Pablo iꞌijnaká Jesucristo yukuna jaꞌapátajeño amaje yukuna marí
2
Catorce cha jarechí jaꞌapaka iꞌimaká ejomi, nuꞌujná piño Jerusalén ejo Bernabé waꞌaté; nuwaꞌa kaja Tito nujwaꞌató rejo.
2 Tupana kemari nojló, nuꞌujnakáloje rejo, raú nuꞌujná. Jerusalén e wekámika ke wawakako Jesucristo jaꞌapiyá jemaꞌajeño wakáraꞌajeño nakiyana waꞌaté. Riwakajé nuꞌumá najló mékeka nuꞌumaká unká judíona kalé iꞌimakaño nakiyánajlo Tupana iꞌimataka iná kapichákajo liyá yukuna. Unká nuwátala riꞌimaká mapéjari ke najló, ñakele nuꞌumá palá najló riyukuna.
3 Tito iꞌimari nujwaꞌaté. Griégona jaꞌa riꞌimaká, unká judíona nakiyana kalé riꞌimaká. Ñakele unká mataꞌakeja kalé richinuma iꞌimaká, eꞌiyonaja unká nawakáraꞌala richinuma mataꞌakana.
4 Ajopana achiñana iꞌimaño kaja re; unká Jesucristo jaꞌapiyá jemaꞌajeño kalé neꞌemaká. Mapeja nalaꞌaká nanakuwá raꞌapiyá jemaꞌajeño ke. Nawakako kaja wanakiyana waꞌaté re, raú unká iná weꞌepila mékajenaka neꞌemaká. Unká Moisés michú purákaꞌalomi jaꞌapiyá kalé weká; Jesucristo jaꞌapiyá jemaꞌajeño weká. Naweꞌepíkaloje riyukuna nakojé penájeja nawakako najwaꞌaté. Neká kemaño wajló, waꞌakáloje wanakojó Moisés purákaꞌalomi, raú nawata waꞌapátakana Jesucristo purákaꞌalo chiyá ripurákaꞌalomi chojé.
5 Unká wani waꞌalá wanakojó napurákaꞌalo; unká kaja wemaꞌalá naꞌapiyá meketánaja. Unká wawátala napichátaka ijló, ajopánajlo waꞌaté, kewákaje purákaꞌaloji mékeka Tupana iꞌimataka iná kapichákajo liyá, kaphí Jesucristo chojé iꞌimakana aú.
6 Re neꞌiyajena iꞌimaño, nawakáraꞌajeño ke neꞌemaká. Palá rewájena pechu iꞌimaká nanaku, eyá nuká, unká pechu iꞌimalá ñaké nanaku. Unká Tupana kemalá inaꞌuké nakú meke laꞌajeñoka neká namákana aú; riká weꞌepiri palá inaꞌuké nakojé mékajenaka neká. Unká kaja nawakáraꞌajeño ke iꞌimakaño kemalá nakaje, unká nuweꞌepílare nakojé nakú najló.
7-8 Naweꞌepí Tupana aꞌaká nuꞌumaká, nuꞌumakáloje unká judíona kalé iꞌimakáñojlo mékeka riꞌimataka iná kapichákajo liyá yukuna. Naweꞌepí kaja raꞌaká Pedro iꞌimaká, riꞌimakáloje Jesucristo yukuna judíonajlo.
9 Santiago, Pedro, eyá Juan, kele iꞌimaño Jesucristo jaꞌapiyá jemaꞌajeño wakáraꞌakeño rewá. Neká weꞌepiño riká penaje Tupana aꞌaká nuꞌumaká; naweꞌepí riyukuna iꞌimajeño weꞌemaká Bernabé waꞌaté. Palani najló weꞌemaká riyukuna ajopana inaꞌukénajlo iꞌimaká, eyá neká iꞌimaño riyukuna judíonajlo. Ilé kaje nakú wapuraꞌó palá pajwaꞌatéchaka.
10 Rikaja kalé nemá nakú wajló, waꞌakáloje kamuꞌují laꞌakaño ñathé nakaje aꞌakana najló aú. Nawakáraꞌaka ke nuwátaka nañathé aꞌakana, kaja wechi nuká ilé kaje laꞌakana nakú.
Antioquía e Pablo akhaꞌaká Pedro yukuna marí
11 Pedro iphari Antioquía ejo iꞌimaká. Re riꞌimaká wakajé, nokhaꞌá riꞌimaká ajopana inaꞌukena jimaje, unkale rilaꞌalá palá.
12 Marí kaje pachá nokhaꞌá riꞌimaká: Re weꞌemaká wakajé, inaꞌuké iphaño wanaku iꞌimaká, Santiago wakáraꞌakarena neꞌemaká. Unká chiyó nephá wanaku, Pedro ajñá raꞌajnewá, unká judíona kalé iꞌimakaño waꞌaté. Nephaka wanaku ejomi, unká rajñala raꞌajnewá najwaꞌaté, riwó laꞌakole naꞌapejé. Jesucristo jaꞌapiyá jemaꞌajeño neꞌemaká, eꞌiyonaja unká nayurila Moisés purákaꞌalomi jaꞌapiyá iꞌimakana.
13 Pedro wo laꞌó naꞌapejé, unkale rilaꞌalá palá riweꞌepíkare nakojé ke. Ajopana re iꞌimakaño laꞌañó kaja ñaké rijwaꞌaté, Jesucristo jaꞌapiyá jemaꞌajeño, judíona nakiyana neꞌemaká. Ilé kaje aú Bernabé keroꞌoró kaja najwaꞌaté.
14 Kewákaje purákaꞌalo nakojé weꞌepíkana aú, iná weꞌepí palá laꞌakaná nakojé. Nomaka aú unká nalaꞌalá palá ripurákaꞌalo kemaká ke, numá Pédrojlo re awakaño jimaje marí ke: “Judío jaꞌa piká, eꞌiyonaja kaja piyurí napurákaꞌalo jaꞌapiyá iꞌimakana, eꞌiyonaja chuwa piño napechu ke kaja pipechu najwaꞌaté. ¿Naje ta piwata ajopana iꞌimaká judíona purákaꞌalo jaꞌapiyá?”, ke numaká rijló.
Kaphí iná pechu iꞌimaká aú Jesucristo chojé, Tupana iꞌimataka iná kapichákajo liyá yukuna marí
15 Numá piño Pédrojlo: “Weká judíona, wamothoꞌoká eyá, ñakele unká ajopana, unká laꞌalaño Tupana purákaꞌalo Moisés lanaꞌakare iꞌimaká, ke kalé weká.
16 Waweꞌepí unká na kalé iꞌimari unká laꞌalá puꞌuwaré ke Tupánajlo, Moisés purákaꞌalomi jaꞌapiyá iꞌimakana aú. Kaphí iná pechu iꞌimaká Jesucristo chojé aú ja kalé iná iꞌimá, unká japi laꞌalá puꞌuwaré ke Tupánajlo.
17 “Weká judíona wátaño kaja Tupana kemaká wanaku: ‘Unká puꞌuwaré laꞌajeñó ke kalé neká nojló’, ke, kaphí wapechu iꞌimakale Jesucristo chojé. Kaja waweꞌepí puꞌuwaré laꞌajeñó weká, ajopana ke kaja. Unká Jesucristo pachá kalé ñaké laꞌajeñó weká, ¡unká wani!
18 Nuweꞌepí unká Moisés purákaꞌalomi jaꞌapiyá iꞌimakana lamáꞌatala iná Tupánajlo, puꞌuwaré iná laꞌakare liyá. Numakela apoꞌojó riliyá, pajlákachi nuꞌumakajla raú, unká pachá nuꞌumalajla palá riyukuna.
19 Nuweꞌepí unká Moisés purákaꞌalomi jaꞌapiyá iꞌimakana aú Tupana iꞌimatákajla nuká kapichákajo liyá. Raú chuwa kaja takaꞌaká ke nuweꞌepí nunakuwá, nuꞌumakáloje kajmuni Tupana palamane aú.
20 Kaja nenó nuká, Jesucristo waꞌaté, aꞌawaná apiyákakanami nakojé iꞌimaká, keja nojló riká, ritakaꞌakale nopumí chojé. Eyá kajmuni nuká, kaphí nupechu iꞌimakale Tupana iꞌirí chojé. Riká wátari nuká íkiꞌija, ñakele ritakaꞌá nuchaya iꞌimaká.
21 Unká nuwátala Tupana palamane laꞌakana mapéjari keja. Iná iꞌimakela unká japi laꞌalá puꞌuwaré ke Tupánajlo, Moisés purákaꞌalomi jaꞌapiyá iꞌimakana aú, unká na penaje kalé Jesucristo takaꞌarijla wachaya iꞌimaká”.