2 TESALONICENSES
Marí purákaꞌaloji Pablo, rijwákeꞌena waꞌaté, wakaraꞌakare Jesucristo jaꞌapiyá jemaꞌajéñojlo
1
Nuká, kéchami Silvano, eyá Timoteo, kele, lanaꞌañó iká wejena, Jesucristo jaꞌapiyá jemaꞌajeño pajimila Tesalónica e iꞌimakáñojlo marí purákaꞌaloji. Waraꞌapá Tupana, wawakáraꞌajeri Jesucristo leꞌejena iká.
2 Wawata nalaꞌaká inaku palá, ikawílaꞌako piyá nakaje nakojé, iꞌimakáloje palá napalamane aú.
Palá Tupana laꞌaká neká yukuna marí
3 Nojena, inaku wemá Tupánajlo: “Palá pilaꞌaká weká, palá nemaꞌakale paꞌapiyá”, ke. Wemá inaku ilé ke, richaje, richaje ke ipechu iꞌimakale kaphí Tupana chojé. Íkiꞌija kaja iwátaka richaje ke ajopana inaꞌukena.
4 Ilé ke iꞌimakaño iꞌimakale, weꞌemá iyukuna ajopana Jesucristo jaꞌapiyá jemaꞌajéñojlo. Palá wajló iyukuna iꞌimakana najló, raꞌapiyá jemaꞌajeño iꞌimakale. Iká amaño chapú kaje yajwé meꞌetení, eꞌiyonaja re joꞌó kaja joꞌó ipechu kaphí Tupana chojé; unká ipechu laꞌaló ujwí riliyá chapú kaje yajwé amaka eꞌiyonaja.
5 Palá Tupana weꞌepika naka palani wajló, ñakele riyurí nalaꞌaká iká chapú meꞌetení. Kaja riweꞌepí re iliyá, ijñaꞌakáloje riká panaku, ripalamane aú iphákaloje jeꞌechú chojé. Rewájena wakáraꞌajeri riká. Re iꞌimajíkaño penájena iꞌimakale, amá meꞌetení chapú kaje yajwé.
6 Palá laꞌajerí Tupana iꞌimakale, riwajaje laꞌañó iká chapú meꞌetení.
7 Jesucristo witúkaꞌajika majó jeꞌechú chiyá wakajé, Tupana watánaꞌataje iká, weká waꞌató, chapú nalaꞌakare weká liyá. Rijwaꞌatéjena, jeꞌechú chiyájena, kajrú péchuruna waꞌaté, riphaje majó kajrú keraꞌathani eꞌiyowá.
8 Riwakajé riwajaje piyukeja inaꞌukena unká wátalaño rinakojé weꞌepíkana. Jesucristo palamane aú Tupana iꞌimatá inaꞌuké kapichákajo liyá, eꞌiyonaja kajrú inaꞌukena unká aꞌalaño nanakojó riyukuna. Ripaꞌajiko piño majó wakajé, riwajaje neká;
9 jukajo wani Tupana kaꞌajika riliyó neká. Ñakeja wani neꞌemajika kapichájeño penaje riliyá; unká neꞌemalaje rijwaꞌaté, unká kaja namálaje palani nakaje rilaꞌajíkare.
10 Jesucristo iphájikaja majó wakajé, palá rileꞌejena inaꞌukena puraꞌajiko rinaku, nephákale wani raꞌapí. Iká iꞌimajeño kaja najwaꞌaté, jemaꞌakale waꞌapiyá riyukuna weꞌemakare ijló iꞌimaká jaꞌapiyá.
11 Ilé ke nakaje iꞌimakáloje ijló penaje wapuraꞌó Tupana waꞌaté inaku, iꞌimakáloje kaliyáruna rijló. Ajopana inaꞌukena eꞌiyayá riꞌiwapá rijluwa iꞌimaká, iꞌimakáloje palájneꞌekena wani. Wemá kaja rijló, raꞌakáloje iñathé, ilaꞌakáloje nakaje palá ipechu nakú riꞌimaká ke, kaphí péchuruna iꞌimakale richojé, raꞌakáloje iñathé penaje.
12 Palá ilaꞌakale aú, ñaké kaja ajopana inaꞌukena pechu iꞌimajika palá wawakáraꞌajeri Jesucristo nakú. Palá kaja ripechu iꞌimajika inaku raú. Tupana, wawakáraꞌajeri Jesucristo waꞌaté, palamane aú ilaꞌano palá. Ilé kaje aú palá kaja ripechu iꞌimajika inaku.