Marí ke Tupana jaꞌapiyá jemaꞌajeño iꞌimaká pajwaꞌatéchaka
5
Kaja Tupana yaní nakiyana iká, íkiꞌija riwátakarena iꞌimakale, ñakele ilaꞌá palá nakaje, rilaꞌaká ke kaja.
2 Iwata íkiꞌija piyukeja inaꞌuké, Jesucristo wátaka weká ke kaja. Íkiꞌija riwátakale weká, raꞌá rikó wapumí chojé takaꞌakájejlo wachaya iꞌimaká. Palá Tupana nakú ilé ke rilaꞌakana iꞌimaká.
3 Kaja Tupana leꞌejena inaꞌukena iká. Ñakele iꞌimá palá pajwaꞌatéchaka, yuku iꞌimaká piyá ilérowa inaku: “Nanakiyana laꞌañó namanáicho pajwaꞌatéchaka; kanakújeꞌekena kaja neká”, ke. Ilaꞌá palá, nemaká piyá ilé ke inaku.
4 Ipuraꞌaniño mapeja puꞌuwareni purákaꞌaloji nakú pajwaꞌatéchaka; ipuraꞌó pajwaꞌatéchaka, palá Tupana laꞌakare iká nakú.
5 Iweꞌepí marí nakojé: Laꞌañó namanáicho, eyá wátaño kajrú nakaje marí ejaꞌawá chu iꞌimakare najluwa, unká wani iꞌimalájeño Jesucristo, Tupana waꞌaté, jeꞌechú chu. Re iꞌimakaño wakáraꞌajeño neká.
6 Jemaꞌaniña pajlákachina purákaꞌalo jaꞌapiyá. Tupana wajájikarena neká, unká pachá nemaꞌalá raꞌapiyá.
7 Ilaꞌaniña puꞌuwaré najwaꞌaté.
8 Unká chiyó jemaꞌá Jesucristo jaꞌapiyá iꞌimaká, kalajeruni chu iꞌimakaño ke iꞌimajika. Eyá chuwa, jemaꞌakale Jesucristo jaꞌapiyá, mejámaꞌatani chu iꞌimakaño ke iká. Ñakele ilaꞌá palá, iꞌimakale pajluwaja keja Jesucristo waꞌaté.
9 Tupana jaꞌapiyá iꞌimakana aú iná laꞌá palá. Ripurákaꞌalo kewaka iꞌimakare kemaká ke, ilaꞌaká palá nakaje.
10 Ñakeja iꞌijnataka ipéchuwa nakaje, Tupana wátakare ilaꞌaká, nakú; ilaꞌachí riká riwátaka ke.
11 Ilaꞌaniña nakaje puꞌuwaré laꞌajeñó laꞌaká ke kaja, unká na penaje nakaje nalaꞌakare iꞌimakale. Imá najló mékeka Tupana kemaká nakaje puꞌuwaré nalaꞌakare nakú, naweꞌepíkaloje rinakojé raú.
12 Puꞌuwaré wani nalaꞌaká nakaje, meꞌechú neꞌemaká ewá. Iná apáñaꞌo wani riyukuna iꞌimakana jaꞌapí, puꞌuwaré wani riꞌimakale.
13 Kewákaje purákaꞌaloji nakojé weꞌepíkana aú iná weꞌepí puꞌuwaré iná laꞌakare nakojé.
14 Laꞌarí puꞌuwaká wajló nakaje walaꞌakare, iꞌimari wajló mejámaꞌatani ke, ñakele nemá nakú:
“Papó, piká kamátakajo nakú iꞌimaká.
Páchoꞌo kaja takaꞌakaño eꞌiyayá, Jesucristo aꞌakáloje pijló weꞌepíkaje, piweꞌepíkaloje kewákaje purákaꞌaloji nakojé raú”, ke nemaká.
15 Ñaké iꞌimakale, iká Jesucristo jaꞌapiyá jemaꞌajeño, aꞌá inakojó ikó, iꞌimaká piyá puꞌuwaré laꞌajeñó. Iꞌimaniña mapechúruna; iꞌimá kapechúruna.
16 Iꞌimá palá laꞌakaná nakú, kajrú puꞌuwaré laꞌajeñó iꞌimakale eꞌiyowá.
17 Ilaꞌaniña nakaje mapechúwaka; iꞌimá kapechúruna, iweꞌepíkaloje raú naka Tupana wátaka ilaꞌaká nakojé.
18 Iyuwéraꞌaniño. Yuwéraꞌakajo pachá iná laꞌá kajrú nakaje puꞌuwaré mapeja, mapechúwaka. Lanakiya iyurí ichó Tupana Péchujlo, raú ilaꞌajé piyuke nakaje raꞌapiyá ke palá.
19 Ipuraꞌó pajwaꞌatéchaka Tupana yale nakú, Ripurákaꞌalo nakiyana nakú; ilaꞌá kaphí papechúwaka raú. Jataní Tupánajlo, puꞌují ipechu iꞌimakale rinaku.
20 Iꞌimá ñakeja waraꞌapá Tupánajlo palá rilaꞌakare iká yukuna piyukeja nakaje aú, wawakáraꞌajeri Jesucristo jaꞌapiyá jemaꞌajeño iꞌimakale.
Palá Jesucristo waꞌatéjena iꞌimakáloje nañakaré chiyájena waꞌaté penaje yukuna marí
21 Iphá palá paꞌapíchaka, iphákale kaja Jesucristo jaꞌapí.
22 Numá iká inaana kalúyunajlo: Jemaꞌá palá iluna jaꞌapiyá, jemaꞌaká Jesucristo jaꞌapiyá ke kaja.
23 Achiñá wakáraꞌari riyajalo, Jesucristo wakáraꞌaka raꞌapiyá jemaꞌajeño ke kaja. Riká iꞌimatari rileꞌejena inaꞌukena kapichákajo liyá. Iná napona iꞌimaká inajlo, ke kaja raꞌapiyá jemaꞌajeño iꞌimaká rijló.
24 Jesucristo jaꞌapiyá jemaꞌajeño jemaꞌañó palá nawakáraꞌajeri jaꞌapiyá, raú numá iká inaana kalúyunajlo, jemaꞌakáloje palá iluna jaꞌapiyá, iwakáraꞌajeño neꞌemakale.
25 Numá iká achiñana kalúyunajlo: Iwata íkiꞌija iluna, Jesucristo wátaka raꞌapiyá jemaꞌajeño ke kaja. Íkiꞌija riwátaka raꞌapiyá jemaꞌajeño, raú raꞌá rikó takaꞌakájejlo nachaya iꞌimaká.
26 Ilé ke rilaꞌaká wachaya, weꞌemakáloje Tupana leꞌejena inaꞌukena penaje. Juni aú iná kaꞌá iná pijá iná napona nakiyá. Ñaké kaja Ripurákaꞌalo jaꞌapiyá jemaꞌakana aú, iná yurí iná liyó puꞌuwaré iná laꞌakare.
27 Jesucristo iphájika piño majó wakajé, neꞌemajé palá, unká japi laꞌalaño puꞌuwaré ke, palá péchuruna neꞌemajíkale Tupánajlo.
28 Numá ñaké kaja iká achiñánajlo: Aꞌá palá iyajalo inakojó, aꞌaká inakojó ikó ke kaja. Iwátaka ikó, ke kaja iwátaka iyajalo.
29 Unká na kalé amá iná ikó chapú; palá iná aꞌaká iná nakojó iná ikó. Iná ajñá kaja iná aꞌajnewá, iná iꞌimakáloje palá. Ñaké kaja Jesucristo aꞌaká palá rinakojó weká, raꞌapiyá jemaꞌajeño.
30 Rinapona ke rijló raꞌapiyá jemaꞌajeño, ñakele rinapona nakiyana ke weká.
31 Tupana purákaꞌalo kemari kaja wáꞌakajeñomi pajwaꞌatéchaka nakú: “Pajluwaja keja neká, ke. Ñakele achiñá anúkaꞌaro richiꞌiná liyá, riꞌimakáloje riyajalo waꞌaté penaje. Raú iyamá neká iꞌimaño pajluwa japi keja pajwaꞌatéchaka”, ke rimaká nanaku.
32 Raú kaja rimá Jesucristo, raꞌapiyá jemaꞌajeño waꞌaté nakú, rimaká aú: “Neká iyamá iꞌimaño pajluwa japi keja”.
33 Ñaké kaja rimaká wáꞌakajeñomi nakú, neꞌemakáloje pajluwa japi keja pajwaꞌatéchaka. Rimá achiñá nakú, riwátakaloje riyajalo íkiꞌija, riwátaka rikó ke kaja. Rimá kaja inanaru nakú, ruphákaloje ruyajná jaꞌapí penaje.