EFESIOS
Jesucristo jaꞌapiyá jemaꞌajeño Éfeso e iꞌimakáñojlo Pablo wakáraꞌa purákaꞌaloji marí ke iꞌimaká
1
Jesucristo wakáraꞌakarena riyukuna iꞌimajé nakiyana nuká, kaja keja Tupana pechu nakú nulaꞌakana iꞌimakale. Nulanaꞌá iká Éfeso e iꞌimakáñojlo marí purákaꞌaloji. Jesucristo jaꞌapiyá jemaꞌajeño iꞌimakale, iká iꞌimaño pajluwaja keja rijwaꞌaté.
2 Nuwata waraꞌapá Tupana, wawakáraꞌajeri Jesucristo waꞌaté, laꞌaká ipechu palá napalamane aú.
Palá wani Tupana laꞌaká inaꞌuké yukuna marí
3 Palánijla kaja wapuraꞌakojla Tupana, wawakáraꞌajeri Jesucristo jaraꞌapá, nakú palá wani. Palá wani rilaꞌaká weká, Jesucristo waꞌatéjena weꞌemakale. Chuwa pajluwaja keja weká rijwaꞌaté, ñakele rilaꞌá wapechu palá keꞌiyapejé nakaje aú, jeꞌechú chu iꞌimajíkaño weꞌemajíkale.
4 Unká chiyó Tupana keñoꞌota ejaꞌawá iꞌimaká, kaja riweꞌepí Jesucristo leꞌejena weꞌemajika. Unká japi laꞌalaño puꞌuwaré keja weká rijló, ñakele unká na chona kalé riwajaje weká, íkiꞌija riwátakale weká,
5 Ripechu nakú riꞌimá, raꞌakáloje weká riyaniwá penaje kaphí Jesucristo chojé iꞌimakana aú. Palani rijló ilé ke walaꞌakana palá, kaja keja riwátakale riꞌimaká wajló.
6 Ñakele palánijla ñakeja Tupana nakú puraꞌakano palá, ripalamane weꞌemakale. Riꞌirí, íkiꞌija riwátakare, palamane aú rilaꞌá wanaku palá wani.
7 Jesucristo takaꞌaká aꞌawaná apiyákakanami nakojé wachaya wakajé, kajrú rira iꞌijnaká itapuwa aphumi chiyá iꞌimaká. Rira palamane aú riꞌimatá weká; ripalamane kaja Tupana amaro wachaje, piyuke puꞌuwaré walaꞌakare liyá. Ilé kaje aú waweꞌepí íkiꞌija wani Tupana wátaka weká, riꞌimatákale weká kapichákajo liyá. Íkiꞌija wani riweꞌepika wamuꞌují iꞌimaká; unká rimejñátala na waliyá. Raꞌá wajló weꞌepíkaje, ripalamane aú waweꞌepíkaloje palá piyukeja nakaje rilaꞌakare nakojé.
8 Palá wani Tupana laꞌaká wanaku. Kapechuni wani riká; piyukeja riweꞌepika nakaje nakojé. Ñaké iꞌimakale, rilaꞌá piyukeja nakaje palá, ripechu nakú riꞌimaká ke.
9 Chuwa waweꞌepí riwakáraꞌaka Jesucristo marí ejaꞌawá chojé, raú rilaꞌakáloje inaꞌuké nakú palá. Ilé ke laꞌakana iꞌimá ripechu nakú júpimi iꞌimaká. Michoꞌojneji rinakojé weꞌepíkana iꞌimaká inaꞌukejlo riwakajé.
10 Riphájika rená chojé wakajé, Tupana ñapátaje piyukeja nakaje laꞌakana ripechu nakú iꞌimakare. Raú rawakátaje piyukeja jeꞌechú chu iꞌimakaño, maare ejaꞌawá chu iꞌimakaño waꞌaté, Jesucristo iꞌimakáloje nawakáraꞌajeri wani penaje.
11 Júpimi Tupana iꞌiwapari weꞌemaká rijluwa ajopana inaꞌukena eꞌiyayá, weꞌemakáloje rileꞌejena inaꞌukena nakiyana penaje, ripechu nakú riꞌimaká ke. Ñakele rijwaꞌatéjena weká Jesucristo palamane aú, kaja júpimi eyá, ripechu nakú ñaké walaꞌakana iꞌimaká.
12 Weká judíona nakiyana pechu iꞌimá kaphí Jesucristo chojé, ajopana tukumá. Ilé ke riꞌimaká wajló, weꞌemakáloje palá wani rilaꞌakare weká yukuna ajopánajlo penaje.
13 Palá Tupana laꞌaká iká Jesucristo palamane aú. Riꞌimatá iká kapichákajo liyá, jemaꞌakale kewákaje purákaꞌaloji jaꞌapiyá. Raꞌapiyá jemaꞌakana aú raꞌá ijló Ripechu, rarukákare inaꞌukejlo júpimi iꞌimaká. Ripechu iꞌimaká iná eꞌiyá aú iná weꞌepí Jesucristo leꞌejé iná. Kaja raꞌá wajló Ripechu, rimaká rinaku iꞌimaká ke.
14 Raꞌá wajló Ripechu, apú nakaje raꞌajíkare wajló piyá. Raú waweꞌepí raꞌajika kaja wajló piyukeja nakaje rarukákare wajló iꞌimaká, weꞌemajika rijwaꞌaté jeꞌechú chu wakajé. Re wapuraꞌajó weꞌepiri wani piyuke nakaje laꞌakana nakú palá.
Pablo puraꞌakó Tupana waꞌaté Éfeso eruna nakú yukuna marí
15 Nuweꞌepí kaphí ipechu wawakáraꞌajeri Jesucristo chojé; nuweꞌepí kaja íkiꞌija iwátaka piyukeja Tupana leꞌejena inaꞌukena.
16 Ñakele numá Tupánajlo: “Puꞌují nupechu nanaku, pilaꞌakale palá neká”, ke numakano rijló nupuraꞌakó kewá rijwaꞌaté.
17 Nukejaꞌa riliyá weꞌepíkaje ijló. Jesucristo jaraꞌapá riká; ajopana chaje wani iꞌimaká riká. Weꞌepíkaje raꞌajíkare ijló aú iweꞌepeje palá rinakojé.
18 Numá kaja Tupánajlo, rilaꞌakáloje ipechu palá, iweꞌepíkaloje raú meke palá wani nakaje iꞌimajika iká, riꞌiwapakárena ajopana inaꞌukena eꞌiyayajlo, nakojé.
19 Piyuke wani nakaje laꞌajerí riká, unká na iꞌimalá unká riweꞌepílare laꞌakana. Ilé kaje weꞌepíkaje re kaja raꞌapiyá jemaꞌajeño eꞌiyá, rilaꞌakare aú piyuke wani nakaje.
20 Ripechu, raꞌakare raꞌapiyá jemaꞌajéñojlo, aú kaja rimakápoꞌota Jesucristo iꞌimaká; raú ja kaja riwaꞌa riká jeꞌechú chojé, riꞌimakáloje rewájena wakáraꞌajeri rijwaꞌaté.
21 Re wakáraꞌajeño iꞌimakaño, chaje Jesucristo; re nakaje minaná iꞌimakaño, chaje kaja riká. Piyukeja ajopana chaje wani riká meꞌetení, ñakeja riꞌimajika.
22 Tupana aꞌarí riká piyuke nakaje amájeri penaje; raꞌá kaja riká raꞌapiyá jemaꞌajeño wakáraꞌajeri penaje. Iná wílaꞌaru iꞌimaká inajlo, ke kaja Jesucristo raꞌapiyá jemaꞌajéñojlo;
23 rinapona ke rijló piyukeja raꞌapiyá jemaꞌajeño; eyá riká, newílaꞌaru ke kaja najló. Re Ripechu jeꞌechú chu; re kaja Ripechu piyuke ejaꞌawá chu, raꞌakáloje raꞌapiyá jemaꞌajeño ñathé raú.