Tupana iꞌimataka weká kapichákajo liyá, wapechu iꞌimakachu kaphí Jesucristo chojé yukuna marí
3
Gálatas e iꞌimakaño, ¡meke meꞌejwiruna wani iká! ¿Na kaꞌajná lejñari iká, iyuríkaloje kewákaje purákaꞌaloji jaꞌapiyá iꞌimakana penaje? Weꞌemaká ijwaꞌaté wakajé, weꞌemá palá ijló na penájeka nenó Jesucristo iꞌimaká yukuna.
2 Nuwata imaká nojló mékeka ipechu nakú marí: ¿Jemaꞌakale palá Moisés purákaꞌalomi jaꞌapiyá aú chi Tupana aꞌarí ijló Ripechu, ipechu iꞌimakale kaphí Jesucristo chojé kaꞌajná? ¿Meke chi ipechu nakú riká?
3 ¡Meke meꞌejwiruna wani iká ta! Ikeñoꞌoká wakajé Jesucristo jaꞌapiyá jemaꞌakana, Tupana Pechu jaꞌapiyá ke ilaꞌajika nakaje, Tupana wátaka ke. Eyá, ¿chuwa chi iwátaka rilaꞌakana ikoja, ipechu keja?
4 Tupana Pechu jaꞌapiyá jemaꞌakana aú, ilaꞌaké kajrú nakaje palá rewá iꞌimajika. ¿Mapeja keja chi ipechu nakú meꞌetení, nakaje ilaꞌajíkare raú iꞌimaká? ¡Unká wani meke laꞌajé riꞌimalajla mapeja keja!
5 Tupana Pechu, raꞌakare ijló aú, inakiyana laꞌakeño nakaje palá eꞌiyowá, ripechu aú ja kalé. Unká Tupana Pechu aꞌalá Moisés purákaꞌalomi jaꞌapiyá iꞌimakaño ñathé, nalaꞌakáloje palá ñaké kaja. Kaphí Jesucristo chojé péchuruna, nekaja kalé laꞌañojla ñaké.
6 Kaphí Abraham michú pechu iꞌimaká Tupana chojé aú ja kalé Tupana kemari rinaku iꞌimaká: “Unká japi puꞌuwaré laꞌajerí ke riká nojló”.
7 Ñakele kaphí richojé péchurunaja kalé iꞌimaño Abraham lakénami wani;
8 ñaké kaja riká unká judíona kalé iꞌimakáñojlo. Unká japi puꞌuwaré laꞌajeñó ke kalé neká Tupánajlo, kaphí napechu iꞌimaká aú Jesucristo chojé. Unká chiyó riꞌimá najló ñaké, kaja Tupana weꞌepí ñaké riꞌimajika najló. Ñakele riwakáraꞌa nalanaꞌaká riyukuna iꞌimaká; yaꞌajnó iꞌimajíkañojlo penaje nalanaꞌá riꞌimaká. Marí ke rimaká Abrahamjlo iꞌimaká: “Pilaké palamane aú ja kalé nulaꞌajé palá wani piyukeja ajopana inaꞌukena”.
9 Kaphí Abraham pechu iꞌimaká Tupana chojé aú, Tupana laꞌarí palá rinaku iꞌimaká. Ñaké kaja rilaꞌajika palá piyukeja kaphí richojé péchuruna nakú.
10 Wátaño nekó lamáꞌatakana Tupánajlo puꞌuwaré nalaꞌakare liyá, Moisés purákaꞌalomi jaꞌapiyá iꞌimakana aú, nakú Tupana kemari marí ke: “Unkachu iná laꞌalá piyukeja wani nakaje Moisés purákaꞌalomi kemaká ke, riwajákana iꞌimajé”, ke rimaká.
11 Raú iná weꞌepí palá, unká Tupana lamáꞌatala iná rijluwa Moisés purákaꞌalomi jaꞌapiyá iꞌimakana aú, Tupana purákaꞌalo kemakale: “Kaphí nochojé péchurunaja kalé nulamáꞌata nujluwa, puꞌuwaré nalaꞌakare liyá, raú nekaja kalé iꞌimajeño nujwaꞌaté matajnako”, ke rimaká.
12 Wátaño nekó iꞌimatákana kapichákajo liyá, Moisés purákaꞌalomi jaꞌapiyá iꞌimakana aú, kapichájeño, unkale napechu iꞌimalá kaphí Tupana chojé. Ripurákaꞌalo kemari: “Laꞌarí nakaje piyukeja Moisés purákaꞌalomi kemaká ke, rikaja kalé iꞌimajeri matajnako jeꞌechú chu Tupana waꞌaté”.
13 Jesucrístoja kalé iꞌimatari weká wawajákana liyá, wachaya Tupana wakáraꞌakale ramaka chapú kaje yajwé iꞌimaká. Ripurákaꞌalo lanaꞌakéjami kemari Jesucristo nakú iꞌimaká: “Aꞌawaná apiyákakanami nakojé nephájikare, amájeri Tupana wajaka riká yajwé”, ke. Ilé ke ramaka riwajaka riká wachaya yajwé iꞌimaká.
14 Tupana lamáꞌatari rijluwa Abraham, puꞌuwaré rilaꞌakare liyá, ripechu iꞌimakale kaphí richojé, raú unká japi laꞌalá puꞌuwaré ke riꞌimaká Tupánajlo. Riꞌimakáloje ñaké kaja unká judíona kalé iꞌimakáñojlo, penaje Jesucristo amari Tupana wajaka riká wachaya yajwé iꞌimaká. Kaphí Jesucristo chojé iná pechu iꞌimaká aú, Tupana aꞌarí inajlo Ripechu, rimaká iꞌimaká ke.
Nakaje, Tupana kemakare nakú júpimi iꞌimaká ke, yukuna marí
15 Nojena, chuwa numájika ijló nakaje kaja iweꞌepíkare nakojé, raú iweꞌepeje palá numakare nakojé: Apala iyamá inaꞌukena laꞌañó nakaje pajwaꞌatéchaka “contrato” kaje. Nalanaꞌá kaja neiwá, kaja penaje lanaꞌakéjami jaꞌapejé. Rejomi, kaja unká méñoꞌojo napiyákalajla riká; unká méñoꞌojo iná aꞌalajla riñathé apú purákaꞌaloji aú; unká kaja méñoꞌojo iná kaꞌalajla reꞌiyayá rinakiyana.
16 Tupana kemari Abrahamjlo iꞌimaká: “Nupalamane aú piꞌimajé palá wani; nupalamane aú kaja pilakemi iꞌimajé palá”, ke rimaká. Unká Tupana kemalá rijló: “Pilakénami iꞌimajeño palá”, ke. Rimá rijló pajluwaja nakuja kalé; Jesucristo, riká rimá nakú rijló iꞌimaká.
17 Kaja Tupana kemá inaꞌuké nakú iꞌimaká: “Kaphí péchuruna nochojé nuꞌumataje kapichákajo liyá”, ke. Rejomi cuatrocientos treinta jarechí ketana jaꞌapari iꞌimaká. Rejéchami Tupana wakáraꞌaka Moisés lanaꞌaká ripurákaꞌalo, inaꞌuké iꞌimakáloje raꞌapiyá penaje. Ñakele nakaje, rimakare nakú Abrahamjlo iꞌimaká, unká méñoꞌojo iná apiyákalajla riká, Tupana laꞌakale “pacto” kaje rijwaꞌaté iꞌimaká. a
18 Tupana iꞌimatákela weká kapichákajo liyá Moisés purákaꞌalomi jaꞌapiyá iꞌimakana aú, kaja keja riꞌimakajla wajló. Rejéchami kaja unká na penaje rarukálajla wajló weꞌematákana kapichákajo liyá. Tupana kemari Abrahamjlo: “Palá nulaꞌajika piká”, ke. Unká na rilaꞌalá iꞌimaká ripalamane, Tupana laꞌakáloje riká palá penaje.
19 Apala imaje kaꞌajná: “Eta, ¿na penájeka wajló Tupana purákaꞌalo Moisés lanaꞌakare iꞌimaká?” Numá ijló, waweꞌepíkaloje puꞌuwaré walaꞌakare nakojé penaje riká. Jesucristo iphaka ejaꞌawá chojé wakajé ejená, raꞌapiyá iꞌimakana yuró najló iꞌimaká. Riká nakú Tupana kemari Abrahamjlo iꞌimaká. Tupana purákaꞌalo nakiyana, raꞌakare Moisesjlo iꞌimaká, iphari rijló marí ke: Tupana waꞌatéjena, jeꞌechú chiyájena, jaꞌapátaño rijló riꞌimaká.
20 Eyá Abrahamjlo, unká Tupana wakáraꞌala apú jaꞌapátakaloje rilaꞌajíkare yukuna; rikó riꞌimaká riyukuna rijló iꞌimaká.
Na penájeka Tupana purákaꞌalo, raꞌakare Moisesjlo iꞌimaká, yukuna marí
21 Apala ipechu iꞌimá nakaje Tupana arukákare nakú: “Unká kaꞌajná ripurákaꞌalo chuwá kalé raꞌá Moisejlo iꞌimaká”, ke. Unká apoꞌojó kalé riká, pajluwaja chuwá ripurákaꞌalo. Unká méñoꞌojo ripurákaꞌalo wakáraꞌalajla iná laꞌaká nakaje iná ikoja, iná iꞌimakáloje matajnako raú jeꞌechú chu penaje.
22 Tupana purákaꞌalo lanaꞌakéjami kemari piyukeja inaꞌukena nakú: “Nachuwájenaja neká, puꞌuwaré laꞌajeñó; unká méñoꞌojo náchoꞌolojla nekoja richiyá”, ke. Ilé ke riꞌimakale, Tupana kemari wanaku: “Nuwakáraꞌaje Jesucristo iꞌimatájeri penaje”, ke rimaká wanaku, unká chiyó riphá majó iꞌimaká. Ñakele kaphí péchuruna richojé iꞌimakaño, riꞌimatá kapichákajo liyá.
23 Unká chiyó Jesucristo iphá majó iꞌimaká, napatákarena penájena keja weꞌemajika. Riwakajé unká méñoꞌojo wapechu iꞌimaké kaphí richojé weꞌematájeri penaje.
24 Tupana purákaꞌalo Moisés lanaꞌakare yuriro wajló, rewíñaꞌatakaloje weká Tupana nakú penaje. Pumí chojé Jesucristo yuriro wajló, wapechu iꞌimakáloje kaphí richojé penaje, weꞌemakáloje unká japi laꞌalaño puꞌuwaré ke rijló raú.
25 Ñakele chuwa unká weꞌemalá Moisés purákaꞌalomi jaꞌapiyá, riká iꞌimakale wajló wewíñaꞌatajeri ke iꞌimaká.
26 Chuwa Tupana yaní nakiyana iká, kaphí ipechu iꞌimakale Jesucristo chojé.
27 Nalaꞌá bautizar iꞌimaká, iꞌimakale pajluwaja keja Jesucristo waꞌaté
28 Piyuke weká, Ripechu chuwá iꞌimakaño, iꞌimaño pajluwa japi keja Tupánajlo; unká ajopana, ajopana ke kalé rijló weká. Rejenowaja Tupánajlo piyuke inaꞌuké: judíona, unká judíona kalé iꞌimakaño; najluwa jápajeño, ajopana waꞌaté jápajeño. Rejenowaja kaja rijló achiñana, inaana waꞌaté; pajluwaja japi keja rijló weká piyukeja.
29 Jesucristo jaꞌapiyá jemaꞌajeño weꞌemakachu, Abraham lakénami keja kaja weká, Jesucristo waꞌatéjena. Nakaje, Tupana arukákare rijló iꞌimaká, yuriro kaja wajló, rilaꞌakáloje weká palá raú penaje.