2 Nuwata Evodia, Síntique waꞌaté, lamáꞌataka puraꞌakajo pajwaꞌatéchaka, Jesucristo jaꞌapiyá jemaꞌajeño neꞌemakale.

3 Eyá piká, nujwákeꞌewe, numaká nakaje laꞌakana nakú, ke pilaꞌakano riká. Pijló numá: Eko paꞌá nañathé, nakhaꞌákako piyá pajwaꞌatéchaka. Wejena ke neká, kaja iweꞌepí naꞌaká nuñathé nuꞌumaká ijwaꞌaté wakajé, noꞌopátakaloje Tupana yukuna ajopánajlo penaje. Clemente aꞌarí kaja nuñathé iꞌimaká, ñaké kaja ajopana aꞌaká nuñathé iꞌimaká. Kaja Tupana yáꞌata jeꞌechú chu iꞌimajíkaño ií ripapérane chojé.

4 Nojena, ipechu iꞌimá puꞌují ñakeja wani Jesucristo nakú. Numá piño ijló: ¡Ipechu iꞌimá puꞌují rinákuja kalé!

5 Iꞌimá inaꞌuké wani piyukeja inaꞌukena waꞌaté. Yewíchaja Jesucristo paꞌakó piño majó iphaka rená chojé.

6 Unká na aú kalé iwó kaꞌajó; iꞌimá piyukeja nakaje ipechu nakú iꞌimakare yukuna Tupánajlo. Ikejaꞌa nakaje riliyá, imá kaja rijló: “Palá pilaꞌaká weká piyukeja nakaje pilaꞌakare wajló aú”.

7 Ilé ke ilaꞌajika ee, Tupana laꞌajé ipechu palá, iwó kaꞌakó piyá nakaje nakú. Palá wani rilaꞌaká iná pechu, Jesucristo jaꞌapiyá iꞌimakana aú; unká méñoꞌojo iná pechu iphálajla rinakojé weꞌepíkana.

8 Eyá kaja penaje, nojena, nuwata iꞌijnataka ipéchuwa kewákaje purákaꞌaloji nakuja. Iꞌijnatá kaja nakaje, apú chaje wani iꞌimakare nakú, palá laꞌakaná nakú, nakaje palani inajlo iꞌimakare nakú, nakaje palani ajopana laꞌakare nakú. Ilé kaje nakuja iꞌijnatá ipéchuwa, ilaꞌakáloje ñaké.

9 Ilaꞌá nakaje nowíñaꞌataka iꞌimaká ke. Kaja nulaꞌá jenakú, ilaꞌá ñaké. Kaja amá nulaꞌaká nakaje rewá iꞌimaká, ñakele ilaꞌá ñaké kaja. Rilaꞌakana aú Tupana laꞌajé ipechu palá.

10 Puꞌují wani nupechu nuwakáraꞌajeri Jesucristo nakú, iweꞌepíkale piño nuká, nuñathé aꞌakana aú. Unká numalá raú: “Kaja ipechu kapicháñaa nuká”, ke; unká ilé ke kalé riká. Unká méñoꞌojo aꞌalá nuñathé, yaꞌajná nuꞌumakale iliyá iꞌimaká.

11 Unká kamuꞌují nulaꞌaká nakaje nakú aú kalé numá ijló ilé ke. Puꞌujija nupechu piyukeja nakaje nukapi iꞌimakare waꞌaté.

12 Kaja nuweꞌepí meke iꞌimakana, unká nakaje iꞌimalá nojló wakajé; nuweꞌepí kaja meke iꞌimakana, kajrú nakaje iꞌimaká nojló wakajé. Palá kaja nupechu, ñóꞌope aꞌajnejí iꞌimakachu nojló; palá kaja nupechu, nujñaꞌakachu meꞌepijí panaku.

13 Nujñaꞌajla panaku piyukeja nakaje, Jesucristo palamane aú nuꞌumakale.

14 Eꞌiyonaja kalé ilaꞌá palá wani nunaku iꞌimaká, iweꞌepíkale nuká. Maare, chapú kaje yajwé nomaka eꞌiyá, ilaꞌá nunaku palá.

15 Nóchoꞌoko Macedonia teꞌeré eyá wakajé, nuꞌujná Tupana iꞌimataka inaꞌuké kapichákajo liyá yukuna iꞌimajé ajopánajlo, ajopánajlo ke. Riwakajé ikaja kalé, Filipos e iꞌimakaño, aꞌañó nuñathé liñeru iwakáraꞌakare nojló aú.

16 Tesalónica e nuꞌumaká wakajé, pulapé iwakáraꞌaka nojló liñeru, apú nakaje waꞌaté nuꞌumajowa penaje.

17 Ilaꞌá nunaku palá iꞌimaká, liñeru aꞌakare nojló aú; waꞌató ilaꞌá kaja inakuwá palá, Tupana laꞌajíkale iká palá richaje.

18 Kaja iwakáraꞌa nojló Epafrodito waꞌaté iꞌimaká piyuke nakaje nulaꞌakare kamuꞌují nakú, raú re ñóꞌope nakaje nojló meꞌetení. Palani nojló piyuke ilaꞌakare, palani kaja Tupánajlo riká. Nakaje, puꞌují Tupana pechu iꞌimakare nakú, ke kaja rijló nakaje aꞌakare nojló.

19 Ñakele Tupana aꞌarí rinakojó nuká, aꞌajeri kaja rinakojó iká, ilaꞌaká piyá kamuꞌují nakaje nakú, Jesucristo palamane iꞌimakale.

20 Waraꞌapá Tupana palamane weká, ñakele nuwata inaꞌuké puraꞌakó rinaku waꞌajini wani palá. Ñaké riká.

21 Eko palá piyuke Jesucristo jaꞌapiyá jemaꞌajeño, ilérowa iꞌimakáñojlo. Wejena, maare nujwaꞌaté iꞌimakaño kemaño kaja inaku: “Eko palá najló kaꞌajnó”, ke.

22 Piyuke Tupana jaꞌapiyá jemaꞌajeño, maárowa iꞌimakaño, kemaño inaku: “Eko palá najló kaꞌajnó”, ke. Romano iꞌimakana ñakaré chiyájena kemaño kaja inaku ñaké kaja.

23 Nuwata wawakáraꞌajeri wani Jesucristo laꞌaká iká palá wani piyukeja ilérowa.