2 Piyuke Jesucristo jaꞌapiyá jemaꞌajéñojlo numá: Iyuríniña Tupana waꞌaté puraꞌakano iliyó; iꞌimá kapechúruna rijwaꞌaté puraꞌakano aú; iꞌimá kaja palá rilaꞌakare iká yukuna rijló.

3 Ipuraꞌó kaja rijwaꞌaté nunaku, wawakáraꞌajeri Jesucristo aꞌakáloje nuñathé, nuꞌumakáloje riyukuna kajrú ajopánajlo, ajopánajlo ke, penaje. Inaꞌuké wajákelana chu nuká meꞌetení, nuꞌumakale Jesucristo yukuna chona. Meꞌechuje ke riyukuna iꞌimaká júpimi iꞌimaká.

4 Ñakele ipuraꞌó nunaku Tupana waꞌaté, nuꞌumakáloje riyukuna palá najló, riꞌimaká piyá meꞌechú najló.

5 Iꞌimajika ee unká jemaꞌalaño Tupana jaꞌapiyá waꞌaté, iꞌimá kapechú najwaꞌaté. Iꞌimá najló Tupana yukuna, ipechu iꞌimaniña nanaku: “Rejómiko weꞌemá najló riyukuna”, ke.

6 Ipuraꞌó palá najwaꞌaté; iweꞌepí kaja najló aꞌajipakana palá, nakaje yukuna nakejáꞌajika iliyá kewá.

7 Re wejena nakiyana Tíquico nujwaꞌaté maare, íkiꞌija nuwátakare riká. Palá kaja raꞌaká nuñathé Tupana jápakaꞌala laꞌakana aú. Jesucristo waꞌaté jápajeri riká nujwaꞌaté, riká kemájeri ijló nunaku mékeka nuká maárowa.

8 Ñakele nuwakáraꞌaje riká ichaje, riꞌimakáloje ijló mékeka weká maare yukuna, rikaꞌakáloje ujwí kaje iliyá raú.

9 Onésimo, íkiꞌija wawátakare, Jesucristo jaꞌapiyá jemaꞌajeri kaja riká. Neká iyamá iꞌijnajeño mékeka weká maare yukuna iꞌimajé ijló.

10 Re nujwákeꞌewe Aristarco maare inaꞌuké wajákelana chu nujwaꞌaté. Riká kemari inaku: “Eko palá najló kaꞌajnó”, ke. Ñaké kaja Marcos, Bernabé eꞌewé, kemaká inaku. Kaja numá ijló, riphájika penaje, palá iꞌimajika rijwaꞌaté.

11 “Eko palá najló kaꞌajnó”, ke Justo kemaká inaku. Aristarco, Marcos, Justo, kele judíona nakiyana neká, Jesucristo jaꞌapiyá jemaꞌajeño kaja neká. Nekaja kalé aꞌañó nuñathé Tupana yukuna jaꞌapátakana aú ajopánajlo, ajopánajlo ke, neꞌemakáloje rijwaꞌatéjena raꞌapiyá jemaꞌakana aú. Napalamane kalé palá nupechu.

12 “Eko palá najló kaꞌajnó”, ke Epafras kemaká inaku. Inakiyana riká, Jesucristo waꞌaté jápajeri kaja riká. Kajrú ripuraꞌakó Tupana waꞌaté inaku; mawó rikejáꞌaka nakaje Tupana liyá ijlojé penaje. Ripuraꞌó kaja rijwaꞌaté inaku, raꞌakáloje iñathé kaphí péchuruna iꞌimakáloje penaje, iweꞌepíkaloje kaja palá itukumó, riwátaka ke laꞌakana.

13 Nuká amari Epafras maare, raú nuweꞌepí kajrú riꞌijnataka ripéchuwa inaku. Ñaké kaja ripechu nakú Laodicea eyájena, Hierápolis eyájena waꞌaté.

14 Pujánaꞌajeri Lucas, íkiꞌija wawátakare, kemari kaja inaku: “Eko palá najló kaꞌajnó”, ke. Ñaké kaja Demas kemaká inaku.

15 Eko palá Jesucristo jaꞌapiyá jemaꞌajeño Laodicea e iꞌimakáñojlo. Eko palá kaja Nínfajlo, ruñakaré chojé awakájeñojlo waꞌaté.

16 Ipuraꞌajiko marí papera kaje waꞌaté re awakáñojlo ejomi, eko iwakáraꞌa riká Laodicea ejo, Jesucristo jaꞌapiyá jemaꞌajeño, re iꞌimakaño puraꞌakóloje rijwaꞌaté penaje. Nuwakáraꞌa kaja najló papera kaje iꞌimaká; nawakáraꞌaje kaja ijló riká rilanakiya. Eko ipuraꞌó rijwaꞌaté.

17 Eko imá Arquípojlo: “Wawakáraꞌajeri Jesucristo apumí chojé ke numaká rijló: Piñapata ilé jápakaje laꞌakana nuyuríkare pijló”.

18 Nuká Pablo lanaꞌarí ijló nuyátheꞌela aú marí nokó: “Eko palá ijló kaꞌajnó. Inaꞌuké wajákelana chu nuká meꞌetení. Nuwata Tupana laꞌaká iká palá ripalamane”, ke nulanaꞌaká ijló.