Tupana iꞌimataka weká Jesucristo palamane aú yukuna marí
2
Kapichájeño Tupana liyá penájena iká iꞌimaká júpimi, puꞌuwaré laꞌajeñó iꞌimakale.
2 Inaꞌukena, unká jemaꞌalaño raꞌapiyá laꞌajika nakaje, ke kaja ilaꞌajika nakaje júpimi, raú ilaꞌaké Jiñá Chiꞌinárikana wakáraꞌaka ke. Neká, unká jemaꞌalaño Tupana jaꞌapiyá, wakáraꞌajeri riká.
3 Neká keja kaja weꞌemajika júpimi. Wawátajika keja walaꞌajíkano puꞌuwaré; wamanáicho walaꞌaké wapechu keja. Riphájika rená chojé wakajé, kajrú wani Tupana wajájika piyuke puꞌuwaré laꞌajeñó. Nanakiyana weꞌemaká,
4 eꞌiyonaja kalé riweꞌepí kajrú wamuꞌují iꞌimaká, íkiꞌija wani riwátakale weká.
5 Ñakele riꞌimatá weká kapichákajo liyá, weꞌemakáloje matajnako jeꞌechú chu rijwaꞌaté. Kapichájeño penájena weꞌemakajla puꞌuwaré walaꞌakare pachá, eꞌiyonaja riweꞌepí wamuꞌují aú kalé weꞌemaó kapichákajo liyá.
6 Pajluwaja japi keja weká Jesucristo waꞌaté, ñakele riwáꞌaje weká richajo jeꞌechú chojé, weꞌemakáloje re rijwaꞌaté.
7 Íkiꞌija wani riwátaka weká; kajrú wani riweꞌepika wamuꞌují. Ñakele ripalamane aú rilaꞌá weká palá wani, ajopana inaꞌukena jemaꞌakáloje riyukuna penaje.
8 Tupana weꞌepíkale imuꞌují, riꞌimatá iká kapichákajo liyá, ipechu iꞌimakale kaphí richojé. Unká nakaje palá ilaꞌakare palamane aú kalé riꞌimatá iká; Jesucristo palamane aú riꞌimatá iká.
9 Unká nakaje walaꞌakare palamane aú kalé riꞌimatá weká kapichákajo liyá. Ñaké iꞌimakale, unká méñoꞌojo iná kemalá iná nakuwá: “Nakaje palá nulaꞌakare aú riꞌimatá nuká kapichákajo liyá”, ke.
10 Jesucristo waꞌatéjena weꞌemakale, Tupana aꞌarí wajló wajé iꞌimakaje, walaꞌakáloje palá piyukeja nakaje ripechu nakú iꞌimakare, júpimi iꞌimaká ke.
Chuwa palá wapechu ajopana inaꞌukena nakú Jesucristo palamane aú. Riyukuna marí
11 Unká chiyó jemaꞌá Jesucristo jaꞌapiyá, judíona kemakeño inaku: “Unká Tupana leꞌejena inaꞌukena kalé neká, unkale namataꞌalá nakerákoꞌopana achiñana chinuma”, ke. Eyá nanakuwá nemaké: “Tupana leꞌejena weká, mataꞌakeja chinúmaruna weꞌemakale”, ke.
12 Iweꞌepí marí: Júpimi iꞌimaká, unká iweꞌepila Jesucristo nakojé; unká kaja Israel michú nakiyánami, Tupana iꞌiwapakárena rijluwa, kalé iꞌimaká. Nakaje rarukákare najló iꞌimaká, unká iꞌimalá ijló. Riwakajé unká Tupana iꞌimalá iñathé aꞌajeri, ñakele unká kaja iweꞌepila rinakojé iꞌimaká.
13 Eyá chuwa, pajluwa japi keja iká Jesucristo waꞌaté, ritakaꞌakale ichaya aꞌawaná apiyákakanami nakojé iꞌimaká. Riwakajé kajrú rira iꞌijnaká itapuwa aphumi chiyá, ripalamane aú iꞌimakáloje rijwaꞌatéjena meꞌetení. Júpimi, unká chiyó ipechu iꞌimá kaphí richojé, unká Tupana leꞌejena nakiyana kalé iꞌimaká.
14 Chuwa, Jesucristo palamane aú palá weká pajwaꞌatéchaka, pajluwaja keja. Ajopana keja waweꞌepíjikano panakuwáaka, unká chiyó wawata pekowáaka; eyá chuwa wemaꞌaká Jesucristo jaꞌapiyá aú, ripalaꞌatá wapechu wajló raꞌapiyá jemaꞌakana aú, weꞌemakáloje pajluwaja yaní keja pajwaꞌatéchaka. Ilé kaje aú rikapichata waliyá chapú wamákare pekowáaka iꞌimaká.
15 Chuwa, kaja unká weꞌemalá Tupana purákaꞌalo, júpimi riyuríkare, wakáraꞌari wani iná laꞌaká kajrú nakaje, jaꞌapiyá. Jesucristo takaꞌakale piyukeja wachaya aꞌawaná apiyákakanami nakojé aú, palá wapechu Tupana nakú rejenowaja. Raú kaja weká chuwa pajluwaja yaní keja pajwaꞌatéchaka, judíona, eyá unká judíona kalé iꞌimakaño waꞌaté.
16 Jesucristo takaꞌakale aꞌawaná apiyákakanami nakojé inaꞌuké chaya iꞌimaká aú, rilamáꞌata napechu, wapechu waꞌaté, rejenowaja wapechu iꞌimakáloje palá Tupana nakú. Raú kaja rilamáꞌata wapechu pajwaꞌatéchaka, wamaka piyá chapú pekowáaka. Pajluwaja yaní keja rilaꞌaká weká raú.
17 Jesucristo iphari majó palani yuku iꞌimajé piyukeja inaꞌukénajlo. Riyukuna yuró Tupana yukuna nakojé weꞌepéjeñojlo, eyá unká weꞌepílaño riyukuna nakojejlo waꞌató.
18 Jesucristo waꞌatéjena weꞌemakale, weká judíona, eyá iká unká judíona kalé iꞌimakaño, iꞌimaño pajñakani waraꞌapá Tupana awaꞌá, Ripechu iꞌimakale wajwaꞌaté.
19 Ñaké iꞌimakale, wekáꞌana ke kaja iká, Tupana leꞌejena iꞌimakale chuwa. Rejenowaja rilaꞌaká wanaku palá.
20 Tupana purákaꞌalo jaꞌapátajeño michuna, Jesucristo jaꞌapiyatéjena waꞌaté, yuriño wajló Tupana purákaꞌalo, raú waweꞌepíkaloje rinakojé. Jesucristo palamane aú rijwaꞌatéjena weká chuwa.
21 Nachaje, nachaje ke, íkiꞌirunacha raꞌapiyá jemaꞌajeño; pajluwaja nakiyana keja weká pajwaꞌatéchaka. Rileꞌejena inaꞌukena weká, wapechu iꞌimakáloje puꞌují rinaku raú penaje.
22 Iká, unká judíona nakiyana kalé iꞌimakaño, chuwa Tupana waꞌatéjena kaja iká. Chuwa Jesucristo jaꞌapiyá jemaꞌajeño iꞌimakale, re kaja Tupana Pechu eꞌiyá.