Waꞌakáloje pañathéchaka penaje yukuna marí
6
Nojena, re kaꞌajná pajluwaja inakiyana eꞌiyá, jaꞌaró puꞌuwaré laꞌajé, iká Tupana Pechu jaꞌapiyá iꞌimakáñojlo numá: Ipuraꞌó rijwaꞌaté, riyuríkaloje riliyó riká penaje. Iyúchaꞌaniño richá; amá ikó, ilaꞌaká piyá puꞌuwaré, rilaꞌaká ke kaja.
2 Aꞌá pañathéchaka, amaka kewá chapú kaje yajwé, ilaꞌakáloje palá Tupana wátaka ke raú. Ilé ke laꞌakana aú ilaꞌajé Jesucristo wakáraꞌaka ke.
3 Re kaꞌajná pajluwaja inakiyana ilérowa pechu rinakuwá: “Nuká cháꞌatari ajopana palá laꞌakaná aú”. Ilé ke ripechu iꞌimakachu rinakuwá, unká kewaka kalé ripechu rinakuwá, unkale riꞌimalá ñaké.
4 Pajluwano, pajluwano ke, iꞌijnatá ipéchuwa palá nakaje ilaꞌakare nakú, amákaloje mékeka riká: palani kaꞌajná, unká paala kaꞌajná. Puꞌují iná pechu iná nakuwá, palá iná laꞌakachu nakaje. Unká iná kemalá nakaje iná laꞌakare nakú, nakaje apú inaꞌuké laꞌá ramákana aú.
5 Walaꞌachí pajluwano, pajluwano ke, wekoja Tupana wátaka ke, kaja unká méñoꞌojo apú laꞌalajla wapumí chojé riká wajló.
6 Re ijwaꞌaté, neká jewíñaꞌataño iká Tupana purákaꞌalo nakú: aꞌá nañathé, nakaje aꞌakana najló aú.
7 Apala ipechu Tupana nakú: “Unká riweꞌepila puꞌuwaré walaꞌakare nakojé”, ke. Nakaje walaꞌakare lokoꞌopáneje, rimaje wanaku mékeka rijló riꞌimaká: palani kaꞌajná, unká paala kaꞌajná. Nakaje icha ijí iná ejátakare, ke richa iꞌimajika, ke kaja riká inaꞌukejlo.
8 Napechu keja laꞌajeñó, kapichájeño Tupana liyá. Ripechu wakáraꞌaka ke laꞌajeñó, iꞌimajeño matajnako jeꞌechú chu rijwaꞌaté.
9 Ñakele, wayaꞌaniño palá laꞌakaná nakú. Unkájika ee walaꞌó ujwí, palá laꞌakaná liyá, Tupana aꞌajé wajló riwemí, riphájika rená chojé wakajé.
10 Ñaké iꞌimakale, walaꞌachí puꞌuwaká palá; walaꞌachí kaja palá ajopana nakú. Richaje wani walaꞌajika palá wejena, Jesucristo jaꞌapiyá jemaꞌajeño.
Kaja penaje Pablo kemakare nakú najló yukuna marí
11 Amá: imujulá nojé lanaꞌakéjami aú nulanaꞌaká marí ijló.
12 Wakáraꞌaño imataꞌaká achiñana kerákoꞌopana chinuma rewá, wátaño judíona nakiyana pechu iꞌimaká palá nanaku, nalaꞌaká piyá chapú neká raú, nalaꞌaká Jesucristo jaꞌapiyá jemaꞌajeño chapú ke kaja.
13 Unká nachinuma mataꞌajeño laꞌalá pajimato Moisés purákaꞌalomi kemaká ke. Nawata iwakáraꞌakana, imataꞌakáloje kerákoꞌopana achiñana chinuma, napechu iꞌimakáloje nanakuwá: “Ilé ke nawakáraꞌakana aú, walaꞌá palá”, ke.
14 Unká ñaké kalé nojló riká, unká numalá nunakuwá: palá laꞌajerí nuká, ke, nakaje nulaꞌakare aú. Jesucristo takaꞌarí nuchaya iꞌimaká; kaphí nupechu richojé, raú kalé palá laꞌajerí nuká rijló. Unká weꞌepila Tupana nakojé, laꞌañó nakaje unká riwátalare kaje. Unká nunakiyaje kalé ilé ke laꞌakana; apichátakeja ke nuká ilé kaje laꞌakana liyá.
15 Unká na penaje Tupánajlo mataꞌakéjami, eyá unká mataꞌakeja chinúmaruna. Tupana Pechu jaꞌapiyá iꞌimakana aú ja kalé iná laꞌá palá, rikaja kalé palani rijló.
16 Ripechu jaꞌapiyá iꞌimakaño nakú numá: Eko Tupana laꞌá palá ipechu; eko riweꞌepí imuꞌují. Ñaké kaja nuwátaka rilaꞌaká rileꞌejena inaꞌukénajlo piyukeja.
17 Marí kaje pumí chiyó, unká nuwátala ajopana inaꞌukena kawílaꞌaka nunaku. Re kajrú nukupijneremi nunaku, judíona nakiyana ñaꞌatákale nuꞌumaká, unkale nupechu iꞌimalá napechu ke kaja.
18 Nojena, nuwata weꞌemakana Jesucristo laꞌaká iká palá piyukeja. Marí keja riká.
Kaja.