3
1-2 Wawátajla ichaje iꞌijnakana. Unkale meke laꞌajé wajñaꞌalá panaku amákana, unká kaja waweꞌepílale iyukuna, raú wawakáraꞌa ilé ñoꞌojó ichaje weꞌewé Timoteo. Weká yuréjeño wekoja maare Atenas e. Palá Timoteo jaꞌapátaka Jesucristo iꞌimataka iná kapichákajo liyá yukuna wajwaꞌaté. Riká wawakáraꞌa iꞌijnaká ichaje kaꞌajnó, raꞌakáloje iñathé, ipechu iꞌimakáloje richaje ke kaphí Jesucristo chojé, ipechu iꞌimaká piyá ujwí raꞌapiyá jemaꞌakana nakú.
3 Apala inakiyana wátaño raꞌapiyá jemaꞌakana yuríkana naliyó, neꞌiyajena laꞌakale chapú iká. Kaja iweꞌepí Tupana wátaka wajñaꞌaká chapú kaje panaku.
4 Weꞌemaké ijwaꞌaté wakajé, wemá ijló iꞌimaká: “Re neꞌiyajena laꞌajeño iká chapú, jemaꞌakale Jesucristo jaꞌapiyá”. Wemaká ijló iꞌimaká, ke nalaꞌaká iká meꞌetení.
5 Kaja nomaꞌá riyukuna, raú nukawílaꞌo inakojé. Raú numá Timotéojlo, riꞌijnakáloje kaꞌajnó ichaje, riweꞌepíkaloje mékeka ipechu Jesucristo nakú, nupechu iꞌimakale inaku: “Apala Jiñá Chiꞌinárikana kaꞌátari neꞌiyajé, nayuríkaloje Jesucristo jaꞌapiyá jemaꞌakana penaje. Ilé ke riꞌimajika ee ijló, unká na penaje nakaje wewíñaꞌatakare iꞌimaká iꞌimalaje ijló”, ke nupechu iꞌimaká inaku.
6 Kaja Timoteo paꞌó piño majó, rapumí chuwá pajimila Tesalónica eyá. Palani yuku waꞌaté riphá majó wanaku, rimá wajló inaku: “Re joꞌó kaja joꞌó kaphí napechu Jesucristo chojé. Íkiꞌija joꞌó kaja nawátaka Tupana, ñaké kaja nawátaka ajopana inaꞌukena. Re joꞌó kaja naweꞌepika iká; puꞌují joꞌó kaja napechu inaku. Nawata wani amákana piño, iwátaka namákana ke kaja”, ke rimaká wajló inaku.
7 Wejena, kajrú wamaka chapú kaje yajwé maare. Ilé ke rimaká aú wajló inaku: “Re joꞌó kaja joꞌó kaphí napechu Jesucristo chojé”, ke, raú palá wani wapechu laꞌakó piño.
8 Chuwa, kaja palá weká maare, waweꞌepíkale unká iyurila iliyó Jesucristo jaꞌapiyá jemaꞌakana.
9 Ilé ke iꞌimakale, wemá Tupánajlo: “Puꞌují wani wapechu pinaku, nemaꞌakale palá joꞌó paꞌapiyá”, ke. Puꞌují kaja wapechu inaku.
10 Kajrú wapuraꞌakono Tupana waꞌaté inaku; mawó kaja wemaká rijló, weꞌejnakáloje ichaje penaje. Ñakele nuwata re joꞌó kaja iñathé aꞌakana nupurákaꞌalo aú, iweꞌepíkaloje richaje palá wani raꞌapiyá jemaꞌakana nakojé.
11 Wawata waraꞌapá Tupana, wawakáraꞌajeri Jesucristo waꞌaté, aꞌaká wañathé ichaje iꞌijnakana aú.
12 Wawata kaja wawakáraꞌajeri aꞌaká iñathé, iwátakaloje raú íkiꞌija pekowáaka, ajopana inaꞌukena waꞌaté. Íkiꞌija kaja weká wátaka iká. Raú wawata ñaké kaja iwátaka pekowáaka.
13 Nuwata waraꞌapá Tupana laꞌaká ipechu kaphí, raꞌapátakaloje iliyá puꞌuwaré laꞌakaná, raú unká kaja na aú rimalaje meke inaku Jesucristo paꞌajiko piño majó wakajé, ajopana rileꞌejena inaꞌukena waꞌaté. Ñaké riꞌimajika.