2
Nuwata iweꞌepika meke íkiꞌika noꞌoká nunakojó iká, Laodicea e iꞌimakaño, ajopana waꞌaté, unká joꞌó amálare nuká.
2 Noꞌó nunakojó iká, ipechu iꞌimakáloje kaphí Jesucristo chojé ñakeja, ipechu iꞌimaká piyá ujwí rinaku, ipechu iꞌimakáloje pajluwaja chuwá íkiꞌija pekowáaka wátakana nakú. Nuwata kaja iweꞌepika mékeka rilaꞌaká iná palá wani nakojé. Júpimi meꞌechuje ke riyukuna iꞌimajika inaꞌuké liyá iꞌimaká. Chuwa unká ñaké kalé riká, waweꞌepíkale palá rinakojé.
3 Kajrú péchuri Tupana; piyukeja riweꞌepika nakaje nakojé. Meꞌechuje kaja inaꞌukejlo nakaje riweꞌepíkare laꞌakana nakojé. Jesucristo jaꞌapiyá jemaꞌakana aú ja kalé iná weꞌepí mékeka inajlo riká.
4 Riyukuna nuꞌumá ijló, ajopana pajlaka piyá ijwaꞌaté. “Kewaka japi riká”, keja napajlaka iná waꞌaté mapeja.
5 Unká nuꞌumalá ijwaꞌaté meꞌetení, eꞌiyonaja re nupechu ijwaꞌaté. Puꞌují kaja nupechu inaku, iꞌimakale palá pajwaꞌatéchaka ilérowa; unká kaja iyurílale kaphí Jesucristo chojé iꞌimakana iliyó.
6 Kaja iwata Jesucristo iꞌimaká iwakáraꞌajeri, ñakele chuwa ilaꞌá rilokópaꞌala palá.
7 Raꞌapare palamane aꞌawaná táraꞌo kamachá. Ñaké kaja ijló kaphí Tupana chojé iꞌimakana, nowíñaꞌatakare nakú iꞌimaká. Iyuríniña kaja palá rilaꞌakare iká yukuna iꞌimakana rijló.
Wajé iná pechu Jesucristo pechu chuwá iꞌimakana aú. Riyukuna marí.
8 Amá ikó pajlákachina liyá, napichátaka piyá ipechu kewákaje purákaꞌaloji liyá. Napechu keja nemaká nakaje nakú, unká kewaka kalé nakaje neꞌemakare yukuna. Nachiꞌiná michuna purákaꞌalomi kaje nakuja napuraꞌó; eyá ejaꞌawá minaná kaje nakú napuraꞌó kaja. Unká Jesucristo purákaꞌalo ke kalé riká, nakaje nemakare nakú.
9 Unká naje kalé jemaꞌá naꞌapiyá ilé kaje, marí ke riꞌimakale: Tupana pechu ke kaja Jesucristo pechu. Ejaꞌawá chu riꞌimaká wakajé, re rinapona iꞌimá, inaꞌuké napona ke kaja.
10 Pajluwaja japi keja weká Jesucristo waꞌaté, raú richojeja kalé iná iꞌimá palá. Riká cháꞌatari piyukeja jiñana wakáraꞌajeño.
11 Tupana waꞌatéjena iká, Jesucristo iꞌimaká ke iꞌimakana aú. Neꞌiyajena kemaño nanakuwá: “Tupana waꞌatéjena weká, mataꞌakeja chinúmaruna weꞌemakale”, ke. Eꞌiyonaja unká ñaké kalé riká inajlo. Jesucristo ja kalé iꞌimatari iná puꞌuwaré laꞌakaná liyá. Richáꞌatakale ijló nakaje, ilaꞌajíkare puꞌuwaré ipechu keja aú, raꞌá iká rijwaꞌatéjenawa penaje.
12 Marí ke kemakánaka nalaꞌaká wakajé bautizar Jesucristo jaꞌapiyá jemaꞌajeno: Jesucristo takaꞌaká wachaya iꞌimaká wakajé, ritakaꞌá wapumí chojé, puꞌuwaré walaꞌakare pachá. Riká jenami nalaꞌá najmurátaka iná junápeje ee. Rijwaꞌaté ke kaja wamakápoꞌoko, weꞌemakáloje wajé iꞌimakaje jaꞌapiyá ripalamane, wapechu iꞌimakale kaphí Tupana chojé. Makápoꞌokajo jenami ke kaja walaꞌaká wajmuraka ejomi, wáchoꞌoko junápiya ee.
13 Júpimi kapichájeño penájena iꞌimaká Tupana liyá, puꞌuwaré ilaꞌajíkale iꞌimajika, unká kaja rileꞌejena inaꞌukena nakiyana kalé iꞌimajíkale. Riwakajé unká iyurike iliyó ipechu keja nakaje laꞌakana; eyá chuwa, Jesucristo jaꞌapiyá jemaꞌajeño iꞌimakale, Tupana aꞌarí ijló kajmuchaji, iꞌimakáloje matajnako jeꞌechú chu rijwaꞌaté raú. Ramó kaja ichaje piyukeja nakaje ilaꞌakare puꞌuwaré iꞌimaká liyá.
14 Tupana purákaꞌalo lanaꞌakéjami nakojé weꞌepíkana aú, waweꞌepí puꞌuwaré laꞌajeñó weꞌemaká, unká pachá walaꞌalá rimaká ke. Pachá riwajájikarena penájena nakiyana weꞌemaká. Aꞌawaná apiyákakanami nakojé Jesucristo takaꞌarí wachaya iꞌimaká, raú riꞌimatákaloje weká ilé kaje chiyá.
15 Jesucristo takaꞌakale wachaya iꞌimaká aú, richáꞌata Jiñá Chiꞌinárikana, raú richáꞌata kaja raꞌapiyá wakáraꞌajeño, jiñana pechu. Riwata piyukeja jemaꞌaká richáꞌataka neká yukuna.
16 Neꞌiyajena kemaño aꞌajnejí nakiyana nakú: “Unká ajñakaje penaje kalé riká”, ke. Iꞌirakaje nakiyana nakú nemá kaja: “Unká iꞌirakaje penaje kalé riká”. Unkale napechu ke kalé ipechu iꞌimakale rinaku aú, nemá inaku: “Puꞌuwaré laꞌajeñó neká”, ke, ilaꞌakale apoꞌojó napechu nakú riꞌimaká ke. Nemá kaja inaku: “Puꞌuwaré nalaꞌaká, unkale nephala fiesta wakajé jaꞌapí, naleꞌejé watánaꞌakaje jená wakajé jaꞌapí waꞌató”. Aꞌaniña inakojó napurákaꞌalo.
17 Kaja Jesucristo iphá majó iꞌimaká, ñakele chuwa puꞌuwaká wajló naka laꞌakana palani.
18 Puꞌují neꞌiyajena pechu Tupana waꞌatéjena, jeꞌechú chiyájena, nakú, raú nephá wani naꞌapí. Nemá nanakuwá: “Watapú wamá nakaje yaꞌatakó wajló”, ke, raú nalaꞌá nekó weꞌepiño ke wani. Nemájika ee inaku: “Puꞌuwaré laꞌajeñó neká”, ke, unkale ipechu iꞌimalá napechu ke, aꞌaniña inakojó napurákaꞌalo.
19 Neká, numakárena nakú, yuriño naliyó Jesucristo jaꞌapiyá jemaꞌakana. Iná wílaꞌaru iꞌimaká iná napónajlo, ke kaja Jesucristo raꞌapiyá jemaꞌajéñojlo. Wawakáraꞌajeri wani riká, laꞌarí piyukeja rijwaꞌatéjena nakú palá, pajluwano, pajluwano ke. Raú naweꞌepí richaje, richaje ke nakaje Tupana wátakare laꞌakana nakojé. Piyukeja inakiyana iꞌimaño pajluwa japi keja pajwaꞌatéchaka. Ewá, ewá ke, rijwaꞌatéjena laꞌaká palá, Tupana wátaka ke Jesucristo palamane aú.
20 Júpimi ilaꞌaké mapeja nakaje ajopana wakáraꞌajika iká ke. Eyá chuwa, kaja takaꞌakaño japi ke iká ilé kaje laꞌakanajlo, Jesucristo waꞌatéjena iꞌimakale. Ñakele chuwa unká na penaje ilaꞌalá mapeja nakaje nawakáraꞌakare ilaꞌaká.
21 Nakaje nakiyana nakú nemá: “Pijápaniña rinaku”, ke; eyá aꞌajnejí nakiyana nakú nemá kaja: “Pajñániña riká”, ke; nakaje nakiyana nakú nemá kaje: “Pijñaꞌaniña pikápojo riká”, ke. Ilé ke nawakáraꞌajika ilaꞌaká najwaꞌaté iꞌimaká.
22 Unká na penaje kalé nakaje nemakare nakú, kapichákajo penaje riꞌimakale.
23 Apala neꞌiyajena pechu nakaje newíñaꞌatakare neká nakú: “Kapechúrunajlo napurákaꞌalo”, ke. Ilé ke napechu rinaku, nawakáraꞌakale nalaꞌaká nakaje nachiꞌinárikanajlo penaje. Mapeja nalaꞌaká nanakuwá ajopana jaꞌapejena ke. Kewí nalaꞌaká nanapona, eꞌiyonaja unká na penaje kalé najló riká, nalaꞌakale napechu keja puꞌuwaré.