2
Marí ke nupechu iꞌimaká inaku: Unká nuꞌujnalaje nachaje, apala nuwajájika neká aú napechu iꞌimajé kamuꞌují wani.
2 Nuꞌujnakela ichaje, nulaꞌajla ipechu kamuꞌují, raú unká ilaꞌalajla nupechu puꞌují. Kamuꞌují ipechu aú unká méñoꞌojo ilaꞌalajla nupechu puꞌují.
3 Raú marí lanaꞌakéjamija nuwakáraꞌa ijló, unkale nuwátala ichaje iꞌijnakana ipechu laꞌajé kamuꞌují. Palani nojló riꞌimakajla, iká laꞌakela puꞌují nupechu, eꞌiyonaja kamuꞌují ilaꞌakajla nupechu, nuꞌujnakela ichaje. Nojló palani rejenowaja wapechu iꞌimaká puꞌují pajwaꞌatéchaka.
4 Nulanaꞌaká ijló marí ketana, kamuꞌují wani nupechu iꞌimaká nojló. Kaja nuwajwé majákaꞌo nojló, nuꞌujnatákale nupéchuwa kamuꞌují wani inaku, nuyako nulanaꞌaká ijló marí. Unká nulaꞌakáloje ipechu kamuꞌují penaje kalé nuwakáraꞌa ijló nupurákaꞌalo lanaꞌakéjami iꞌimaká; iweꞌepíkaloje nuwátaka iká íkiꞌija penaje nuwakáraꞌa ijló riꞌimaká.
Pajluwaja nanakiyana laꞌaká rimanáicho iꞌimaká yukuna marí
5 Kele unká inaꞌukélari, numakare nakú ijló iꞌimaká, laꞌarí nupechu kamuꞌují wani. Unká nupéchuja kalé rilaꞌá ñaké, apala ñaké kaja rilaꞌaká inakiyana pechu kamuꞌují raú. Apala unká piyukeja kalé inaꞌukena pechu rilaꞌá kamuꞌují; ilé keja numaká rinaku, apala kaphí wani nupurákaꞌalo iꞌimaká kele laꞌarí puꞌuwarejlo.
6 Kaja awakó rinaku puraꞌajó. Palá iwajaka riꞌimaká ripachá, ñakele chuwa iwajániña piño riká, ilérejeja iyurí riwajákana.
7 Amó richaje puꞌuwaré rilaꞌakare liyá; iyurí iliyó chapú ramákana; ipuraꞌó palá rijwaꞌaté, ripechu laꞌakó piyá ujwí wani rinakuwá.
8 Numá ijló: Eko ilaꞌá rinaku palá, riweꞌepíkaloje íkiꞌija iwátaka riká.
9 Notáꞌakaloje iꞌimaká penaje nuwakáraꞌa ijló purákaꞌaloji iꞌimaká, raú nuweꞌepíkaloje mékeka jemaꞌaká noꞌopiyá.
10 Kaja amó richaje puꞌuwaré rilaꞌakare liyá; nomó kaja richaje. Unká nukaja kalé rilaꞌá chapú iꞌimaká, eꞌiyonaja nomó richaje ijwaꞌaté, Jesucristo ijlú chujena weꞌemakale.
11 Walaꞌá ilé ke, Jiñá Chiꞌinárikana laꞌaká piyá wanakiyana chapú, kaja waweꞌepí mékajeka riká.
Pablo wo kaꞌakó yukuna marí
12 Nuphaka pajimila Troas ejo Jesucristo yukuna iꞌimajé wakajé, palá wani Tupana laꞌaká re iꞌimakaño, nuꞌumakáloje riyukuna najló.
13 Unká nomala re wanakiyana Tito iꞌimaká, raú nowó kaꞌó rijwaꞌaté, unkale nomala riꞌimaká. Raú nuꞌumá nuyukuno najló, rejomi noꞌopá piño ají ke Macedonia teꞌeré ejo.
Jesucristo laꞌaká piyuke nakaje jáchoꞌoko palá Páblojlo yukuna marí
14 Palá Tupana laꞌakare weká yukuna weꞌemano rijló. Cháꞌatajeri Jesucristo iꞌimakale, riwakáraꞌa weꞌemaká riyukuna ajopánajlo, ajopánajlo ke. Palani wani riyukuna raꞌapiyá jemaꞌajéñojlo;
15 palani kaja Tupánajlo, weꞌemakale riyukuna ajopánajlo. Iná jemaꞌakachu raꞌapiyá, riꞌimatá iná kapichákajo liyá. Raꞌapiyá jemaꞌajéñojlo palánija riyukuna, eyá kapichájeño penájena jemaꞌañó kaja riyukuna.
16 Najló chapú ripurákaꞌalo yukuna, riꞌimakale nakapichájiko yukuna, raú unká paala najló riyukuna. Raꞌapiyá jemaꞌajéñojloja kalé palani riꞌimataka inaꞌuké kapichákajo liyá yukuna, raú naweꞌepíkale neꞌemajika matajnako jeꞌechú chu. Unká na kalé weꞌepí Tupana yukuna iꞌimakana palá, unkachu raꞌalá iná ñathé riyukuna iꞌimakana aú.
17 Unká wakánakaloje liñeru wajluwa penaje kalé weꞌemá riyukuna. Riká penaje kajrú ajopana iꞌimaká riyukuna; unká ñaké laꞌakaño kalé weká, waweꞌepí kewaka riyukuna. Tupana ijlú chu ke weꞌemaká riyukuna, riwakáraꞌakarena weꞌemakale, Jesucristo waꞌaté jápajeño keja kaja weká.