Tupana Pechu jaꞌapiyá iꞌimakana aú
4
Inaꞌuké wajákelana chu nuká meꞌetení, Jesucristo yukuna nuꞌumakale inaꞌukejlo iꞌimaká. Numá ijló, iꞌimakáloje kaliyáruna Tupánajlo palá laꞌakaná nakú, riꞌiwapakale rijluwa iká.
2 Ilaꞌaniña inakuwá nakaje nakuwá weꞌepéjeño ke wani; iꞌimá inaꞌuké wani pajwaꞌatéchaka. Ijñaꞌá panaku inaꞌuké, aꞌajná nalaꞌajika palá ejená, íkiꞌija iwátakale pekowáaka.
3 Iꞌimá pajluwa japi keja pajwaꞌatéchaka, Tupana Pechu jaꞌapiyá iꞌimakale, raú palá ipechu iꞌimajika panakuwáaka ripalamane.
4 Pajluwaja japi keja neká, piyuke Jesucristo jaꞌapiyá jemaꞌajeño. Pajluwa kaja Tupana Pechu, wajwaꞌaté iꞌimakare; pajluwaja kaja chojé wapechu iꞌimá kaphí. Tupana iꞌiwapari rijluwa weká, weꞌemakáloje palá rijwaꞌaté jeꞌechú chu. Riká laꞌarí wapechu kaphí.
5 Pajluwaja wawakáraꞌajeri, richojeja kalé wapechu kaphí. Riká pajluwaja waꞌatéjena weꞌemakale, nalaꞌá bautizar weká.
6 Re pajluwaja, piyuke wani inaꞌukena chiꞌinárikana; riká piyuke raꞌapiyá jemaꞌajeño wakáraꞌajeri; neꞌiyá riká Ripechu aú. Piyuke raꞌapiyá jemaꞌajeño waꞌaté rilaꞌá nakaje palá.
7 Jesucristo palamane aú raꞌá weká raꞌapiyá jemaꞌajéñojlo weꞌepíkaje, raú walaꞌakáloje rijló keꞌiyapejé nakaje.
8 Tupana purákaꞌalo lanaꞌakéjami chu rimá marí ke iꞌimaká:
“Jesucristo jáchoꞌoko jeꞌechú chojé ejomi, richáꞌata
ripiná Jiñá Chiꞌinárikana iꞌimaká.
Reyá aꞌajemi, raꞌá inaꞌukejlo weꞌepíkaje,
raú nalaꞌakáloje keꞌiyapejé nakaje rijló”, ke rimaká.
9 ¿Meke kemakana chi kele “ráchoꞌoko”, ke? Marí ke kemakánaka riká: Paineko riwitúkaꞌa kawakaje marí ejaꞌawá nakojé iꞌimaká.
10 Riká penájemi kaja jáchoꞌo jeꞌechú chojé. Yenoje, ritajákaꞌalo ejé, ráchoꞌo iꞌimaká, ripechu iꞌimakáloje piyuke ejaꞌawá chuwá, piyuke jeꞌechú chuwá waꞌató.
11 Riká penájemi aꞌarí apujlo, apujlo ke, weꞌepíkaje, nalaꞌakáloje rijló keꞌiyapejé nakaje riwátaka ke. Neꞌiyajénajlo raꞌá weꞌepíkaje, neꞌemakáloje riyukuna ajopánajlo, ajopánajlo ke penaje. Raꞌá kaja neꞌiyajénajlo weꞌepíkaje, neꞌemakáloje Tupana purákaꞌalo jaꞌapátajeño. Raꞌá kaja neꞌiyajénajlo weꞌepíkaje, neꞌemakáloje riꞌimataka inaꞌuké kapichákajo liyá yukuna ajopánajlo, ajopánajlo ke. Raꞌá kaja neꞌiyajénajlo weꞌepíkaje, neꞌemakáloje Jesucristo waꞌatéjena amájeño. Eyá raꞌá kaja neꞌiyajénajlo weꞌepíkaje, newíñaꞌatakaloje inaꞌuké Ripurákaꞌalo nakú penaje.
12 Ilé kaje penaje raꞌá apujlo, apujlo ke, weꞌepíkaje, newíñaꞌatakaloje Jesucristo jaꞌapiyá jemaꞌajeño Tupana nakú, kaphí napechu iꞌimakáloje richaje, richaje ke, riwátaka ke laꞌakana nakú.
13 Ilé ke newíñaꞌatajika weká, weꞌemakáloje pajluwa japi keja weká, palá wani rinakojé weꞌepíkana ejená, raú walaꞌakáloje palá Jesucristo jaꞌapiyá piyukeja Tupana wátaka ke.
14 Chuwa, unká weꞌemalaje yuwaná ke, mapeja jemaꞌakaño ajopana purákaꞌalo pajlakaje jaꞌapiyá; unká kaja wemaꞌalaje puꞌuwaré laꞌajeñó jaꞌapiyá.
15 Marí ke laꞌakana palani, wawátakale pekowáaka íkiꞌija. Iꞌimá richaje, richaje ke, Jesucristo pechu chuwá péchuruna. Iná wílaꞌaru iꞌimaká iná napónajlo, ke kaja riꞌimaká raꞌapiyá jemaꞌajéñojlo.
16 Pajluwaja iná napona, eyá piyukeja reꞌiyá jápakachu palá, peyajweni iná. Ñaké kaja weká Jesucristo waꞌatéjena: raꞌapiyá iꞌimakana aú, weꞌemá pajluwa japi keja pajwaꞌatéchaka. Íkiꞌija wawátakachu pekowáaka, richaje, richaje ke, walaꞌaká Tupana wátaka ke.
Wajé iꞌimakaje jaꞌapiyá iꞌimakaño
17 Marí nakú numá ijló, wawakáraꞌajeri apumí chojé ke, jemaꞌakáloje raꞌapiyá penaje. Kaja chuwa, iꞌimaniña jupejé iꞌimajika ke, puꞌuwaré laꞌakaná nakú. Laꞌañó mapeja nakaje napechu keja, unká na penaje kalé nakaje nalaꞌakare.
18 Kaja mapechúruna ke neká Tupana nakojé weꞌepíkana; unká Ripechu iꞌimalá najwaꞌaté, neꞌemakáloje ripalamane raú. Ilé ke najló riká, ijnú nemaꞌakale raꞌapiyá, ñakele unká naweꞌepila Ripechu jaꞌapiyá iꞌimakana nakojé.
19 Kaja ijnú wani nawátaka raꞌapiyá jemaꞌakana, raú piyukeja puꞌuwaré laꞌakaná aꞌá rimeꞌé nanakojé, nalaꞌakáloje ñaké penaje. Chuwa, unká napáñaꞌalo nakaje nalaꞌakare jaꞌapí.
20 Iká weꞌepiño Jesucristo nakojé, ñakele unká ñaké laꞌajeñó kalé iká.
21 Kaja jemaꞌá kewákaje purákaꞌaloji, rewíñaꞌatakare nakú iꞌimaká, raú iweꞌepí riwátaka ke laꞌakana nakojé.
22 Ñakele iyurí iliyó puꞌuwaré ilaꞌajíkare laꞌakana. Riwakajé, unká iweꞌepike naka laꞌakana iꞌimakeri palani, raú kalé ilaꞌaké puꞌuwaré, apoꞌojó ipechu iꞌimajíkale.
23 Chuwa, wajé nakaje, Jesucristo leꞌejé iꞌimakare, nakú iꞌijnatá ipéchuwa.
24 Iꞌimá wajé iꞌimakaje jaꞌapiyá, palá laꞌakaná nakuja. Palá wani Tupana laꞌaká, raú ilaꞌá rilaꞌaká ke. Kewákaje purákaꞌaloji kemaká chuwá ilaꞌajé riká.
25 Ñakele chuwa ipajlániña pajwaꞌatéchaka; imá kewaka pajlokaka. Jesucristo waꞌatéjena iꞌimakale, pajluwa japi keja iká piyukeja.
26 Iyúchaꞌajiko ee, ilaꞌaniña puꞌuwaré rakuwaná. Kiñaja jaꞌapátaka iyuchá iliyó, ajúwaꞌaka piyá rijwaꞌaté.
27 Iyuríniña Jiñá Chiꞌinárikana kaꞌaká iká puꞌuwaré laꞌakaná chojé, iyuchá waꞌaté iꞌimajika ketana.
28 Jataꞌakachi penájemijlo numá: Piyurí piliyó piyuke jataꞌakaje. Pijapa palani jápakaje nakú, nakaje iꞌimakáloje pijluwa, waꞌaté paꞌakáloje kaja kamuꞌují laꞌakaño ñathé.
29 Iꞌimaniña chapújraꞌakajo nakú. Ipuraꞌó nakaje aꞌakare ajopana ñathé nakuja, naweꞌepíkaloje richaje ke, palá laꞌakaná nakú nakojé.
30 Tupana aꞌarí raꞌapiyá jemaꞌajéñojlo Ripechu, nalaꞌakáloje palá raꞌapiyá iꞌimakana aú. Ilaꞌaniña ujwí Ripechu, apoꞌojó nakaje laꞌakana aú. Ripechu, raꞌakare wajló aú, waweꞌepí rileꞌejena inaꞌukena weká. Ilé keja riꞌimajika wajló, weꞌejnajika jeꞌechú chojé ejená. Riwakajé, iꞌimatákejana wani weꞌemajika kapichákajo liyá.
31 Ikaꞌá ipechu nakiyá kele laꞌarí imaꞌá ipechu; ikaꞌá kaja inakiyó iyuchá awíyoꞌokare aú kajrú ajopánajlo; ilaꞌaniña ajopana unká inaꞌukélaruna ke ijluwa. Iyurí iliyó keꞌiyapejé chapú kaje ipechu nakú iꞌimakare.
32 Iꞌimá palá péchuruna pajwaꞌatéchaka; iweꞌepí kaja pamuꞌujíchaka; amó kaja pachájechaka, chapú ilaꞌakare pekowáaka liyá. Jesucristo palamane aú Tupana amó wachaje, puꞌuwaré walaꞌakare liyá. Ramako wachaje, ke kaja amako pachájechaka, chapú ilaꞌakare pekowáaka liyá.