Palani kaje Tupana wátakare walaꞌaká yukuna marí
3
Chuwa nojena, ipechu iꞌimá puꞌují wawakáraꞌajeri wani nakú. Numaje piño ijló nakaje, kaja numakare nakú ijló iꞌimaká, nakú. Unká nukawílaꞌalo ijló ñakeja kaja kemakana nakú, palani riꞌimakale ijló.
2 Amá ikó inaꞌuké puꞌuwaré laꞌajeñó liyá. Neká wakáraꞌaño nayani kerákoꞌopana achiñana chinuma mataꞌakana, napechu iꞌimakale: “Ñaké nalaꞌakana aú Tupana leꞌejena neká”, ke.
3 Rileꞌejena inaꞌukena weká, Jesucristo iꞌimatákale weká kapichákajo liyá. Rikaja kalé laꞌarí puꞌují wapechu Tupana nakú. Unká wapechu iꞌimalá kaphí nakaje walaꞌakare chojé, weꞌematákaloje wekó kapichákajo liyá raú.
4 Nakaje nulaꞌakare iꞌimaká iꞌimatákela nuká kapichákajo liyá, nucháꞌatajla piyukeja ilé kaje aú.
5 Nucháꞌatajla neká, namataꞌakale kaja nuchinuma weji kele kuwáꞌata ke (8) kala cha nuꞌumaká, nomothoꞌoká ejomi iꞌimaká. Israel lakénami nakiyana kaja nuká; Benjamín michú lakénami nakiyana nuká; hebréona nakiyana kaja nuchiꞌiná michuna iꞌimaká, ñakele hebreo jaꞌa nuká; fariséona nakiyana kaja nuká. Napechu ke kaja nupechu iꞌimaká Tupana purákaꞌalo nakú.
6 Tupana wátaka ke laꞌakanaja kalé nuweꞌepike nutukumó iꞌimajika. Eꞌiyonaja riwakajé, unkale nuweꞌepila palá Tupana nakojé, chapú nomájika ajopana iꞌimaká. Unká nuwátala neꞌemaká, unká nupechu ke kalé péchuruna neꞌemakale, raú kalé nulaꞌaké Jesucristo jaꞌapiyá jemaꞌajeño chapú wani iꞌimajika. Tupana purákaꞌalo, júpimi riyuríkare inaꞌuké jemaꞌakáloje raꞌapiyá penaje, jaꞌapiyá nomaꞌaké palá wani iꞌimajika. Unká na kalé kemárijla nunaku: “Unká richuwá kalé riꞌijnatá riꞌimaká palá”, ke.
7 Piyukeja nulaꞌajika ilé ke júpimi iꞌimaká, nupechu iꞌimakale nunakuwá: “Ñaké laꞌakana japi palani Tupánajlo”, ke. Chuwa nuweꞌepí unká na penaje kele kaje iꞌimalá nojló, palani nuꞌumakale rijló Jesucristo palamane.
8 Chuwa unká na penaje nojló nakaje jupejé nulaꞌajíkareno iꞌimalá, nuwakáraꞌajeri Jesucristo jaꞌapiyá jemaꞌakana ijlunami chojé. Nakaje kupákejami ke nuweꞌepika nakaje, júpimi nuwátakare, nakú; kaja nuyurí riká nuyámojo, nuꞌumakáloje Jesucristo jaꞌapiyá jemaꞌajeri penaje.
9 Unká lamáꞌatakejami ke kalé nuꞌumaká Tupana purákaꞌalo, júpimi riyuríkare inaꞌukejlo iꞌimaká, jaꞌapiyá jemaꞌakana aú. Eyá chuwa, unká japi laꞌalá puꞌuwaré ke nuká Tupánajlo, kaphí nupechu iꞌimakale Jesucristo chojé.
10 Nuwata richaje wani Jesucristo nakojé weꞌepíkana. Rimakápoꞌoko ejomi, raꞌá raꞌapiyá jemaꞌajéñojlo Ripechu. Nuwata piyuke nakaje laꞌakana Ripechu wakáraꞌaka ke. Jesucristo ñaꞌarí chapú kaje panaku wachaya iꞌimaká. Ñaké kaja nuwátaka chapú nalaꞌakare nuká ñaꞌakana panaku, riyukuna iꞌimakana jimaje. Riká takaꞌarí wachaya iꞌimaká, ke kaja nuwátaka riyukuna jaꞌapátakana ajopánajlo jimaje takaꞌakana.
11 Nutakaꞌajika ejomi, numakápoꞌojo piño, Jesucristo makápoꞌoko piño iꞌimaká ke kaja.
Richaje, richaje ke Pablo wátaka Tupana wátaka ke laꞌakana. Riyukuna marí
12 Unká numalá nunakuwá: Kaja nuñapata piyukeja nakaje, Tupana yuríkare nojló, laꞌakana, ke. Kaphí nulaꞌaká nupéchuwa, nuñapátakaloje piyuke wani nakaje, nutukumó yuríkaro, laꞌakana.
13 Nojena, chuwa kaja unká nuꞌujnatala nupéchuwa nakaje, jupejé nulaꞌajíkare iꞌimajika, nakú. Chuwa nakaje nutukumó iꞌimajíkare nakuja nupechu.
14 Jeꞌechú chojé nuphájika wakajé, Tupana aꞌajé nojló nakaje raꞌajíkare piyukeja kaphí Jesucristo chojé pechu iꞌimakáñojlo.
15 Tupana wátaka ke wani laꞌajéñojlo numá, ipechu iꞌimakáloje nupechu ke kaja ñaké laꞌakana nakú penaje. Apala apoꞌojó kemachi eꞌiyajena pechu kaꞌajná. Eko Tupana laꞌá ipechu palá, iphátakaloje nupechu penaje.
16 Meꞌetení purákaꞌaloji iꞌimakare chuwá, chuwaja iyuró.
17 Nojena, ilaꞌá palá nakaje, nulaꞌaká ke kaja; aꞌá kaja inakojó mékajenaka laꞌaká palá, walaꞌaká neꞌiyowá iꞌimaká ke kaja.
18 Kaja pulapecha numaká ijló marí nakú iꞌimaká, eꞌiyonaja numá piño ijló rinaku nuyako: Kajrú wani inaꞌukena, unká wani aꞌalaño nanakojó nakaje, Jesucristo laꞌakare nachaya ritakaꞌaká aú aꞌawaná apiyákakanami nakú iꞌimaká. Chapú wani napechu rinaku.
19 Ñakele kaja penaje wakajé, nakapichajo piyukeja. Nakaje wátakana najluwa nakuja napechu, nachiꞌinárikana ke najló riꞌimakale. Piyukeja apáñaꞌañojla nakaje nalaꞌakare jaꞌapí, eꞌiyonaja unká napáñaꞌalo raꞌapí. Nakaje, marí ejaꞌawá chu iꞌimakare, wátakanaja naweꞌepí natukumó.
20 Eyá weká, wañakajela wani jeꞌechú chu, ñakele weꞌematájeri Jesucristo iphájika piño majó wakajé, wátakana nakú weká.
21 Riwakajé rapiyákaje wanapona wajló. Kapichájero penaje wanapona iꞌimakare rapiyákaje, riꞌimakáloje rinapona ke kaja. Piyukeja wani laꞌajerí riꞌimakale, rilaꞌajé ñaké; rileꞌejé waja piyukeja nakaje.