Pablo wátari napuraꞌakó Tupana waꞌaté nanaku. Riyukuna marí
3
Kaja penaje, nojena, ipuraꞌó Tupana waꞌaté wanaku, weꞌemakáloje palá wawakáraꞌajeri Jesucristo yukuna ajopánajlo, ajopánajlo ke penaje, kiñaja riyukuna jemaꞌakóloje piyukeja inaꞌukena eꞌiyowá. Ipuraꞌó kaja rijwaꞌaté, napechu iꞌimakáloje palá riyukuna nakú, ipechu iꞌimaká rinaku ke kaja.
2 Imá kaja rijló, riꞌimatákaloje weká chapújneꞌekena inaꞌukena liyá, unká piyukeja kalé inaꞌuké pechu kaphí richojé.
3 Tupana kemaká inaku, ke rilaꞌajika iká palá, unká riyurílaje iká ikó, rilaꞌajé ipechu kaphí.
4 Palá rilaꞌaká iká, ñakele waweꞌepí palá laꞌakaná nakuja iꞌimajika, wemaká ijló iꞌimaká ke.
5 Nuwata Jesucristo aꞌaká iñathé, iweꞌepíkaloje raú íkiꞌija wani Tupana wátaka iká. Nuwata kaja raꞌaká iñathé, ripalamane jáchoꞌoko piyá raꞌapiyá jemaꞌakana chiyá, chapú nalaꞌajika iká eꞌiyonaja.
Palani inajlo jápakaje. Riyukuna marí
6 Nojena, wawakáraꞌajeri Jesucristo apumí chojé ke wemaká ijló, iꞌimaká piyá wejena nakiyana unká wátalaño jápakaje, eyá unká kaja wátalaño purákaꞌaloji, wewíñaꞌatakare iꞌimaká nakú aꞌakana nanakojó waꞌaté.
7 Kaja iweꞌepí jápakaje nakojé, wamátakale iꞌimaká raú. Unká weꞌemaké ijwaꞌaté mapeja, jápakaje nakuja weꞌemajíkale.
8 Unká wakejáꞌake iliyá aꞌajnejí mapeja. Aꞌajnejí, aꞌajíkare wajló iꞌimaká, waꞌaké wemí ijló. Weꞌechú, lapejé waꞌató wajápake, ikaꞌaká piyá iliñérute nakiyana aꞌajnejí wemí wajló.
9 Kajrú waꞌajika iñathé mapeja iꞌimaká. Wawátakela, wemajla ijló iꞌimaká, aꞌakáloje wañathé nakaje aú mapeja, eꞌiyonaja unká wawátala ilé ke laꞌakana ijwaꞌaté. Wajapa iꞌimaká, ñaké kaja ijápakaloje wamájemi penaje.
10 Weꞌemaké ijwaꞌaté wakajé, wemá ijló iꞌimaká: “Unká wátalaje jápakaje, unká kaja ajñálaje raꞌajnewá”, ke.
11 Eꞌiyonaja kalé wemaꞌá nemaká eꞌiyowá iꞌimakaño nakú: “Ijnú wani najápaka; kajrú najápaka unká na kalé laꞌakana nakú”.
12 Ilé ke iꞌimakaño wawakáraꞌa Jesucristo apumí chojé ke, najápakaloje manaꞌija, neꞌemajowa iꞌimakáloje palá najló.
13 Nojena, jayaꞌaniño palá laꞌakaná nakú.
14 Unkájika ee pajluwaja inakiyana aꞌá marí wapurákaꞌalo rinakojó, iꞌimaniña rawaꞌá, rapáñaꞌakoloje raú penaje.
15 Ipechu iꞌimaniña chapú rinaku, inakiyana joꞌó riꞌimakale. Ilaꞌá renakú.
Kaja penaje Pablo kemakare nakú najló marí
16 Palá iná pechu laꞌajerí Jesucristo. Nuwata rilaꞌaká ipechu palá, iꞌimakáloje kaja keja palá péchuruna penaje. Eko riꞌimá ijwaꞌaté piyukeja.
17 Nulanaꞌá marí kaja penaje nokoja nuyátheꞌela aú. Kaja ke waja nulanaꞌaká nuiwá Pablo, ke kaja penaje.
18 Nuwata wawakáraꞌajeri wani Jesucristo laꞌaká iká palá piyukeja.
Kaja.