6
Yuwanajlo numá: Jemaꞌá ichiꞌiná jaꞌapiyá, ilé ke laꞌakana iꞌimakale palani Tupánajlo.
2-3 Tupana kemari iyamá théꞌela kele nakaje laꞌakana nakú, Moisés lanaꞌakare raꞌapiyá iꞌimaká, inaꞌuké iꞌimakáloje palá raꞌapiyá penaje. Ripurákaꞌalo nakiyana kemari yuwanajlo: “Iphá ichiꞌiná jaꞌapí”, ke. Najloja kalé raruká júpija ejaꞌawá chu iꞌimakana, raꞌapiyá jemaꞌakana aú. a
4 Iká nachiꞌinajlo numá: Iyúchaꞌataniña iyani; ilaꞌá nenakú palá; jewíñaꞌata neká palá nakaje Tupana wátakare kaje nakú.
5 Ajopana waꞌaté jápajeñojlo numá: Jemaꞌá palá wakáraꞌaño iká jápakaje nakú jaꞌapiyá; iphá kaja naꞌapí. Ilaꞌá ijápakaꞌala palá, iweꞌepika rilaꞌakana nakojé lokópaꞌala. Jesucristo waꞌaté jápajeño iꞌimakaño, ke kaja ijápaka najwaꞌaté.
6 Apala nayakáꞌako ichaje ketánaja kaꞌajná ilaꞌaká ijápakaꞌala palá, napechu iꞌimakáloje palá inaku raú penaje. Ilaꞌá ñakeja palá ijápakaꞌala, unká namala iká eꞌiyonaja. Jesucristo waꞌatéjena iká, ñakele rijló keja ilaꞌaká piyuke nakaje. Ipechu iꞌimá palá ijápakaꞌala laꞌakana nakú, Tupana wátaka ke.
7 Puꞌují ipechu ke, ilaꞌaká ijápakaꞌala, Tupánajlo ke ijápaka, unká apú waꞌatejlo kalé. Rijwaꞌaté jápajeño ke kaja iká, ijápaka aú ajopana waꞌaté.
8 Iweꞌepí marí: Tupana aꞌajeri inaꞌukejlo palá nalaꞌakare lokoꞌopáneje riwemí. Ñaké kaja raꞌajika iká, mawemíwaka jápakaño ajopana waꞌatejlo, eyá iká jápaño ijluwa, riwemí.
9 Eyá aꞌañó ajopánajlo jápakaje, najló numá: Ilaꞌá ñaké kaja palá ijwaꞌaté jápajeño nakú. Iwakáraꞌaniña najápaka tejmuji wani aú; iweꞌepí re kaja ijápakaꞌala minárikana jeꞌechú chu. Rejenowaja iká Tupánajlo, ijwaꞌaté jápajeño waꞌaté.
Iná jemaꞌaká piyá Jiñá Chiꞌinárikana jaꞌapiyá yukuna marí
10 Chuwa nojena, ilaꞌá kaphí ipéchuwa wawakáraꞌajeri Jesucristo chojé. Cháꞌatajeri wani riká.
11 Re suráanajlo lekareji, namejñátakaloje nekó napinana liyá, nacháꞌatakaloje neká raú. Ñaké kaja imejñata ikó piyukeja Tupana yuríkare ijló aú, Jiñá Chiꞌinárikana cháꞌataka piyá iká ripajlákaꞌala aú.
12 Unká inaꞌuké, marí ejaꞌawá chu iꞌimakaño waꞌaté, kalé walaꞌá pinakaji. Walaꞌá pinakaji jiñana wakáraꞌajeño, unká iná amálarena, yenuwa iꞌimakaño waꞌaté. Neká wátaño wacháꞌatakana. Neká wakáraꞌaño inaꞌuké, weꞌiyá iꞌimakaño, laꞌaká puꞌuwaré wani marí ejaꞌawá chu.
13 Ñakele aꞌá inakojó piyukeja Tupana yuríkare ijló iꞌimaká, raú imejñátakaloje ikó Jiñá Chiꞌinárikana waꞌatéjena liyá, chapú kaje iꞌimajika ijló wakajé. Kaphí Tupana chojé iꞌimakana aú, icháꞌataje Jiñá Chiꞌinárikana waꞌatéjena.
14 Suráana aꞌañó kaja nanakuwá nawachaphila, namejñátajona penaje. Ke kaja ijló kewákaje purákaꞌaloji chuwá iꞌimakana aú, imejñátakaloje ikó Jiñá Chiꞌinárikana chapujré liyá. Suráana aꞌañó pejruꞌuwá melanani, neꞌekú pajré mejñátajona penaje. Ke kaja ijló kaphí ipechu iꞌimakana aú Jesucristo chojé, ilaꞌakáloje piyukeja palá, raú icháꞌataje Jiñá Chiꞌinárikana.
15 Suráana aꞌañó kaja neꞌemaꞌulá, neꞌejnakáloje nókajo richu penaje. Ke kaja ilamáꞌata ikó, iꞌijnakáloje Jesucristo yukuna iꞌimajé ajopánajlo, raú napechu palaꞌakóloje Tupana waꞌaté.
16 Ipechu iꞌimá kaphí Tupana chojé, piyuke Jiñá Chiꞌinárikana leꞌejé chapú kaje cháꞌataka piyá iká. Iná pechu iꞌimakachu kaphí richojé, jemú mejñátaka suráana napinana lekare liyá, ke kaja riká.
17 Re kaja suráana wílaꞌaru mejñátajona, ijijila mujlúkaꞌaka piyá pewílaꞌaruya. Ke kaja Jesucristo wajló, riꞌimatákale weká kapichákajo liyá. Suráana noño napinana nakiyana najoꞌojowa aú, ke kaja Tupana purákaꞌalo lanaꞌakéjami, Ripechu laꞌakare puꞌuwaká wajló. Ilé ke wajló lekareji Tupana aꞌakare.
18 Iyuríniña Tupana waꞌaté puraꞌakano iliyó; ikejaꞌa nakaje riliyá, Ripechu kemaká ijló ke. Iꞌimá kaja kapechúruna rijwaꞌaté puraꞌakano aú; ilaꞌaniño ujwí rijwaꞌaté puraꞌakano liyá. Ipuraꞌó rijwaꞌaté rileꞌejena inaꞌukena nakú.
19 Ipuraꞌó kaja rijwaꞌaté nunaku, raꞌakáloje nuñathé nuꞌumajika kewá riyukuna ajopánajlo. Ipuraꞌó kaja nunaku, kaphí nupechu iꞌimakáloje riyukuna iꞌimakana nakú, riyukuna jemaꞌajeño weꞌepíkaloje riꞌimataka iná kapichákajo liyá yukuna nakojé raú. Meꞌechuje riyukuna weꞌepíkana iꞌimaká inaꞌukejlo júpimi iꞌimaká.
20 Tupana wakáraꞌari nuká, nuꞌumakáloje riyukuna ajopánajlo; riyukuna iꞌimakana chona maare nuká inaꞌuké wajákelana chu meꞌetení. Ipuraꞌó kaja rijwaꞌaté nunaku, nukeroꞌokó piyá riyukuna iꞌimakana najló, riwátaka ke.
Kaja penaje Pablo kemakare nakú najló marí
21 Tíquico, palá wani nupechu iꞌimakare nakú, kemájeri ijló nunaku mékeka nuká maare, na nakú nuká. Palá raꞌaká nuñathé Tupana jápakaꞌala laꞌakana aú.
22 Rimakáloje ijló mékeka weká maárowa penaje nuwakáraꞌaje riká ichaje, rilaꞌakáloje palá ipechu raú penaje.
23 Nuwata Jesucristo, raraꞌapá Tupana waꞌaté, laꞌaká palá ipechu, ikawílaꞌako piyá nakaje nakú. Nuwata kaja iwátaka íkiꞌija pekowáaka, waꞌaté ipechu iꞌimaká kaphí Tupana chojé.
24 Nuwata rilaꞌaká inaku palá; nuwata kaja rilaꞌaká palá piyuke neká, unká yurílaño naliyó Jesucristo wátakana íkiꞌija. Ilé ke nuwátaka riꞌimaká ijló.
Kaja.