3
Jesucristo waꞌaté makápoꞌokaño pajñakani ke iká meꞌetení. Ilé ke riꞌimakale ijló, iwata ijluwa nakaje jeꞌechú chu iꞌimakare. Tupana awaꞌá Jesucristo; rijwaꞌaté riwakáraꞌa rileꞌejena inaꞌukena.
2 Ijnaꞌatá ipéchuwa nakaje jeꞌechú chu iꞌimakare nakú; iꞌijnatániña ipéchuwa nakaje marí ejaꞌawá chu iꞌimakare nakú.
3 Kaja takaꞌakaño japi ke iká meꞌetení puꞌuwaré laꞌakanajlo, Jesucristo waꞌaté iꞌimakana aú. Ñaké Tupana wátaka riꞌimaká ijló.
4 Re wajé iꞌimakaje ijló Jesucristo palamane. Riphájika majó kajrú mejámaꞌatani waꞌaté wakajé, riwáꞌaje iká rijwaꞌató, iꞌimakáloje rijwaꞌaté ñakeja.
Jesucristo waꞌaté iná laꞌá palá. Riyukuna marí
5 Ilaꞌaniña nakaje unká Tupana wátalare ilaꞌaká; ilaꞌaniña kaja imanáicho ajopana waꞌaté; ilaꞌaniña kaja ikó mawó nakaje, unká Tupana wátalare ilaꞌaká, nakojé. Iꞌimaniña kaja kayukújneꞌekena. Neká pechu puꞌují nakaje marí ejaꞌawá chu iꞌimakare nakú, lanakiya unká naꞌalá nanakojó Tupana.
6 Kajrú Tupana wajájika ilé ke laꞌakaño puꞌuwaré, unká pachá nemaꞌalá raꞌapiyá.
7 Ñaké kaja ilaꞌajika puꞌuwaré júpimi iꞌimajika.
8 Chuwa, kaja iyurí iliyó ñaké laꞌakana. Iyurí iliyó iyuchá; ipechu iꞌimaniña chapú ajopana nakú; ilaꞌaniña kaja ajopana inaꞌukena unká inaꞌukélaruna ke ijluwa; ipuraꞌaniño kaja puꞌuwareni purákaꞌaloji aú;
9 ipajlániña kaja pajwaꞌatéchaka. Kaja iyurí iliyó puꞌuwaré ilaꞌajíkareno laꞌakana.
10 Wajé ke Tupana laꞌaká wapechu, walaꞌakáloje palá riwátaka ke, waweꞌepíkaloje palá rinakojé raú.
11 Keꞌiyapejena inaꞌuké paliyáaka: re judíona iꞌimakaño; re kaja ajopana, unká judíona kalé iꞌimakaño; re kaja tapuwíyana; re kaja mawemíwaka jápaka apujlo; re kaja najlúwaja jápakaño. Chuwa Jesucristo jaꞌapiyá iꞌimakana aú, unká ajopana, ajopana ke, kalé weká paliyáaka, Ripechu iꞌimakale raꞌapiyá jemaꞌajeño eꞌiyá. Ilé kaje laꞌarí weká pajluwaja yaní keja pajwaꞌatéchaka.
12 Íkiꞌija wani Tupana wátakarena iká; riꞌiwapakárena kaja rijluwa iká, iꞌimakáloje rileꞌejena inaꞌukena penaje. Ñaké iꞌimakale, iweꞌepí pamuꞌujíchaka. Iꞌimá inaꞌuké wani pajwaꞌatéchaka; ilaꞌaniña kaja inakuwá nakaje nakojé weꞌepéjeño ke wani; ilaꞌaniña ikó tuꞌujné nakaje nakú; iyúchaꞌaniño kaja kiñaja;
13 aꞌá kaja pañathéchaka. Inakiyana kaꞌajná akhaꞌañó neꞌiyajena maná, nalaꞌakale iká chapú. Amó nachaje, Jesucristo amako ichaje iꞌimaká ke kaja.
14 Apú nakaje ilaꞌakare chaje nuwata iwátaka íkiꞌija pekowáaka; rejéchami kaja unká na iꞌimalaje ijló, unká ilaꞌalare palá.
15 Jesucristo laꞌarí wapechu palá, ripalamane weꞌemakáloje pajluwaja yaní japi keja pajwaꞌatéchaka. Ñakele iꞌimá palá rilaꞌakare iká yukuna rijló.
16 Aꞌá kaja Jesucristo purákaꞌalo inakojó ñakeja, ilaꞌakáloje rimaká ke penaje. Ilaꞌá kaja penakúchaka raú. Iweꞌepí ripurákaꞌalo nakojé palá, jewíñaꞌatakaloje palá pekowáaka rinaku. Jataní kaja Tupana yale pajwaꞌatéchaka. Iwajá ipéchuwa palá rilaꞌakare iká nakojé.
17 Piyukeja nakaje ilaꞌakare, ilaꞌá riká Jesucristo apumí chojé ke. Piyukeja nakaje imakare nakú, imá kaja rinaku rapumí chojé ke, ripalamane iꞌimakale. Imá kaja Tupánajlo: “Waraꞌapá, palá pilaꞌaká weká”, ke.
Jesucristo waꞌatéjena iꞌimakáloje palá nañakaré chiyájena waꞌaté penaje yukuna marí
18 Kalúyuna inaánajlo numá: Jemaꞌá iluna jaꞌapiyá palá, ilé ke Jesucristo wátakale raꞌapiyá jemaꞌajeño laꞌaká.
19 Kalúyuna achiñánajlo numá: Iwata íkiꞌija iluna; iꞌimaniña yuriná najwaꞌaté.
20 Iyánijlo numá: Jemaꞌá ichiꞌiná jaꞌapiyá palá, ñaké laꞌakana iꞌimakale palani Tupánajlo.
21 Iká, nachiꞌinajlo numá: Iyúchaꞌataniña iyani, napechu laꞌakó piyá ujwí iliyá.
22 Ajopana waꞌaté jápajeñojlo numá: Jemaꞌá palá iwakáraꞌajeño jaꞌapiyá. Nemaká ijló nakaje laꞌakana nakú, keja ilaꞌá riká piyukeja. Apala ilaꞌá palá nejlú chu iꞌimaká ketánaja kalé, napechu iꞌimakáloje palá inaku raú. Ilaꞌá kaja riká palá, ikoja iꞌimajika ee; ilaꞌá nakaje najló palá, iweꞌepika rilaꞌakana lokópaꞌalaja, iphákale Tupana jaꞌapí.
23 Piyuke nakaje ilaꞌakare, ilaꞌá riká wechi, Jesucristo waꞌaté jápajeño iꞌimakale. Ñakele rijló japi ilaꞌá nakaje, keja ilaꞌá ijápakaꞌala ajopánajlo.
24 Iweꞌepí iwakáraꞌajeri Jesucristo aꞌajika ijló palá ilaꞌakare wemí, jeꞌechú chu iꞌimajika rijwaꞌaté wakajé, rijwaꞌaté jápajeño ke iꞌimakale.
25 Eyá puꞌuwaré laꞌajérijlo raꞌajé kaja, puꞌuwaré rilaꞌaká lokópaꞌala, riwemí.