1 TESALONICENSES
Marí ke Pablo, rijwákeꞌena waꞌaté, wakáraꞌaka purákaꞌaloji Jesucristo jaꞌapiyá jemaꞌajéñojlo
1
Nuká, kéchami Silvano, eyá Timoteo, kele weká ajalákaño iká Jesucristo jaꞌapiyá jemaꞌajeño, pajimila Tesalónica e iꞌimakaño. Pajluwa japi keja iká pajwaꞌatéchaka, waraꞌapá wani Tupana, eyá Jesucristo waꞌaté. Nuwata nalaꞌaká iká palá, ipechu kawílaꞌako piyá nakaje nakú.
Palá nemaꞌaká Tupana jaꞌapiyá yukuna marí
2 Wapuraꞌakó Tupana waꞌaté kewá, wemaká inaku rijló: “Palá pilaꞌaká weká, nemaꞌakale paꞌapiyá”, ke.
3 Waweꞌepí ipechu iꞌimaká kaphí richojé, rilaꞌakáloje ijló nakaje riwátakare. Waweꞌepí kaja kaphí ijápaka, íkiꞌija iwátakale Tupana. Waweꞌepí unká iyurila Jesucristo chojé iꞌimakana kaphí, chapú yajwé amaka eꞌiyonaja, iꞌimakale ripaꞌajiko majó wakajé wátakana nakú.
4 Nojena, Tupana wajwena wani iká. Waweꞌepí riꞌiwapaká rijluwa iꞌimaká ajopana eꞌiyayá, iꞌimakáloje rileꞌejena inaꞌukena penaje.
5 Riꞌimataka iná kapichákajo liyá yukuna weꞌemaká ijló wakajé, unká riyukúnaja kalé weꞌemá ijló iꞌimaká. Riyukuna jemaꞌakana aú, kajrú Tupana Pechu aꞌaká iñathé, aꞌakáloje wani inakojó riká. Iweꞌepí mékeka walaꞌajika nakaje ilérowa, riꞌimakáloje palá ijlojé penaje.
6 Walaꞌaká iꞌimaká, ke kaja ilaꞌaká chuwa wajewemi, raú ilaꞌá Jesucristo laꞌajika ke kaja.
Tupana purákaꞌalo jaꞌapiyá jemaꞌakana jimaje, ajopana inaꞌukena laꞌakeño iká chapú iꞌimajika. Eꞌiyonaja kalé puꞌují ipechu iꞌimajika Ripurákaꞌalo jaꞌapiyá jemaꞌakana aú. Ripéchuja kalé laꞌarí ipechu puꞌují.
7 Palá laꞌakaná nakuja iká ilérowa meꞌetení. Palá ajopana Jesucristo jaꞌapiyá jemaꞌajeño, Macedonia teꞌeré ewájena, eyá Acaya teꞌeré ewájena, kele amaka ilaꞌaká palá, rejomi nalaꞌakáloje ñaké kaja amájemi penaje.
8 Ilé ke ajopana Macedonia teꞌeré eyájena amaka aú, nemaꞌá kaja Tupana purákaꞌalo jaꞌapiyá. Unká nekaja kalé jemaꞌañó riyukuna, piyukeja rewá iꞌimakaño waꞌató jemaꞌañó kaja riyukuna. Kaphí ipechu Tupana chojé, raú kalé ilaꞌá palá. Ñaké iꞌimakale, unká na penaje kalé weꞌemá najló riyukuna rewá, kaja nemaꞌakale riká.
9 Neká kemaño wajló inaku mékeka palá wani ijló riꞌimaká, weꞌemaká ichaje wakajé. Nemá kaja inaku: “Kaja nayurí naliyó nakaje jenami, napechu iꞌimajíkare nakú: ‘Wachiꞌinárikana riká’, ke, jaꞌapí iphákana, lanakiya nalaꞌakáloje iná Chiꞌinárikana wani Tupana wátaka ke penaje”. Unká mapéjari yuku kalé riká; kajmuni riká; raꞌapí iphájeño chuwa iká.
10 Nemá kaja inaku: “Jesucristo, Tupana iꞌirí, paꞌajero piño majó jeꞌechú chiyá, wátakana nakú neká. Riká neꞌemakare wátakana nakú, takaꞌarí iꞌimaká, rejomi Tupana makápoꞌota piño riꞌimaká. Riꞌirí palamane aú unká riwajálaje weká, íkiꞌija wani puꞌuwaré walaꞌakare chona. Ñakele neꞌematájeri Jesucristo wátakana nakú neká, riphájika majó ejená”, ke nemaká inaku.