Nakaje Pablo laꞌakare Tesalónica e yukuna marí
2
Nojena, kaja iweꞌepí weꞌemaké ijwaꞌaté wakajé, unká mapeja kalé weꞌemajika ijwaꞌaté iꞌimajika.
2 Iweꞌepí kaja mékeka nalaꞌaká weꞌemaká chapú wani pajimila Filipos e, weꞌejnaká ichaje Tesalónica ejo iꞌimaká yámona. Puꞌuwaré wani kaja napuraꞌakó wanaku re weꞌemaké wakajé. Reyá weꞌejná ichaje. Kajrú wani Tupana aꞌaká wañathé, weꞌemakáloje ijló riꞌimataka iná kapichákajo liyá yukuna. Riyukuna weꞌemá ijló, Tupana laꞌakale kaphí wapechu. Neꞌiyajena unká wani wátalaño weꞌemaká riyukuna ijló iꞌimaká, eꞌiyonaja kalé weꞌemá riyukuna ijló.
3 Kewaka nakaje wemakare nakú inaꞌukejlo, unká pajlakaje kalé wapurákaꞌalo. Unká wajló riꞌimakáloje palá penaje kalé weꞌemá riyukuna; unká kaja weꞌemalá riyukuna ijló, wapajlákaloje ijwaꞌaté raú.
4 Tupana kemari wanaku: “Palani neká, nuyukuna iꞌimajeño penaje”, raú riwakáraꞌa weꞌemaká riyukuna ajopánajlo. Riwátaka ke, weꞌemaká riyukuna ñakeja, unká wemalá nakaje nakú mapeja, inaꞌuké pechu iꞌimakáloje palá wanaku raú. Walaꞌá nakaje, riꞌimakáloje palá Tupana nakú. Iná pechu palaꞌatájeri wani riká.
5-7 Kaja iweꞌepí palá, unká wemalá inaku mapeja: “Palá iꞌimakaño neká”, ke, ipechu iꞌimakáloje puꞌují wanaku raú. Unká wawátala ipuraꞌakó wanaku palá mapeja; ñaké kaja unká wawátala ajopana inaꞌukena puraꞌakó wanaku palá mapeja. Unká ilé kaje penaje kalé weꞌemá riyukuna ijló iꞌimaká; unká kaja aꞌakáloje wajló liñeru penaje kalé weꞌemá ijló riyukuna. Jesucristo wakáraꞌakarena nakiyana weká, ñakele wawátakela, wawakáraꞌajla ilaꞌaká nakaje wajló weꞌemaké ijwaꞌaté wakajé, eꞌiyonaja unká wawakáraꞌala ilaꞌaká na wajló. Tupana weꞌepiri kewaka ilé numakare nakú.
Unká yuriná kalé weꞌemaká ijwaꞌaté. Yuwaná jaló lamáraꞌaka ruyani, keja weꞌemaká ijwaꞌaté.
8 Wawajwena kaja iká; khaí wani waweꞌepika inaku. Weꞌemá ijló Tupana purákaꞌalo yukuna, íkiꞌija wawátakarena iꞌimakale. Raú kalé waweꞌepí palá nakaje laꞌakana watukumó, riꞌimakáloje palá ijló penaje. Wawátajla kaja ichaya takaꞌakana, ñaké laꞌakana iꞌimakela palani ijló.
9 Nojena, iweꞌepí wajápajika kaphí wani weꞌemaké ijwaꞌaté wakajé, wawarúwaꞌakaloje wajluwa aꞌajnejí, aꞌarumakaji, kaje maká penaje. Weꞌechú, eyá laínchu lapejé waꞌató, wajápake, wakawílaꞌaka piyá inaku; unká wawátala iliyá nakaje kejáꞌakana iꞌimaká. Tupana purákaꞌalo yukuna weꞌemakáloje ijló penájeja kalé weꞌemaké ijwaꞌaté.
10 Kaja iweꞌepí kewaka piyukeja numakare nakú; Tupana weꞌepiri kaja kewaka riká. Iká, Jesucristo jaꞌapiyá jemaꞌajeño, weꞌepiño mékajenaka weká. Palá laꞌakaño weká, Tupana wátaka ke laꞌakaño. Unká na kalé walaꞌá puꞌuwaré ilérowa weꞌemaké ijwaꞌaté wakajé.
11 Iweꞌepí kaja mékeka wapuraꞌajiko ijwaꞌaté pajluwano, pajluwano ke, kaphí ipechu iꞌimakáloje Jesucristo chojé penaje. Yuwaná jaraꞌapá puraꞌakó riyani waꞌaté, ke kaja wapuraꞌajiko ijwaꞌaté rinaku iꞌimaká.
12 Wawakáraꞌa ilaꞌaká piyuke nakaje palá, Tupana wátaka ke. Palá waja Tupana leꞌejena inaꞌukena laꞌaká nakaje riwátaka ke. Riká iꞌiwapari iká ajopana inaꞌukena eꞌiyayá rijluwa, ripalamane iꞌimakáloje rijwaꞌaté jeꞌechú chu. Rewá iꞌimakaño wakáraꞌajeri riká.
13 Palani ijló Tupana purákaꞌalo, weꞌemakare ijló yukuna iꞌimaká, raú ipechu iꞌimá rinaku: “Unká inaꞌuké purákaꞌalo kalé riká; Tupana purákaꞌalo riká”. Ñaké riꞌimaká. Ripurákaꞌalo aú Tupana apiyaka raꞌapiyá jemaꞌajeño pechu, napechu iꞌimakáloje palá raú penaje. Ñaké iꞌimakale, weꞌemá Tupánajlo palá rilaꞌakare weká yukuna.
14 Re kaja Judea teꞌeré ewá kajrú Jesucristo jaꞌapiyá jemaꞌajeño. Ilé ke iꞌimakaño neꞌemakale, judíona nakiyana laꞌañó chapú wani neká. Ñaké kaja iñakajela ewájena laꞌaká iká chapú, raꞌapiyá jemaꞌajeño iꞌimakale.
15 Neká, judíona nakiyana, noño júpimi Tupana purákaꞌalo jaꞌapátajeño michuna iꞌimaká. Ñaké kaja nawakáraꞌaka Jesucristo nókana iꞌimaká, eyá chuwa, weká piño nalaꞌá chapú wani. Unká wani inaꞌukélaruna neká Tupánajlo; chapú wani kaja napechu piyukeja inaꞌukena nakú.
16 Marí kaje aú nalaꞌá piño chapú wani najluwa. Wawátajla Tupana purákaꞌalo yukuna iꞌimakana ajopana, unká judíona kalé iꞌimakáñojlo, ripalamane aú neꞌemakóloje kapichákajo liyá raꞌapiyá jemaꞌakana aú, eꞌiyonaja nawata wapu itakana, weꞌemaká piyá riyukuna najló. Ilé ke nalaꞌaká aú weká, richaje wani nalaꞌaká puꞌuwaré. Ilé kaje pachá kajrú wani Tupana wajájika neká.
Pablo wátaka nachaje iꞌijnakana yukuna marí
17 Nojena, kaja waꞌapáñaa iꞌimaká, ñakele unká wamálaje piño iká júpija. Eꞌiyonaja kalé re joꞌó kaja joꞌó kajrú wapechu inaku, raú wawata ichaje iꞌijnakana piño.
18 Pulapé nuká wátaka ichaje iꞌijnakana, eꞌiyonaja kalé Jiñá Chiꞌinárikana itari wapu paliyáaka.
19 Jesucristo paꞌajiko majó wakajé, puꞌují nupechu iꞌimajika, iká jemaꞌakale Tupana jaꞌapiyá, nuꞌumakale ijló riyukuna iꞌimaká.
20 Riká laꞌarí palá wapechu inaku, jemaꞌakale raꞌapiyá, ñakele puꞌují wapechu.