞌejnatala wapéchuwa nakaje wamákare nakú meꞌetení; nakaje unká wamálare nakú wapechu. Nakaje iná amákare kapichájero, eyá nakaje unká iná amálare meꞌetení, unká kapichálajo.