4 Nojena, kaja iweꞌepí mékeka ripaꞌajiko majó, unká raꞌalá wajló renó. Manaꞌí chiyó riphájika ee, unká rikeroꞌótalaje ijló, piroꞌokeji keroꞌótaka inajlo iná nane jataꞌakana aú ke kaja.

5 Jesucristo waꞌatéjena iká, ñakele iweꞌepí palá kewákaje purákaꞌaloji nakojé. Unká mapechúruna iꞌimaká ke iꞌimakaño kalé iká; unká mapechúruna weꞌepila kewákaje purákaꞌaloji nakojé.

6 Ñakele unká weꞌemalaje chuwa kamátakajo nakú iꞌimakaño ke. Unká weꞌepílaño kewákaje purákaꞌaloji nakojé iꞌimaño kamátakajo nakú iꞌimakaño ke; palá weká weꞌepika rinakojé, ñakele kajmuruna ke weká.

7 Lapí inaꞌuké kamato, ñaké kaja neꞌiyajena yuwéraꞌako lapí.

8 Eyá weká, weꞌechú japi keja iꞌimakaño, ñakele weꞌejnataje wapéchuwa palá. Wapechu iꞌimachi kaphí Tupana chojé, wawátakaloje íkiꞌija riká, ajopana inaꞌukena waꞌaté, raú wamejñátakaloje wekó Jiñá Chiꞌinárikana liyá. Suráanajlo neꞌekú mejñátajona iꞌimaká, ke kaja Jesucristo raꞌapiyá jemaꞌajéñojlo. Tupana iꞌimatari kapichákajo liyá kaphí Jesucristo chojé péchuruna. Newílaꞌaru mejñátajona iꞌimaká suráanajlo, ke kaja Jesucristo raꞌapiyá jemaꞌajéñojlo.

9 Unká riwajákaloje weká penaje kalé Tupana iꞌiwapá weꞌemaká rijluwa ajopana inaꞌukena eꞌiyayá; riꞌiwapá weꞌemaká neꞌiyayá, Jesucristo iꞌimatákaloje weká kapichákajo liyá penaje.

10 Riká takaꞌarí wachaya iꞌimaká, weꞌemakáloje rijwaꞌaté matajnako. Kajmuruna joꞌó kaꞌajná weꞌemajika, kaja kaꞌajná watakaꞌajé, majó riphájika piño wakajé. Eꞌiyonaja unká meke riꞌimalaje rijló, riphájika ejomi weꞌemajíkale piyukeja kajmuruna ke waja piyuke rijwaꞌaté, reyá aꞌajná ñoꞌojó.

11 Ñakele ilaꞌá papechúkaka kaphí ripé marí purákaꞌaloji aú, meꞌetení ilaꞌaká ke kaja.

12 Nojena, re inaꞌuké eꞌiyá jewíñaꞌataño iká Tupana purákaꞌalo nakú, re kaja amájeño. Neká laꞌañó jenakú Ripurákaꞌalo aú, ñakele iphá naꞌapí.

13 Ipechu iꞌimá kaja palá amájeño nakú. Iwata neká íkiꞌija, nalaꞌakale najápakaꞌala Tupana kemaká najló iꞌimaká ke. Iꞌimá kaja palá pajwaꞌatéchaka.

14 Akhaꞌá unká wátalajeño jápakaje, ijnuruna neꞌemakale. Ipuraꞌó kaja ujwí péchuruna iꞌimajíkaño waꞌaté, napechu laꞌakóloje palá raú. Unká weꞌepílajeño palá Tupana purákaꞌalo nakojé ñathé aꞌajé, naweꞌepíkaloje richaje, richaje ke rinakojé. Amá palá piyukeja inaꞌuké; iyúchaꞌaniño nachá, unkájika ee nalaꞌá richuwaja Tupana wátaka ke.

15 Ajopana inaꞌuké laꞌajika ee kaꞌajná iká chapú, ipuraꞌaniño ileꞌejé jakumi nakú ñaké kaja nalaꞌakana aú. Lanakiya ilaꞌajé palá pekowáaka; ilaꞌajé kaja piyukeja inaꞌukena nakú palá.

16 Ñakeja ipechu iꞌimaká puꞌují.

17 Ipuraꞌó kaja methú ke Tupana waꞌaté.

18 Imá rijló: “Palá pilaꞌaká nuká”, ke, palá iꞌimajika wakajé; imá kaja rijló: “Palá pilaꞌaká nuká”, ke, chapú kaje yajwé amájika wakajé. Ilé ke riwátaka Jesucristo jaꞌapiyá jemaꞌajeño kemaká rijló.

19 Tupana Pechu wátari iwakáraꞌajeri iꞌimakana, ñakele jemaꞌá raꞌapiyá, rilaꞌakó piyá ujwí iwakáraꞌakana nakú.

20 Tupana jaꞌapiyá ke inakiyana jaꞌapátaka Ripurákaꞌalo ijló; ipechu iꞌimaniña Ripurákaꞌalo nakú: “Unká na penaje kalé riká”, ke.

21 Iweꞌepí palá piyukeja purákaꞌaloji nakojé, iweꞌepíkaloje kewaka kaꞌajná riká, pajlakaje kaꞌajná. Iꞌiraó kewákaje purákaꞌaloji nakojeja.

22 Iwátaniña wani puꞌuwaré laꞌakana, imanáicho kaje laꞌakana.

23 Nuwata Tupana laꞌaká ipechu palá, ikawílaꞌako piyá nakaje nakú; nuwata kaja rilaꞌaká inaku palá, raú iꞌimakáloje rileꞌejena wani inaꞌukena. Iyurí ichó rijló, raú raꞌakáloje rinakojó iká. Raú ipechu nakú nakaje, riwátakare laꞌakana waja, iꞌimajeri. Ilaꞌaniña puꞌuwaré, iꞌimakáloje palá laꞌajeñó rijló raú.

24 Tupana aꞌarí iká rijwaꞌatéjenawa penaje. Rikaja kaja laꞌajeri ijló nakaje rimaká inaku iꞌimaká ke.

25 Nojena, eko ipuraꞌó Tupana waꞌaté wanaku.

26 Eko palá piyukeja wejena ilérowa iꞌimakáñojlo kaꞌajnó.

27 Eko ipuraꞌó marí purákaꞌaloji waꞌaté piyuke Jesucristo jaꞌapiyá jemaꞌajéñojlo. Jesucristo apumí chojé ke numaká ijló rinaku, ilaꞌakáloje ñaké.

28 Nuwata wawakáraꞌajeri wani Jesucristo laꞌaká inaku palá wani.