Jesucristo paꞌajiko piño majó yukuna marí
2
Chuwa, nojena, Jesucristo paꞌajiko piño majó wakajé, wawakajo pajñakani rijwaꞌaté, raú wemá mawó ijló:
2 Ipechu kechíraꞌaniño ijló keꞌiyapé neꞌemajika aú ijló, majó ripaꞌajiko yukuna. Apala nemaje kaꞌajná ijló rinaku: “Kaja Jesucristo iphá majó”, ke.
Apú kaꞌajná kemájeri ijló rinakuwá: “Tupana wakáraꞌari nuꞌumaká ijló: ‘Kaja riphaka majó yukuna’ ”, ke.
Apú kaꞌajná wakáraꞌajeri ijló papera kaje, ipechu iꞌimakáloje wanaku: “Neká japi wakáraꞌaño wajló riká”, ke.
3 Jemaꞌaniña pajlákachina jaꞌapiyá. Yewicha Jesucristo iphájika majó piyá, kajrú inaꞌukena pechu iꞌimajika chapú wani Tupana nakú. Eꞌiyowá ke pajluwaja inaꞌuké iphájika, unká wani inaꞌukélari riꞌimajika, Tupana kapichátajikare penaje riꞌimajika.
4 Chapú wani ripechu iꞌimajika Tupana nakú, ñaké kaja ripechu iꞌimajika inaꞌuké nakiyana pechu iꞌimaño: “Wachiꞌinárikana neká”, ke, nephákarena jaꞌapí cha. Nachaje rilaꞌajika rikó. Tupana ñakaré chu riꞌimajé nawakáraꞌajeri ke, rimaje rinakuwá: “Tupana nuká”, ke.
5 Nuꞌumaká ijwaꞌaté wakajé, nuꞌumá kaja ijló riyukuna iꞌimaká. ¿Kaja chi ipechu kapicháñaa riká?
6 Kaja iweꞌepí Tupana itaká rapu, riphaka piyá unká chiyó rená iphá rijló. Puꞌuwaré laꞌakaná, meꞌechú iꞌimakare, keñoꞌó chuwa unká jemaꞌalaño Tupana jaꞌapiyajlo, eꞌiyonaja kalé Ripechu jitá rapu, riꞌimaká piyá puꞌuwaká wani meꞌetení.
7 Tupana jáchoꞌotajikaja ejaꞌawá nakiyá raꞌapiyá jemaꞌajeño, Ripechu iꞌimakárena eꞌiyá ejéchami, raꞌajiko puꞌuwaká majó, kele unká wani inaꞌukélari numakare nakú.
8 Raꞌajiko puꞌuwaká ejomi, wawakáraꞌajeri Jesucristo iphaje majó kajrú mejámaꞌatani waꞌaté. Riphájika wakajé, rikapichátaje riká unká wani inaꞌukélari. Rinuma chiyá raphoꞌojé rikaéjane rinakojé, raú ja rikapichátaje riká.
9 Jesucristo iphájika piyá majó, ilé unká wani inaꞌukélari laꞌajeri kajrú nakaje, unká méñoꞌojo ajopana laꞌalare kaje. Raú ripajlaje kajrú inaꞌukena waꞌaté, Jiñá Chiꞌinárikana aꞌajíkale riñathé rilaꞌakana aú.
10 Kajrú wani ripajlájika kapichájeño penájena iꞌimajíkaño waꞌaté. Unká wátalaño kewákaje purákaꞌaloji aꞌakana nanakojó neꞌemakale, ripajlaje najwaꞌaté. Unká naꞌalá Tupana purákaꞌalo nanakojó, neꞌemakóloje kapichákajo liyá raú.
11 Ñaké neꞌemakale, Tupana yurí neká, nemaꞌakáloje mapeja pajlakaje purákaꞌaloji jaꞌapiyá.
12 Piyuke neká, unká wátalaño kewákaje purákaꞌaloji jaꞌapiyá iꞌimakana kapichájeño, apú nakaje chaje nawátakale puꞌuwaré laꞌakaná.
13 Palá wemakano Tupánajlo inaku: “Palá pilaꞌaká neká, nemaꞌakale paꞌapiyá”, ke. Palani wajló ilé ke inaku kemakana, íkiꞌija Tupana wátakale iká. Kaja riꞌiwapá rijluwa iꞌimaká, iꞌimakáloje rileꞌejena inaꞌukena, riꞌimatákarena kapichákajo liyá ajopana tukumá.
14 Kaja weꞌemá ijló riꞌimataka inaꞌuké kapichákajo liyá yukuna. Jemaꞌakale palá raꞌapiyá, iꞌimajé wawakáraꞌajeri Jesucristo waꞌaté.
15 Ñakele, nojena, marí purákaꞌaloji numakare nakú ijló meꞌetení, wemá nakú kaja ijló iꞌimaká, weꞌemaké ijwaꞌaté wakajé. Iyuríniña raꞌapiyá jemaꞌakana; ipechu kapicháñaaniña kaja riká.
16 Eko Jesucristo, waraꞌapá Tupana waꞌaté, laꞌá palá wani iká. Íkiꞌija Tupana wátaka weká, ñakele waweꞌepí palá wani weꞌemajika rijwaꞌaté waꞌajini wani ripalamane.
17 Nuwata rilaꞌaká ipechu palá ñakeja wani, kaphí ipechu iꞌimakáloje richojé, raú ilaꞌajé piyuke nakaje palá; palá kaja ipuraꞌajiko palani purákaꞌaloji nakú pajwaꞌatéchaka.