Liñeru naꞌakare kamuꞌují laꞌakáñojlo yukuna marí
16
Chuwa numá liñeru ijñaꞌakare paliyáaka nakú, ajopana Jesucristo waꞌatéjenajloje penaje. Kaja numá raꞌakana nakú Jesucristo jaꞌapiyá jemaꞌajeño, Galacia teꞌeré e iꞌimakáñojlo. Numaká najló iꞌimaká, ke kaja ilaꞌá ilérowa.
2 Watánaꞌakaje iꞌimaká wakajé keja, piyukeja aꞌajika iliñérute nakiyana, aꞌakáloje riká kamuꞌují laꞌakáñojlo. Kánari kajrú liñeru, aꞌajeri kaja ñóꞌope riliñérute nakiyá. Eyá kánari wejápaja, aꞌajeri wejápaja kaja. Liñeru ijñaꞌajíkare ilamáꞌataje nupé, re riꞌimajé nuphájika wakajé. Ilé ke ilaꞌajika ee, unká ijñaꞌalaje apú liyá, apú liyá ke, liñeru riwakajé.
3 Nuphájikaja ilé ñoꞌojó wakajé, nuwakáraꞌaje achiñana nakiyana iꞌijnataka riká liñeru awakátakare Jerusalén ejo, naꞌakáloje riká Jesucristo jaꞌapiyá jemaꞌajeño re iꞌimakáñojlo. Ipechu iꞌimakárena nakú palá, wawakáraꞌaje rejo. Najló noꞌojé carta nená keꞌená penaje, naweꞌepíkaloje mékajenaka neká raú.
4 Palani rejo iꞌijnakana iꞌimajika ee nojló, nuꞌujnajé kaja rejo najwaꞌaté.
Pablo wátaka ajopana, ajopana ke, ñakajela ejo iꞌijnakana yukuna marí
5 Nóchoꞌojiko maare eyá wakajé, noꞌopaje paineko Macedonia teꞌeré eꞌiyowá, rejomi nuphaje inaku Corinto ejo.
6 Apala nuꞌumajé ijwaꞌaté júpija kemachi ilérowa, yawijá ketana kaꞌajná. Rejomi kaꞌajná aꞌajé nuñathé, nuꞌujnakáloje reyá apoꞌojó penaje.
7 Unká nuwátala meketánaja amákana; Tupana wátajika ee, júpija kemachi nuyuríjiko ijwaꞌaté.
8 Nuwata maare Efesio e iꞌimakana fiesta Pentecostés wakajé ejená.
9 Palani maare nojló iꞌimakana, noꞌopátakaloje kajrú inaꞌukénajlo Tupana purákaꞌalo. Eyá ñaké kaja kajrú chapú nunaku péchuruna wátaka nopu itakana.
10 Timoteo iphájika ee inaku, eko ipechu iꞌimá palá rinaku, palá riꞌimakáloje ijwaꞌaté ilérowa penaje. Tupánajlo rilaꞌá nakaje, nulaꞌaká ke kaja.
11 Ñakele ipechu iꞌimaniña rinaku: “Mapéjari riká”, ke. Raꞌapájika reyá wakajé, eko paꞌá riñathé nakaje leꞌepé kaje aú, ripaꞌakóloje piño majó rapumí chuwá. Maare nuwátaje riká, ajopana wanakiyana waꞌaté.
12 Pulapé cha numaká weꞌewé Apólosjlo, riꞌijnakáloje ajopana wanakiyana waꞌaté ichaje kaꞌajnó. Meꞌetení unká riwátala rejo iꞌijnakana, apala rejomi kaꞌajná riꞌijnajé.
Kaja penaje Pablo kemakare nakú najló marí
13 Iꞌimaniña kamátajeño ke; ñakeja ipechu iꞌimá kaphí Tupana chojé; iꞌimá kaphí richojé.
14 Piyuke nakaje ilaꞌajíkare, ilaꞌá riká palá, iwátakale íkiꞌija Tupana.
15 Nojena, kaja jemaꞌá Estéfanas, riyajalo, riyani, kele yukuna, Acaya teꞌeré nakú iꞌimakaño. Neká pajnoꞌotaño napéchuwa Tupana ejo, ajopana re iꞌimakaño tukumá, nemaꞌakáloje Jesucristo jaꞌapiyá penaje. Chuwa Jesucristo jaꞌapiyá jemaꞌajeño ñathé aꞌajeño neká.
16 Nuwata jemaꞌaká ilé ke laꞌajeñó jaꞌapiyá, ajopana najwaꞌaté jápajeño jaꞌapiyá waꞌató.
17 Puꞌují nupechu laꞌakó Estéfanas, Fortunato, Acaico, kele iphákale nuchaje, reyá iꞌimaká apumí chojé ke.
18 Neká jaꞌapátaño ujwí kaje nupechu liyá. Ñaké kaja nalaꞌaká iká. Iweꞌepí kaja inaꞌuké, neká ke iꞌimakaño.
19 Asia teꞌeré ewá kajrú Jesucristo waꞌatéjena awakako apú chojé, apú chojé ke. Piyuke neká kemaño inaku: “Eko palá najló kaꞌajnó”, ke. Áquila, Priscila waꞌaté, kemaño ñaké kaja inaku. Awakaño najwaꞌaté nañakaré chu waꞌató, kemaño kaja inaku: “Eko palá najló kaꞌajnó”, ke.
20 Piyuke Jesucristo waꞌatéjena maare iꞌimakaño kemaño inaku: “Eko palá najló”, ke. Ipeꞌé ipechu aú ajalaka pekowáaka palá.
21 Nuká, Pablo lanaꞌarí marí nuyátheꞌela aú: Eko palá ijló.
22 Unká wátalaño íkiꞌija wawakáraꞌajeri Jesucristo, Tupana wajaje. Jesucrístojlo numá: “Wawakáraꞌajeri, pipaꞌó majó kiñaja”.
23 Nuwata Jesucristo laꞌaká iká palá wani.
24 Raꞌapiyá jemaꞌajeño weká pajwaꞌatéchaka. Ñakeja nuwátaka iká íkiꞌija.
Kaja.