Purákaꞌaloji weꞌemakare jaꞌapiyá meꞌetení yukuna marí
3
Ilé ke wemaká wanakuwá aú, unká walaꞌalá wekó ajopana cháꞌatajeño ke. Unká kaja wawátala iliyá papera, richu imakáloje wanaku: “Palájneꞌekena neká”, ke, naweꞌepíkaloje weká raú penaje. Ilé ke neꞌiyajena wátaka nemaká nanaku. Weká unká ñaké kalé, ñakele unká naje kalé waꞌajla ijló papera lanaꞌakéjami ajopana liyá, raú iweꞌepíkaloje weká penaje.
2 Iká iꞌimaño waleꞌejé carta ke wajló, ipuraꞌakole wanaku palá. Tupana jaꞌapiyá jemaꞌajeño iká chuwa wapalamane, raú ajopana amaño palá Tupana laꞌaká iká. Ilé ke riꞌimakale ijló, ajopana weꞌepiño walaꞌaká iká palá.
3 Weꞌemaká ijló Jesucristo yukuna iꞌimaká aú kalé ikeñoꞌó raꞌapiyá iꞌimakana. Tupana Pechu aú rilaꞌá ipechu palá, unká tajnákajo penaje kalé riká. Jesucristo waꞌatéjena iká, raú ajopana weꞌepiño palá walaꞌaká iká. Unká papera chojé lanaꞌakéjami kalé riyukuna; unká kaja jipa nakú lanaꞌakéjami kalé riká, naweꞌepíkaloje rinakojé raú. Namákale palá Tupana laꞌaká iká aú naweꞌepí rinakojé.
4 Wemá inaku ilé ke, wapechu iꞌꞌimakale kaphí Jesucristo chojé Tupana palamane aú.
5 Unká waliyá kalé, walaꞌakáloje nakaje Tupánajlo; ripalamane aú ja kalé walaꞌajla nakaje palá.
6 Riká laꞌarí weká kaliyáruna, waꞌapátakaloje ajopánajlo riꞌimataka inaꞌuké kapichákajo liyá yukuna. Unká ripurákaꞌalo, Moisés michú lanaꞌakare júpimi iꞌimaká ke kalé riká. Unkale walaꞌalá rimaká ke, kapichájeño penájena weꞌemaká, eꞌiyonaja kalé Tupana Pechu aꞌarí wajló kajmuchaji, ripalamane weꞌemakáloje matajnako jeꞌechú chu.
7 Tupana purákaꞌalo Moisesjlo raꞌakare iꞌimá jipa nakú lanaꞌakeja. Moisés iphátaka aú riká Israel lakénami nakú wakajé, sereni waꞌaté ke rijimá amako. Rinakojé unká méñoꞌojo nayakáꞌalo richaje, kaja ewaja sereni kaje yakákaro kachuwa rijimá chiyá. Ripurákaꞌalo kemari inaꞌuké nakú: “Kapichájeño penájena neká, unkachu nemaꞌalá raꞌapiyá”. Eꞌiyonaja marí ke riphaka palá wani sereni waꞌaté nanaku.
8 ¡Palani wani purákaꞌaloji Tupana Pechu aꞌakare wajló!
9 Tupana aꞌarí Moisesjlo ripurákaꞌalo iꞌimaká, inaꞌuké weꞌepíkaloje raú kapichájeño penájena neꞌemaká riliyá. Ilé penaje riꞌimaká, eꞌiyonaja sereni waꞌaté ke Moisés jimá amako, riphátaka aú riká inaꞌuké nakú iꞌimaká. ¡Meke richaje wani palaka inaꞌukejlo Tupana yukuna, kemari inaꞌuké nakú: “Chuwa nuꞌumatá neká kapichákajo liyá!”
10 Meke palani wani Tupana iꞌimataka inaꞌuké kapichákajo liyá yukuna. Júpimi Ripurákaꞌalo, riyuríkare inaꞌukejlo iꞌimaká, chaje palaka riká.
11 Meketánaja penaje kalé ilé purákaꞌaloji riliyá iꞌimakare, eꞌiyonaja palá sereni waꞌaté ke Moisés jimá amako raꞌapátaka aú riká inaꞌukejlo iꞌimaká. Richaje wani palaka Ripurákaꞌalo chuwa raꞌakare wajló, unká tajnákajo penaje kalé iꞌimakare.
12 Waweꞌepí unká tajnákajo penaje kalé Ripurákaꞌalo, raú kalé kaphí wapechu riyukuna iꞌimakana nakú ajopánajlo.
13 Unká Moisés laꞌaká iꞌimaká ke kalé walaꞌaká. Riká apáraꞌari rijimá aꞌarumakaji aú, Israel lakénami amaka piyá sereni kaje yakákako kewá.
14 Unká naweꞌepike meke kemakánaka riká. Meꞌetení ñakeja najló riká. Napuraꞌakó kewá lanaꞌakéjami, Moisés yuríkare najló iꞌimaká waꞌaté, apáraꞌakejami keja najló riká, meꞌechuje riꞌimakale najló. Apáraꞌakeja aꞌarumakaji aú rijimá iꞌimaká, keja kaja najló riká apáraꞌakejami ke, Jesucristo jaꞌapiyá iꞌimakana aú ja kalé iná weꞌepí meke kemakánaka riká. Rejéchami unká apáraꞌakejami ke kalé inajlo riká, Jesucristo laꞌakale iná pechu palá.
15 Eyá apáraꞌakejami ke joꞌó najló riká. Napuraꞌakochu Tupana purákaꞌalo lanaꞌakéjami, Moisés jaꞌapátakare najló iꞌimaká waꞌaté, meꞌechuje ke joꞌó najló riká.
16 Iná pajnoꞌotákachu iná péchuwa Tupana ejo, rilaꞌá iná pechu palá, Ripurákaꞌalo iꞌimaká piyá meꞌechuje ke inajlo.
17 Wawakáraꞌajeri Jesucristo pechu weꞌiyá, ripalamane kalé walaꞌá riwakáraꞌaka ke.
18 Palá Jesucristo pechu wakáraꞌaka weká. Ripechu wakáraꞌaka ke walaꞌakachu, walaꞌá palá, raú ajopana inaꞌukena weꞌepiño kaja rinakojé. Ripechu jaꞌapiyá iꞌimakana aú richaje, richájeno ke, wapechu iꞌimaká Ripechu ke kaja.