Pablo jápakaꞌala yukuna marí
3
Ilé kaje yukuna iꞌimakana iká, unká judíona kalé iꞌimakáñojlo, jimaje nakaꞌá nuká inaꞌuké wajákelana chojé. Richu nuká meꞌetení.
2 Kaja iweꞌepí Tupana aꞌaká nuká riyukuna iꞌimajeri penaje, riweꞌepíkale imuꞌují.
3 Júpimi ripechu iꞌimá unká judíona kalé iꞌimakaño nakiyana nakú laꞌakana palá. Eyá nojló raꞌá puꞌuwaká nakaje ripechu nakú iꞌimakare; kaja nulanaꞌá ijló riyukuna nakiyana iꞌimaká.
4 Rijwaꞌaté puraꞌakano aú iweꞌepí nuweꞌepika nakaje, meꞌechuje iꞌimakare inaꞌukejlo, nakojé. Chuwa, puꞌuwaká wajló riyukuna, palá waweꞌepíkale Jesucristo nakojé.
5 Júpimi, unká na kalé puraꞌó riyukuna nakú, meꞌechuje riꞌimajíkale najló; eyá chuwa, Tupana aꞌarí puꞌuwaká wajló riká. Ripechu aú riꞌimá riyukuna riwakáraꞌakarenajlo, ñaké kaja riyukuna jaꞌapátajeñojlo.
6 Nakaje, meꞌechuje ke iꞌimakare iꞌimaká, nakojé waweꞌepí chuwa: Tupana iꞌimatari piyuke kaphí Jesucristo chojé péchuruna kapichákajo liyá ripalamane aú, ñakele chuwa unká ajopana ke kalé weká paliyáaka. Piyuke raꞌapiyá jemaꞌajéñojlo nakaje yuró jeꞌechú chu, rimaká rinaku iꞌimaká ke.
7 Tupana weꞌepiri inaꞌuké muꞌují; riweꞌepí kaja piyuke nakaje laꞌakana. Ripalamane nuꞌumakale raꞌá nuká, nuꞌumakáloje riyukuna ajopánajlo.
8 Ajopana, Tupana leꞌejena inaꞌukena, cháꞌataño nuká, eꞌiyonaja kalé rilaꞌá nuká palá. Raꞌá nuká riyukuna iꞌimajeri, unká judíona kalé iꞌimakaño nakiyánajlo, raú naweꞌepíkaloje Jesucristo nakojé. Unká iná pechu iphálajla ripalamane nakojé weꞌepíkana lokópaꞌala.
9 Raꞌá nuká, nuꞌumakáloje piyuke nupurákaꞌalo jemaꞌajéñojlo riꞌimataka inaꞌuké kapichákajo liyá, kaphí napechu iꞌimaká aú Jesucristo chojé, yukuna. Júpimi, unká rinakojé weꞌepíkana iꞌimalá inaꞌukejlo, Tupánaja kalé weꞌepiri rinakojé iꞌimaká.
10 Ilé ke rilaꞌaká inaꞌuké nakú palá aú, rijwaꞌatéjena, jeꞌechú chiyájena wakáraꞌajeño, piyukeja yenuwa iꞌimakaño wakáraꞌajeño waꞌaté, weꞌepiño kapechuni wani riká. Chuwa napechu iphaka, naweꞌepíkaloje kaja nakaje keꞌiyapejé, Tupana weꞌepíkare nakojé.
11 Riwakáraꞌa wawakáraꞌajeri Jesucristo marí ejaꞌawá chojé iꞌimaká, inaꞌuké iꞌimakáloje ripalamane. Kaja keja rilaꞌakana iꞌimaká ripechu nakú.
12 Kaphí wapechu Jesucristo chojé aú, Tupana waꞌatéjena nakiyana weká. Rijwaꞌatéjena weꞌemakale, unká wakeroꞌoló rijwaꞌaté puraꞌakano.
13 Riyukuna nuꞌumakare ijló chona nalaꞌá nuká chapú meꞌetení. Ilaꞌaniña ujwí ipéchuwa, ilé ke nalaꞌakale nuká. Palani riꞌimakáloje ijló penaje nuꞌumá riyukuna ijló iꞌimaká.
Íkiꞌija Jesucristo wátaka raꞌapiyá jemaꞌajeño yukuna marí
14 Palá wani waraꞌapá Tupana laꞌaká iká, ñaké iꞌimakale nutáraꞌono nuꞌurúpachi aú rijimaje, nupuraꞌakó rijwaꞌaté kewá.
15 Piyukeja Jesucristo jaꞌapiyá jemaꞌajeño, kaja jeꞌechú chu iꞌimakaño, ejaꞌawá chu iꞌimakaño waꞌaté, nakú nemá: “Tupana leꞌejena neká”, ke, riyani neꞌemakale.
16 Piyukeja laꞌajerí Tupana, unká tajnákajo penaje kalé riká. Rijwaꞌaté nupuraꞌakó kewá, numakano rijló Ripechu aú, rilaꞌakáloje iká kaphí péchuruna, ñakeja Ripechu iꞌimakáloje ijwaꞌaté penaje.
17 Nupuraꞌó kaja rijwaꞌaté inaku, kaphí ipechu iꞌimakáloje richojé, ipechu iꞌimakáloje Jesucristo pechu chuwá penaje. Raú íkiꞌija iwátajika riká; ñaké kaja iwátajika íkiꞌija pekowáaka. Aꞌawaná táraꞌako kamachá raꞌapare chojé, ke kaja iꞌimajika palá, íkiꞌija pekowáaka wátakana aú.
18 Raú iweꞌepeje palá, ajopana Tupana waꞌatéjena waꞌaté, meke kajrú wánika Jesucristo wátaka inaꞌuké.
19 Nukejaꞌa Tupana liyá péchuji ijló, raú iweꞌepíkaloje meke kajrú wánika riwátaka iká nakojé. Unká iná pechu iphálajla rinakojé weꞌepíkana lokópaꞌala, íkiꞌija wani riwátakale iná. Ilé kaje nukejaꞌa riliyá ijló, iꞌimakáloje riwátaka ke laꞌajeñó penaje, iꞌimakáloje kaja Ripechu jaꞌapiyá iꞌimakaño penaje.
20 Chuwa, palani Tupana nakú puraꞌakano palá, riweꞌepíkale piyukeja nakaje laꞌakana. Nakaje, wemakare nakú rijló, rilaꞌakáloje wajló penaje, richájeno rilaꞌalákano wajló riká. Unká méñoꞌojo wapechu iphálajla nakaje, rilaꞌakare nakojé weꞌepíkana, lokópaꞌala. Ripechu, iꞌimakare raꞌapiyá jemaꞌajeño eꞌiyá, palamane aú rilaꞌá nanaku palá.
21 Palá wánijla inaꞌuké puraꞌakojla ñakeja palá Tupana nakú, riꞌimatákale rijluwa neká kapichákajo liyá Jesucristo palamane aú. Palá kaja rilaꞌaká raꞌapiyá jemaꞌajeño nakú, rimaká nanaku iꞌimaká ke. Ñaké riꞌimajika.