3 Wawakáraꞌajeri Jesucristo jaraꞌapá Tupana waꞌaté wapuraꞌakó kewá, wemaká rijló inaku: “Palá pilaꞌaká weká, nemaꞌakale paꞌapiyá”, ke.

4 Nomaꞌá meke ajopana kemaká inaku palá: “Kaphí napechu Jesucristo chojé. Íkiꞌija kaja nawátaka piyukeja rileꞌejena inaꞌukena”, ke. Palani wani nojló ilé ke iyukuna jemaꞌakana.

5 Nakaje, jeꞌechú chu iꞌimajíkare ijló, nakojé weꞌepíkana laꞌarí ipechu kaphí. Tupana iꞌimataka inaꞌuké kapichákajo liyá yukuna jemaꞌakana aú iweꞌepí rinakojé.

6 Neꞌiyajena iꞌijnaño Ripurákaꞌalo jaꞌapátakana nakú ajopánajlo, ajopánajlo ke, piyuke ejaꞌawá chuwá. Raꞌapiyá nemaꞌaká aú, rapiyákaje napechu, neꞌemaká piyá puꞌuwaré laꞌakaná nakú. Chuwa, palá nalaꞌaká pekowáaka; palá kaja napechu Tupana nakú. Ikeñoꞌoká raꞌapiyá jemaꞌakana iꞌimaká wakajé, eyá maárejecha, palani ijló kewákaje purákaꞌaloji jaꞌapiyá iꞌimakana.

7 Júpimi Epafras, íkiꞌija wawátakare, jewíñaꞌatari iꞌimaká rinaku. Wajwaꞌaté riꞌimá Tupana purákaꞌalo yukuna jaꞌapátakana nakú; Jesucristo waꞌaté jápajeri ke riká apumí chojé.

8 Riká kemari wajló inaku iꞌimaká, meke íkiꞌika iwátaka pekowáaka Tupana Pechu palamane aú.

9 Riꞌimaká wajló riyukuna wakajé, eyá maárejecha, unká wayurila Tupana waꞌaté puraꞌakano inaku. Wemá rijló, raꞌakáloje ijló weꞌepíkaje, iweꞌepíkaloje riwátaka ke laꞌakana nakojé raú.

10 Weꞌepíkaje, Tupana aꞌakare ijló, aú palá iꞌimajika pajwaꞌatéchaka, ripechu nakú riꞌimaká ke. Raú kaja ilaꞌajé palá riwátaka ke. Waꞌaté richaje, richaje ke, iweꞌepíjika rinakojé.

11 Piyukeja Tupana weꞌepika nakaje laꞌakana; riweꞌepí kaja ipechu laꞌakana kaphí, ijñaꞌakáloje keꞌiyapejé chapú kaje yajwé panaku. Raú ipechu puꞌují, chapú kaje yajwé amaka eꞌiyonaja, unká kaja ipechu laꞌalajo ujwí riliyá.

12 Ipuraꞌajiko riká waraꞌapá waꞌaté kewá, imá rijló: “Palá pilaꞌaká weká, nakaje yuríkole pileꞌejena inaꞌukénajlo jeꞌechú chu Jesucristo palamane aú”.

13 Kalajeruni chu iꞌimakaño ke weꞌemaká; Tupana kalé iꞌimatari weꞌemaká richiyá. Jiñá Chiꞌinárikana kápiya riꞌimatá weká, raꞌapátakaloje weká Riꞌirí kápeje penaje. Raú Riꞌirí, íkiꞌija riwátakare, yuriro wawakáraꞌajeri penaje.

14 Riká takaꞌarí wachaya iꞌimaká, raú weꞌemakóloje puꞌuwaré walaꞌakare liyá penaje, raú kaja ramó raꞌapiyá jemaꞌajeño chaje.

15 Unká iná amálare Tupana. Ripechu ke kaja Riꞌirí pechu, riká kalé namá iꞌimaká. Piyukeja Tupana keñoꞌótakarena iꞌimaká chaje Riꞌirí. Unká chiyó na iꞌimá, kaja re Riꞌirí Jesucristo iꞌimaké.

16 Riká keñoꞌótari piyukeja nakaje ejaꞌawá chu iꞌimakare, jeꞌechú chu iꞌimakare waꞌató. Piyukeja nakaje iná amákare, eyá nakaje unká iná amálare kaje waꞌató, rikeñoꞌota kaja iꞌimaká. Tupana awaꞌá iꞌimakaño, eyá yenuwa iꞌimakaño, nawakáraꞌajeño, kajena waꞌató, rikeñoꞌota iꞌimaká. Rijluwa penaje rikeñoꞌota piyukeja nakaje iꞌimaká.

17 Unká chiyó piyukeja nakaje iꞌimá, kaja Jesucristo iꞌimaké. Ripechu nakú nakaje iꞌimaká, ke piyukeja nakaje meꞌetení.

18 Iná wílaꞌaru iꞌimaká iná napónajlo, ke kaja Jesucristo raꞌapiyá jemaꞌajéñojlo, nawakáraꞌajeri wani riꞌimakale. Raꞌá kajmuchaji raꞌapiyá jemaꞌajéñojlo, neꞌemakáloje matajnako rijwaꞌaté jeꞌechú chu. Riká makápoꞌoro paineko piyuke, kaja júpimi ke takaꞌakaño iꞌimaká tukumá, riꞌimakáloje piyuke ajopana chaje penaje.

19 Tupana pechu ke kaja Jesucristo pechu; kaja keja Tupana wátaka riꞌimaká.

20 Riwata piyuke nakaje jeꞌechú chu iꞌimakare, ejaꞌawá chu iꞌimakare waꞌaté, lamáꞌatakana palá. Aꞌawaná apiyákakanami nakojé Jesucristo takaꞌarí inaꞌuké chaya penaje iꞌimaká; ripalamane Tupana palaꞌatárijla inaꞌuké pechu pajwaꞌatéchaka rijluwa.

21 Iká, unká Tupana waꞌatéjena kalé iꞌimaká júpimi; ripinana ke iꞌimajika, raú ilaꞌaké puꞌuwaré ipechu keja. Raú ilaꞌaké ikó chapú péchuruna ke rijló.

22 Kajrú Jesucristo ñaꞌaká chapú kaje yajwé panaku iꞌimaká. Ritakaꞌaká ichaya iꞌimaká, iꞌimakáloje rileꞌejena inaꞌukena penaje. Ñakele chuwa, palá péchuruna ke iká Tupánajlo. Raú unká na ilaꞌakare pachá kalé rimaje inaku: “Puꞌuwaré laꞌajeñó neká nojló”, ke.

23 Ilé ke iká chuwaka rijló, kaphí péchuruna iꞌimakale Jesucristo chojé, Ripurákaꞌalo chojé waꞌaté. Raú chuwa, ilaꞌá richaje ipéchuwa kaphí Tupana purákaꞌalo jaꞌapiyá iꞌimakana aú. Kaja jemaꞌá riꞌimataka iná kapichákajo liyá yukuna, raú iweꞌepí meke palá wani nakaje iꞌimajika ijló. Iyuríniña Ripurákaꞌalo, naꞌapátakare ijló iꞌimaká, jaꞌapiyá iꞌimakana. Riyukuna naꞌapata ajopánajlo, ajopánajlo ke, piyuke ejaꞌawá chuwá iꞌimaká; nuká iꞌimari kaja riyukuna ajopánajlo.

24 Noꞌopátakale riyukuna ajopánajlo, jimaje neꞌiyajena laꞌañó nuká chapú, eꞌiyonaja puꞌují nupechu, nomákale chapú yajwé, Jesucristo amaka riká iꞌimaká ke. Kaja keja nuꞌumajika chapú kaje yajwé ñaꞌakana nakú, richaje, richaje ke, ipechu iꞌimakáloje kaphí Jesucristo chojé.

25 Tupana aꞌarí nuká raꞌapiyá jemaꞌajeño ñathé aꞌajerí, riꞌimakáloje palani ijló penaje. Apú ewá, apú ewá ke, nuꞌumaká piyukeja riyukuna ajopánajlo.

26 Júpimi unká inaꞌuké weꞌepike Jesucristo yukuna, meꞌechú ke riꞌimajíkale naliyá riwakajé iꞌimaká. Eyá chuwa, puꞌuwaká riyukuna rileꞌejena inaꞌukénajlo.

27 Piyukeja inaꞌukénajlo penaje riyukuna, neꞌemakáloje rileꞌejena inaꞌukena raꞌapiyá jemaꞌakana aú. Piyukeja Ripechu iꞌimakárena eꞌiyá, rileꞌejena waja neká. Neká iꞌimajeño palá wani jeꞌechú chu, kaphí richojé péchuruna neꞌemakale.

28 Jesucristo yukuna iꞌimakana nakuja nuká, ajopana waꞌaté. Riyukuna aú walaꞌá piyuke inaꞌuké jenakú. Weꞌepíkaje, Tupana aꞌakare wajló aú wewíñaꞌata neká, naweꞌepíkaloje rinakojé palá, napechu iꞌimakáloje Jesucristo pechu ke kaja.

29 Ilé ke inaꞌuké pechu iꞌimakáloje penaje nujapa kajrú wani najwaꞌaté. Kajrú wani Jesucristo aꞌaká nuñathé, rilokópaꞌalaja nulaꞌá nakaje.