4
Marí nakú nuwata kemakana: Re kaꞌajná pajluwaja yuwají. Kaja raraꞌapá michú takaꞌañáa riká, ñakele piyuke raraꞌapami nánemi yuriro rijló waja; unká na naꞌalá rijló yuwají riꞌimaká wakajé. Re kaꞌajná rijipiture, jápari riñakaremi chu rijwaꞌaté. Eꞌiyonaja unká riwakáraꞌajeri kalé kele yuwají, paminá penaje riꞌimajika eꞌiyonaja.
2 Yuwají riꞌimaká ketana, re rilamáraꞌajeño. Naꞌá nanakojó riká palá, aꞌajná raꞌapaka yuwají kaje chiyá ejená. Ilé ke rijló riká riphaka rená chojé ejená, raraꞌapá michú nánemi yuríkoloje rijló, reyá aꞌajná ñoꞌojó penaje. Riphaka rená chojé ejéchami, nakaje yuriko rijló.
3 Unká chiyó Jesucristo iphá iꞌimaká, ñaké kaja riꞌimaká wajló: Ajopana purákaꞌalomi jaꞌapiyá kaja weꞌemá iꞌimaká; riwakajé yuwaná keja weꞌemaká Tupana nakojé weꞌepíkana nakú. Nakaje wajló penaje iꞌimakare, unká kaja yurilo wajló riwakajé iꞌimaká.
4 Eꞌiyonaja riphaka rená chojé wakajé, Tupana wakáraꞌari wajló Riꞌirí majó ejaꞌawá nakojé iꞌimaká. Maare ramó ralojlo iꞌimaká; inaꞌuké riꞌimaká, weká ke kaja. Riꞌimaké kaja Moisés purákaꞌalomi jaꞌapiyá, ajopana judíona iꞌimajika ke kaja.
5 Riꞌimatákaloje raꞌapiyá iꞌimakaño kapichákajo liyá penaje riphá iꞌimaká. Kapichákajo liyá weꞌematákana aú Tupana laꞌarí weká riyaniwá penaje.
6 Ñakele Tupana aꞌarí wajló Ripechu, raú waweꞌepí riyani weká; raú wemá rinaku: “Waraꞌapá riká”, ke.
7 Ñakele chuwa, unká mapeja apú waꞌaté jápajeri ke kalé piká, riyani nakiyana piꞌimakale meꞌetení Jesucristo palamane aú. Tupana yaní nakiyana iná iꞌimakale, riyurí inajlo piyuke nakaje inajlo penaje iꞌimakare.
Pablo wo kaꞌakó najwaꞌaté yukuna marí
8 Unká chiyó iweꞌepí Tupana nakojé, mapeja iꞌimajika ajopana waꞌaté jápajeño keja. Neká iꞌimaño ijló ichiꞌinárikana ke; unká chiꞌinárikanaji wani kalé neꞌemaká, mapeja ipechu iꞌimajika nanaku ñaké. Riwakajé iwakáraꞌajeño ke kaja neꞌemajika ijló.
9 Eyá chuwa iweꞌepí Tupana nakojé. Unká iká kalé keñoꞌoñó paineko rinakojé weꞌepíkana iꞌimaká. Tupánaja kalé weꞌepiri paineko inakojé iꞌimaká, raꞌakáloje iká riyaniwá penaje. Eta chuwa, ¿naje chi iwata piño mapéjari purákaꞌaloji, unká na penaje iꞌimalare inajlo, jaꞌapiyá iꞌimakana? Unká iná iꞌimalajo kapichákajo liyá raꞌapiyá iꞌimakana aú. ¿Chuwa chi iwátaka iyámojo paꞌakano, iꞌimakáloje mawemíwaka jápajeño ke ajopánajlo?
10 Meꞌetení re joꞌó kaja aꞌaká inakojó kajrú kajmoꞌokajo kaje iphaka rená chojé kewá ilaꞌaká ñaké.
11 Kaja wani ilaꞌá nupechu ujwí iliyá, ilaꞌakale ijluwa mapeja keja nakaje, nowíñaꞌatakare iꞌimaká Tupana nakú, aú.
12 Nojena, ilaꞌá ipéchuwa nupechu Jesucristo nakú, ke kaja. Iká ke kaja nuká meꞌetení. Unká kaja kaphí kalé nupechu Moisés purákaꞌalomi chojé, nuꞌumakóloje kapichákajo liyá raú. Nuphaka inaku Tupana yukuna iꞌimajé ijló wakajé, unká ilaꞌalá nuꞌumaká chapú.
13 Paineko chiyó nuphaka inaku wakajé, nutami nuꞌumaká eꞌiyonaja, ñakeja waꞌateja nuꞌumaká ijló Tupana iꞌimataka inaꞌuké kapichákajo liyá yukuna.
14 Nulakaꞌapheja nowíñaꞌataka iꞌimaká eꞌiyonaja, unká ipechu iꞌimalá nunaku iꞌimaká: “Meke apú kaje wani riká”, ke, íkiꞌija iwátakale nuꞌumaká. Tupana waꞌatéjeri, jeꞌechú chiyaje, iwátakajla, ke kaja iwátaka nuꞌumaká. Jesucristo ke nuꞌumakela, ñaké kaja iwátakajla nuꞌumaká riwakajé.
15 Eta chuwa, ¿na chi kaꞌarí iká nuliyá? Nuweꞌepí nuꞌumaká ijwaꞌaté wakajé, palani kaꞌajná riꞌimakajla ijló nujlú apiyákakana ijlú aú, nutami nuꞌumakale nujlú chiyá. Iná laꞌakejla ñaké, ilaꞌajla nojló riꞌimaká, palá wani ipechu iꞌimakale nunaku.
16 Apala chuwa chapú ipechu nunaku, numakale ijló nakaje kewaka iꞌimakare nakú.
17 Wechi meꞌetení iꞌimakaño ijwaꞌaté aꞌaká nanakojó iká, eꞌiyonaja unká wani paala napechu. Aꞌaká piyá inakojó nupurákaꞌalo, penájeja kalé palá napechu iꞌimaká inaku.
18 Inaꞌuké aꞌakachu nanakojó ajopana, palá naꞌakale nañathé, palani riká. Eꞌiyonaja kalé re nuꞌumaká ijwaꞌaté ketánaja nalaꞌaká inaku palá, ilé kaje unká wani paala.
19 Nojena, kajrú inaana amaka kewini yajwé nawáꞌaka nayani ketana. Nayani amako najló ejená, najñaꞌá kewini yajwé panaku. Mékeka inanaru pechu ruwáꞌaka ruꞌurí ketana, ke kaja nupechu ijwaꞌaté. Meꞌetení kajrú nujñaꞌaká panaku nakaje unká paala ilaꞌakare, aꞌajná ipechu iꞌimajika piño Jesucristo pechu chuwá ejená.
20 Palánijla nojló meꞌetení, nuꞌumakela ijwaꞌaté nupuraꞌakóloje ijwaꞌaté penaje. Kaja unká nuweꞌepila palá mékeka inaku kemakana maare eyá iꞌimajemi.
Pablo iꞌimaká Agar micholo, Sara micholo, kele yukuna najló. Riyukuna marí.
21 Re inakiyana wátaño Moisés purákaꞌalomi jaꞌapiyá iꞌimakana, raú neꞌemakóloje kapichákajo liyá. Najló numá: Iweꞌepí palá ripurákaꞌalo nakojé, meke kemakánaka nakaje rimakare nakú Abraham michujlo iꞌimaká.
22 Marí ke riꞌimaká: Iyamá riyani iꞌimaká. Pajluwaja riꞌirí iꞌimari apaꞌawelo Agar waꞌaté. Ruká riwarúwaꞌakareru iꞌimaká, rujápakaloje mapeja riñakaré chu penaje. Eyá apú riꞌirí iꞌimari riyajalo wani Sara waꞌaté, unká riñakaré chiyá jápajeyo kalé ruꞌumaká.
23 Paineko riꞌirí iꞌimari riñakaré chiyá jápajeyo waꞌaté. Ripechu keja wani Abraham laꞌakare aú, riꞌirí iꞌimari rujwaꞌaté. Rejomi riꞌirí iꞌimari piño riyajalo wani waꞌaté. Kaja pheñawilana wani neꞌemaká wakajé rimothoꞌó iꞌimaká. Tupana kemaká najló keja riꞌimaká.
24 Iyamá inaana yukuna kemari kaja wajló apú nakaje nakú: Agar micholo iꞌimaká, keja neká wátaño Tupana iꞌimataka neká kapichákajo liyá, nemaꞌakale ripurákaꞌalo raꞌakare Moisesjlo iꞌimaká jaꞌapiyá. Mapeja jápakaño ajopánajlo keja neká.
25 Ipuré Sinaí iꞌiwata nakú Tupana aꞌarí Moisesjlo ripurákaꞌalo iꞌimaká. Arabia teꞌeré nakú. Riká jaꞌapiyá iꞌimakaño, iꞌimaño mapeja ajopánajlo jápajeño ke, Agar iꞌimaká keja kaja neká.
26 Eyá weká, Jesucristo jaꞌapiyá jemaꞌajeño, Tupana yaní wani, wapechu iꞌimakale kaphí Jesucristo chojé, riꞌimatákaloje weká kapichákajo liyá.
27 Júpimi Tupana purákaꞌalo jaꞌapátajeri Isaías michú lanaꞌarí riyukuna marí ke iꞌimaká:
“Unká pijwaꞌatéjena iꞌimalá,
eꞌiyonaja pilaꞌajé pipéchuwa puꞌují, ñaké riꞌimajíkale pijló.
Paineko, unká inaꞌuké wátalaje piꞌimajika,
eꞌiyonaja júpichami, kajrú pijwaꞌatéjena iꞌimajika.
Iꞌimaño purákaꞌaloji, júpimi yuríkaro wajló jaꞌapiyá, chaje íkiꞌika pijwaꞌatéjena iꞌimajika”,
ke Isaías lanaꞌaká Jesucristo yukuna, unká chiyó riphá ejaꞌawá chojé iꞌimaká.
28 Nojena, Tupana kemari Abrahamjlo iꞌimaká: “Piꞌirí Isaac iꞌimajeri”, ke, raú riꞌimá. Ñaké kaja wajló riká. Tupana kemari inaꞌuké nakiyana nakú iꞌimaká, neꞌemakáloje riyani, ñakele ñaké neká.
29 Paineko Abraham iꞌirí iꞌimari apaꞌawelo waꞌaté, rilaꞌakale ripechu keja. Rejomi apú riꞌirí iꞌimari piño riyajalo wani waꞌaté, Tupana Pechu palamane riꞌimaká. Yuwaná neꞌemaké wakajé, riꞌirí, ripechu keja iꞌimakare, kawílaꞌakeri rijmeremi nakú. Meꞌetení ñaké kaja wajló riká: napechu keja laꞌajeñó unká wátalaño Tupana Pechu jaꞌapiyá jemaꞌajeño.
30 Marí ke Tupana purákaꞌalo lanaꞌakéjami kemaká Abraham yaní nakú. Tupana kemari rijló: “Páchoꞌota jápayo pijló mapeja piñakaré chu, ruꞌurí waꞌaté. Unká piyajalo wani iꞌirí kalé riká, nakaje yuríkoloje rijló penaje, ñakele páchoꞌota neká piñakaré chiyá”, ke rimaká rijló.
31 Nojena, ñaké kaja jemaꞌañó Moisés purákaꞌalomi jaꞌapiyá iꞌimajika. Unká na yurílajo najló iꞌimajika. Neká iꞌimajeño Abraham ñakaré chiyá jápajeyo iꞌirí iꞌimaká ke kaja, unká na yurilo rijló iꞌimaká. Eyá Jesucristo jaꞌapiyá jemaꞌajeño weká, Tupana yaní weꞌemakale. Piyuke nakaje rimakare nakú yurejo wajló, weꞌemakale Abraham yajalo wani iꞌirí iꞌimaká ke kaja. Rijló piyuke nakaje yuró iꞌimaká.