FILIPENSES
Marí ke Pablo, Timoteo waꞌaté wakáraꞌaka Filipos e iꞌimakáñojlo purákaꞌaloji
1
Weká wakáraꞌaño marí purákaꞌaloji ijló. Jesucristo waꞌaté jápajeño weká, ñakele walanaꞌá iká, piyukeja Jesucristo jaꞌapiyá jemaꞌajeño, Filipos e iꞌimakáñojlo marí purákaꞌaloji. Tupana jaꞌapiyá jemaꞌajeño nakiyana iꞌimakale, pajluwa keja iká Jesucristo waꞌaté, ñaké kaja ajopana raꞌapiyá jemaꞌajeño waꞌaté. Re ijwaꞌaté amájeño, re kaja ijwaꞌaté iñathé aꞌajeño. Nekajlo waꞌató wawakáraꞌa marí purákaꞌaloji.
2 Eko waraꞌapá Tupana, eyá wawakáraꞌajeri Jesucristo waꞌaté, laꞌá inaku palá, palá ipechu iꞌimakáloje napalamane aú pajwaꞌatéchaka.
3 Nuꞌujnataka kewá nupéchuwa inaku, numá Tupánajlo: “Palá pilaꞌaká nuká naú, nuñathé aꞌajeño neꞌemakale”, ke.
4 Eyá nupuraꞌakochu rijwaꞌaté, puꞌují nupechu ke nupuraꞌakó ichaya rijwaꞌaté,
5 aꞌakale nuñathé, ikeñoꞌoká riyukuna jemaꞌakana wakajé, eyá maárejecha.
6 Raú nuweꞌepí rilaꞌaká palá ipechu, iꞌimakáloje palá laꞌakaná nakuja riwátaka ke. Ripalamane aú iꞌimajé palá laꞌakaná nakuja, aꞌajná Jesucristo paꞌajiko piño majó ejená.
7 Palá wani nojló nupéchuwa iꞌijnatákana piyukeja ilé ke inaku, kajrú wani nuwátakale iká, Tupana laꞌakale inaku palá wani, rilaꞌaká nunaku ke kaja. Riꞌimataka iná kapichákajo liyá yukuna iꞌimakana jimaje nakaꞌá nuká inaꞌuké wajákelana chojé. Eꞌiyonaja kalé kaphí nupechu, maare eyá iꞌimajemi nuꞌumajíkale kaja palá wani riyukuna wawakáraꞌajeñojlo, raú naweꞌepíkaloje nájeka nuꞌumaká riyukuna.
8 Palá Tupana weꞌepika kajrú wani nuwátakajla piyukeja amákana, íkiꞌija nuwátakale iká Jesucristo palamane aú.
9 Nupuraꞌó kaja inaku rijwaꞌaté, raꞌakáloje iñathé, iwátakaloje richájeno, richájeno ke, pekowáaka. Numá kaja rijló, raꞌakáloje ijló weꞌepíkaje, raú iweꞌepíkaloje palá rinakojé;
10 raú iweꞌepeje kaja palá nakaje laꞌakana pajlokaka. Tupana palamane iꞌimajé palá laꞌakaná nakuja, ñakele Jesucristo paꞌajiko piño majó wakajé, unká na pachá riwajálaje iká,
11 kajrú wani ilaꞌakale nakaje palá ripalamane aú ajopana eꞌiyowá. Ilé ke namájika aú ilaꞌaká palá nakaje, nephaje kaja Tupana jaꞌapí, raú napuraꞌajó kaja palá wani rinaku.
12 Nojena, kaja nakaꞌá nuká maare inaꞌuké wajákelana chojé. Nuwata iweꞌepika maare nuꞌumaká eꞌiyonaja, ajopana jemaꞌaká nuliyá mékeka Tupana iꞌimataka iná kapichákajo liyá yukuna.
13 Piyukeja suráana, nuwaꞌaphé iꞌimakaño, eyá weꞌemakana waꞌaté iꞌimakaño, weꞌemakana ñakaré waꞌaphé iꞌimakaño, kajena jemaꞌañó piyukeja mékaje yukuna iꞌimakana jimájeka nuká maare.
14 Ajopana nojena, Jesucristo jaꞌapiyá jemaꞌajeño, jemaꞌaká aú nakaꞌaká nuká inaꞌuké wajákelana chojé yukuna, nalaꞌá kaphí napéchuwa, nakeroꞌokó piyá Tupana purákaꞌalo yukuna iꞌimakana piyá ajopánajlo. Nalaꞌá kaja richaje kaphí napéchuwa richojé.
15 Neꞌiyajena puraꞌañó Jesucristo nakú ajopana waꞌaté, chapú napechu iꞌimakale nunaku, ñaké kaja ajopana pechu iꞌimakáloje nunaku raú. Eyá ajopana iꞌimaño palá riyukuna, palá kaja ajopana pechu iꞌimakáloje nunaku najwaꞌaté.
16 Eyá ajopana iꞌimaño riyukuna ajopánajlo, nawátakale íkiꞌija nuká. Naweꞌepí Tupana aꞌaká nuꞌumaká, nuꞌumakáloje Jesucristo purákaꞌalo chaya puraꞌajero penaje.
17 Eyá ajopana iꞌimaño Jesucristo yukuna ajopánajlo, nawátakale palá nakaje iꞌimaká najló, eꞌiyonaja unká paala napechu nakú riká. Richaje chapuka riꞌimakáloje nojló maare inaꞌuké wajákelana chu nuꞌumaká ketana, penaje neꞌemá ñaké riyukuna ajopánajlo.
18 Eꞌiyonaja unká na penaje nojló nakaje neꞌemakare yukuna iꞌimalá. Nojló palani, naꞌapátakale Jesucristo yukuna ajopánajlo. Neꞌiyajena pechu kaꞌajná unká paala nunaku, eꞌiyonaja puꞌují nupechu, neꞌemakale riyukuna ajopánajlo.
19 Jesucristo aꞌajeri nuñathé Ripechu aú, náchoꞌotakaloje nuká marí inaꞌuké wajákelana chiyá penaje, ipuraꞌakole nuchaya Tupana waꞌaté. Riká laꞌarí nupechu puꞌují.
20 Ñakeja nuwátaka nujápakaꞌala, riwakáraꞌakare nulaꞌaká laꞌakana, unká wani nuwátala rilaꞌakana apoꞌojó. Nuwata nupechu iꞌimaká kaphí meꞌetení riyukuna iꞌimakana nakú, raú raꞌapiyá jemaꞌajeño puraꞌakóloje palá rinaku raú. Apala nenoje kaꞌajná nuká maare nuꞌumajika ketana, eꞌiyonaja kalé nuwata raꞌapiyá jemaꞌajeño puraꞌakó palá Tupana nakú, nuꞌumakale najló riyukuna iꞌimaká.
21 Jesucristo wátaka ke laꞌakanaja nuweꞌepeje nutukumó, marí ejaꞌawá chu nuꞌumajika ketana. Meꞌetení nutakaꞌakela, palani nojló riꞌimakajla.
22 Marí ejaꞌawá chu nuꞌumaká ketana, nulaꞌajla kajrú nakaje riꞌimakáloje palá rinaku. Ñakele unká nuweꞌepila naka palani nojló: re joꞌó kaja ejaꞌawá chu iꞌimakana kaꞌajná, takaꞌakaje kaꞌajná.
23 Puwichani nojló ilé kaje nakojé weꞌepíkana, naka laꞌakana. Palani nojló takaꞌakaje iꞌimakajla, nuꞌujnakáloje Jesucristo iꞌimaká ejo, re nuꞌumakáloje rijwaꞌaté. Ilé kaje iꞌimárijla nojló palani.
24 Eꞌiyonaja kalé noꞌokáloje iñathé penaje nuwata re joꞌó kaja marí ejaꞌawá chu iꞌimakana.
25 Nuweꞌepí re joꞌó kaja nuꞌumajika ijwaꞌaté noꞌokáloje iñathé, richaje ipechu iꞌimakáloje puꞌují Jesucristo nakú, ñaké kaja ipechu iꞌimakáloje kaphí richojé.
26 Ñakele meketana iꞌimajemi, nuꞌumajé piño ijwaꞌaté, raú ipechu iꞌimakáloje richaje puꞌují rinaku.
27 Marí kalé nuwátaka ilaꞌaká, unká nuꞌumalá ijwaꞌaté ketana: Ilaꞌá piyukeja nakaje palá, Jesucristo purákaꞌalo kemaká ke. Apala nuꞌujnajika kaꞌajnó ichaje wakajé, nuwata iyukuna jemaꞌakana: “Rejenowaja péchuruna neká Tupana wátaka ke laꞌakana nakú. Kaphí péchuruna kaja neká Jesucristo yukuna iꞌimakana nakú ajopánajlo”, ke nuwátaka iyukuna jemaꞌakana.
28 Ikeroꞌoniño chapú inaku péchuruna piyá. Ilé kaje namájika aú, naweꞌepeje Tupana waꞌatéjenaka iká, eyá naweꞌepeje kaja kapichájeño penájenaka neká. Tupánaja kalé iꞌimatari iná kapichákajo liyá.
29 Ripalamane aú ipechu kaphí Jesucristo chojé; ripalamane aú kaja ijñaꞌá chapú kaje yajwé panaku, raꞌapiyá jemaꞌajeño iꞌimakale.
30 Rejenowaja iká nujwaꞌaté pajñakani. Kaja amá mékeka nomájika kajrú chapú kajé yajwé iꞌimaká. Nuꞌumaká ijwaꞌaté wakajé, eyá maárejecha, ñakeja kaja jemaꞌaká chapú kaje yajwé nomákare yukuna.