2
Kaphí Jesucristo laꞌaká raꞌapiyá jemaꞌajeño pechu. Íkiꞌija riwátakarena kaja iká. Ilé ke riꞌimakale ijló, palá ipechu. Ñakele iweꞌepí ajopana muꞌují. Rilaꞌá kaja ipechu palá, raú iweꞌepíkaloje khaí ajopana inaꞌukena nakú.
2 Nuwata ilaꞌaká nupechu puꞌují, palá pajwaꞌatéchaka iꞌimakana aú, pajluwa chuwá ipéchuwa iꞌijnatákana aú, eyá pajluwa chuwá nakaje laꞌakana aú.
3 Ilaꞌaniña nakaje, raú ilaꞌakáloje inakuwá ajopana cháꞌatajeño ke; ilaꞌá inakuwá ajopana jaꞌapejé iꞌimakaño ke.
4 Iwátaniña ijlúwaja nakaje palani; iwata kaja nakaje palani iꞌimaká ajopánajlo.
5 Ipechu iꞌimá Jesucristo pechu iꞌimaká ke kaja, marí ke:
6 Tupana pechu, ke kaja Jesucristo pechu.
Riwátakela, riꞌimajla kaja Tupana ke
maare ejaꞌawá chu riꞌimaká wakajé, eꞌiyonaja kalé riꞌimá raꞌapiyateje ke.
7 Rimothoꞌó marí ejaꞌawá chu iꞌimaká,
riꞌimakáloje inaꞌuké, weká ke kaja.
Rilaꞌá rinakuwá Tupana waꞌaté jápajeri keja.
8 Inaꞌuké riꞌimaká wakajé,
palá remaꞌajika Tupana jaꞌapiyá.
Remaꞌakale palá raꞌapiyá, jimaje nenó riꞌimaká
aꞌawaná apiyákakanami nakojé.
Unká inaꞌukélaruna nenójika riwakajé iꞌimaká,
ke nenoka riꞌimaká.
9 Ilé ke Jesucristo jemaꞌakale, Tupana jaꞌapiyá aú
raꞌá riꞌimaká, inaꞌuké iphákaloje raꞌapí piyuke,
riꞌimakáloje nachaje wakáraꞌajeri wani penaje.
10 Piyukeja jeꞌechú chiyájena,
piyukeja inaꞌukena ejaꞌawá chu iꞌimakaño,
kawakala ewá iꞌimakaño, kaja takaꞌakaño,
kele iꞌimajeño raꞌapejé.
Riká iꞌimajeri nawakáraꞌajeri wani.
Rijimaje piyukeja táraꞌajeño neꞌerúpachi aú,
nachaje wakáraꞌajeri riꞌimakale.
11 Raú naweꞌepeje ajopana chaje wani Jesucristo.
Ilé ke riꞌimajika, nemakáloje rinaku:
“Ajopana chaje wakáraꞌajeri wani riká”, ke.
Raú napuraꞌajó palá wani Tupana nakú.
Jesucristo jaꞌapiyá jemaꞌajeño amátaño ajopana inaꞌukena palá laꞌakaná aú. Riyukuna marí
12 Ñakele nojena, íkiꞌija nuwátakarena, palá jemaꞌaká noꞌopiyá, nuꞌumaká ijwaꞌaté wakajé ketana iꞌimaká. Chuwa, nuwata jemaꞌaká richaje noꞌopiyá, juká nuꞌumaká iliyá ketana. Nuwata iꞌimaká palá nakaje laꞌakana nakuja Jesucristo palamane aú. Riꞌimatá iká kapichákajo liyá, ñakele iphá wani raꞌapí; ilaꞌá nakaje riwátaka ke.
13 Tupana laꞌarí iná pechu palá, iná wátakaloje palá laꞌakaná raú; raꞌá kaja iná ñathé rilaꞌakana aú.
14 Ilaꞌaniña nakaje iyukujnó; akhaꞌákaniño kaja pajwaꞌatéchaka rijimaje,
15 raú unká na puraꞌalajo meke inaku. Ilaꞌá palá nakaje keleruna inaꞌukena, puꞌuwaré laꞌajeñó, eꞌiyá, Tupana yaní iꞌimakale. Raú puꞌuwaká palá ilaꞌakare amájiko najló, iwijrina amako puꞌuwaká kalajeruni chu, ke kaja.
16 Ripurákaꞌalo jaꞌapiyá iꞌimakana aú, iná iꞌimá matajnako jeꞌechú chu. Jesucristo paꞌajiko piño majó wakajé, nupechu iꞌimajé palá inaku, nuweꞌepíjikale unká mapeja kalé nukapichako jewíñaꞌatakana nakú iꞌimaká.
17 Apala nenoje kaꞌajná nuká Jesucristo yukuna iꞌimakana jimaje, eꞌiyonaja kalé puꞌují nupechu, nuꞌumakale riyukuna ijló. Riyukuna jaꞌapiyá jemaꞌakana aú, ipechu kaphí richojé. Riká palani Tupánajlo, raú nuwata kaja ipechu iꞌimaká puꞌují nujwaꞌaté.
18 Ipechu iꞌimá kaja puꞌují, rejenowaja wapechu iꞌimakáloje puꞌují pajwaꞌatéchaka penaje.
Timoteo, Epafrodito, kele yukuna marí
19 Wawakáraꞌajeri Jesucristo wátajika ee, meketánaja iꞌimajemi nuwata Timoteo wakáraꞌakana ilé ñoꞌojó amaje. Riká iphátajeri majó iyukuna nojló, raú nupechu laꞌakóloje puꞌují.
20 Unká apú iꞌimalá maare nujwaꞌaté, nupechu ke kaja péchuri. Unká kaja apú iꞌimalá, wátari wani aꞌakana rinakojó nakaje iꞌimakáloje palá ijló penaje.
21 Piyukeja aꞌañó nanakojó najlúwaja nakaje nawátakare laꞌakana, unká aꞌalaño nanakojó nakaje laꞌakana Jesucristo wátaka ke.
22 Kaja iweꞌepí kaliyani Timoteo nojló. Iká amaño raꞌaká nuñathé Jesucristo yukuna iꞌimakana aú, ilérowa weꞌemaké ijwaꞌaté wakajé. Iná iꞌirí aꞌaká iná ñathé, ke kaja raꞌajika nuñathé iꞌimaká.
23 Ñakele nuwata riwakáraꞌakana kaꞌajnó amaje, nuweꞌepíjikaja mékeka nakaje iꞌimajika nojló maare ejomi.
24 Kaphí nupechu wawakáraꞌajeri Jesucristo chojé, raú nuweꞌepí nokoja nuꞌujnajika ichaje.
25 Nuwata kaja Epafrodito wakáraꞌakana ichaje. Riká iwakáraꞌakare majó nuñathé aꞌajeri penaje iꞌimaká. Walakaꞌapheja wewíñaꞌataka inaꞌuké Tupana nakú, nayuríkaloje puꞌuwaré nalaꞌakare naliyó raú penaje.
26 Kajrú wani riwátaka amákana piyukeja. Jemaꞌakale ritami riꞌimaká yukuna aú, ripechu laꞌó rijló kamuꞌují, unkale riwátala iweꞌepika riyukuna, ipechu laꞌakó piyá kaja kamuꞌují raú.
27 Kewaka, ritami wani riꞌimaká, ujú kaje chiyó ritakaꞌajla, eꞌiyonaja kalé Tupana weꞌepiri numuꞌují, nupechu iꞌimaká piyá kamuꞌují wani. Ritakaꞌakela, richaje nomákajla riyajwé.
28 Ñakele tuꞌujné nuwátaka riwakáraꞌakana kaꞌajnó ichaje, amákaloje piño riká, raú ipechu laꞌakóloje puꞌují. Raú kaja nupechu laꞌajó palá.
29 Riphájika ee ichaje, ipechu iꞌimá puꞌují rinaku, Jesucristo jaꞌapiyá jemaꞌajeri riꞌimakale ijwaꞌaté. Ilé ke iꞌimakaño inaꞌuké jaꞌapí iphá palá.
30 Ujú kaje chiyó ritakaꞌajla Jesucristo wátaka ke laꞌakana jimaje. Kajrupi riꞌimaká wajló, eꞌiyonaja raꞌá nuñathé iꞌimaká. Iká apumí chojé raꞌá nuñathé meꞌetení, unkale iꞌimalajla nujwaꞌaté maare nuñathé aꞌajeñó penaje.