2 Kaja iweꞌepí nakaje, wemakare nakú ijló iꞌimaká, nakojé. Jesucristo wakáraꞌaka wemaká ijló rinaku iꞌimaká, ke wemaká ijló iꞌimaká.

3 Unká Tupana wátala ilaꞌaká puꞌuwaré, ñakele iꞌimá palá laꞌakaná nakuja. Unká kaja riwátala ilaꞌaká imanáicho ajopana waꞌaté.

4 Achiñánajlo numá: Iꞌimá palá iluna waꞌaté, Tupana wátaka iná iꞌimaká pajwaꞌatéchaka ke. Iphá naꞌapí.

5 Unká paala iweꞌepika itukumó inaana waꞌaté laꞌakanaja kalé. Unká jemaꞌalaño Tupana jaꞌapiyaja kalé weꞌepiño ilé kaje laꞌakana natukumó. Ilaꞌaniña ñaké.

6 Eyá laꞌarí rimanáicho apú yajalo waꞌaté, laꞌarí riká chapú wani raú. Kajrú Tupana wajájika namanáicho laꞌajeñó, kaja wemá ijló ñaké rinaku iꞌimaká.

7 Tupana iꞌiwapari weká ajopana inaꞌukena eꞌiyayá, weꞌemakáloje palá laꞌajeñó penaje.

8 Ñaké riká, unká wátala nakaje numakare nakú ijló jemaꞌakana, unká kaja iphala noꞌopí. Raú unká kaja riphala Tupana, aꞌarí ijló Ripechu iꞌimaká, jaꞌapí.

9 Nuweꞌepí íkiꞌija iwátaka pekowáaka, ñakele unká naje kalé numá ijló ñaké laꞌakana nakú; kaja Tupana jewíñaꞌata iꞌimaká íkiꞌija pekowáaka wátakana nakú.

10 Ñaké laꞌakaño iká, Macedonia teꞌeré ewá iꞌimakaño, eꞌiyonaja kalé, nojena, numá piño ijló, iwátakaloje pekowáaka íkiꞌija richaje, richájeno ke.

11 Iweꞌepí itukumó palá pajwaꞌatéchaka iꞌimakana; ijapa palá ijluwa, ikawílaꞌaka piyá ajopana inaꞌukena nakú; ilaꞌá ijápakaꞌala, wemaká ijló rinaku iꞌimaká ke.

12 Ilé ke laꞌakana aú ajopana, unká Jesucristo jaꞌapiyá jemaꞌajeño nakiyana kalé iꞌimakaño, pechu iꞌimajé palá inaku. Ijápajika numaká ijló iꞌimaká ke ee, unká na nakú kalé ilaꞌalaje kamuꞌují. Unká kaja ikawílaꞌalaje ajopana nakú nakaje chaya.

13 Nojena, wawata iweꞌepika Jesucristo jaꞌapiyá jemaꞌajeño michuna kaja takaꞌakaño nakojé, ipechu iꞌimaká piyá kamuꞌují wani naweꞌepíkana aú. Unká jemaꞌalaño Tupana jaꞌapiyá, unká weꞌepila mékeka nakaje iꞌimajika najló, raú napechu laꞌó kamuꞌují wani inaꞌuké kaja takaꞌakaño waꞌaté.

14 Marí ejaꞌawá chu Jesucristo iꞌimaká wakajé ritakaꞌá iꞌimaká. Rejomi rimakápoꞌo piño rapumí chuwá, raú waweꞌepí Tupana makápoꞌotajika kaja piyuke kaphí Jesucristo chojé péchuruna penájemina michuna.

15 Nakaje wawakáraꞌajeri Jesucristo jewíñaꞌatakare nakú iꞌimaká, wemá nakú ijló. Ripaꞌajiko majó wakajé, weká kajmuruna joꞌó iꞌimakaño, unká jáchoꞌolajeño paineko kaja takaꞌakaño tukumá.

16 Tupana waꞌatéjeri, jeꞌechú chiyájena wakáraꞌajeri, awíyoꞌojeri najló. Tupana leꞌejé luwiluwí kaje mejé jemaꞌajero, waꞌató ke wawakáraꞌajeri wani witúkaꞌajika jeꞌechú chiyá majó. Rejéchami raꞌapiyá jemaꞌajeño michuna makápoꞌojiko.

17 Rejomi kajmuruna joꞌó iꞌimajíkaño nawáꞌaje ají ke yenoje, kaja takaꞌakaño penájemina waꞌaté, Jesucristo jimaje nephákaꞌakajo juni juwákaꞌala eꞌiyajé najwaꞌaté. Rejéchami weꞌemajika rijwaꞌaté matajnako jeꞌechú chu.

18 Ilé kaje yukuna iꞌimá pajlokaka, ipechu iꞌimakáloje kaphí raú.