3 Nowíñaꞌata iꞌimaká Jesucristo yukuna nakú. Nakaje newíñaꞌatakare nuꞌumaká nakú, noꞌopata kaja ijló iꞌimaká. Marí ke nowíñaꞌataka iꞌimaká: Wapumí chojé Jesucristo takaꞌarí, puꞌuwaré walaꞌakare pachá, iꞌimaká. Tupana purákaꞌalo lanaꞌakéjami kemaká rinaku, keja riꞌimaká.

4 Ritakaꞌaká ejomi, natoꞌotá ritami támijimi toꞌotákelana chojé iꞌimaká. Re ritami iꞌimá liri chu weji ke kala ketana, rejomi rimakápoꞌo piño, Tupana purákaꞌalo kemaká rinaku ke.

5 Rimakápoꞌoko ejomi, riyaꞌató Pédrojlo iꞌimaká, rejomi riyaꞌató kaja raꞌapiyatéjenajlo.

6 Riyaꞌató kaja raꞌapiyá jemaꞌajéñojlo, quinientos chaje neꞌemaká. Re joꞌó kaja neꞌiyajena maárowa meꞌetení, eyá nanakiyana takaꞌañó.

7 Rejomi riyaꞌató kaja Santiágojlo, rejomi piño piyuke riwakáraꞌakarenajlo.

8 Kaja penaje wani riyaꞌató nojló iꞌimaká. Júpimi ke ajopana amaka riꞌimaká nupiyá, eyá nojló riyaꞌató kaja penaje iꞌimaká.

9 Jesucristo wakáraꞌakarena riyukuna iꞌimajé nakiyana nuká. Unká chiyó nuꞌumá nanakiyana, chapú wani nulaꞌajika raꞌapiyá jemaꞌajeño iꞌimajika. Ilé ke nulaꞌajíkale, unká nuliyá iꞌimalá, nemakáloje nunaku: “Jesucristo wakáraꞌakarena riyukuna iꞌimajé nakiyana riká”, ke.

10 Eꞌiyonaja kalé, Tupana apiyákari nupechu. Ripalamane aú palá nupechu meꞌetení, unká mapeja kalé palá rilaꞌakare nunaku yuriko nojló. Raú nujapa meꞌetení kajrú, ajopana Jesucristo wakáraꞌakarena chaje. Unká nupechu keja kalé nulaꞌaká ñaké, Tupana palamane nujápakale kajrú.

11 Unká na penaje wajló weꞌepíkana iꞌimalá mékajenaka jápaño kajrú, ijlojé penaje waja wajápakale, jemaꞌakáloje Jesucristo yukuna penaje. Riká waja yukuna iꞌimakana nakú weká, piyuke ajopana riyukuna iꞌimajeño waꞌaté. Rikaja kaja yukuna jaꞌapiyá jemaꞌajeño iká.

12 Jesucristo makápoꞌoko piño iꞌimaká yukuna weꞌemá inaꞌukejlo. Inakiyana pechu kaja takaꞌakaño michuna nakú: “Unká namakápoꞌolajo piño”, ke.

13 Unkájika ee kaja takaꞌakaño makápoꞌolajo piño, unká kaja Jesucristo makápoꞌolo iꞌimaká.

14 Kewaka riꞌimakale, unká mapeja kalé ipechu kaphí richojé.

15 Unkákela kaja takaꞌakaño makápoꞌolajojla, mapeja wapajlákajla Tupana yukuna iꞌimakana aú, wemakale Jesucristo nakú: “Rimakápoꞌo piño iꞌimaká”, ke.

16 Kewaka Tupana makápoꞌotaka Jesucristo iꞌimaká, raú waweꞌepí ñaké kaja rimakápoꞌotajika piyuke takaꞌakaño iꞌimaká.

17 Unkákela Jesucristo makápoꞌolojla iꞌimaká, unká na penaje ipechu iꞌimalajla kaphí richojé. Re joꞌó kaja puꞌuwaré ilaꞌakare pachá ikapichájojla Tupana liyá.

18 Ilé ke riꞌimakela, Jesucristo jaꞌapiyá jemaꞌajeño michuna kapichájeñojla kaja Tupana liyá.

19 Marí ejaꞌawá chu weꞌemaká ketánaja kalé Jesucristo iꞌimakela wapalamane, chapú wani riꞌimakajla wajló. Unkákela kewaka nakaje wapechu iꞌimaká chojé kaphí iꞌimajla, chapú wani riꞌimakajla wajló. Wacháꞌatajla ajopana inaꞌukena wawejápucha aú.

20 Iꞌimaká eꞌiyonaja, kewaka Jesucristo makápoꞌoko piño iꞌimaká. Ajopana, kaja takaꞌakaño, tukumá rimakápoꞌo.

21 Pajluwa inaꞌuké keñoꞌorí wajló takaꞌakaje iꞌimaká, ñaké kaja pajluwaja inaꞌuké keñoꞌorí wajló makápoꞌokajo.

22 Piyukeja inaꞌukena takaꞌajeño, Adán michú nakiyánami weꞌemakale. Jesucristo jaꞌapiyá jemaꞌajeño iꞌimajeño piño jeꞌechú chu ripalamane aú.

23 Jesucristo makápoꞌoro ajopana piyá, rejomi raꞌapiyá jemaꞌajeño makápoꞌojo, riphájika majó wakajé.

24 Riphájika rená chojé kaja penaje wakajé, Jesucristo kapichátaje piyuke jiñana wakáraꞌajeño; nakaje nawakáraꞌakare laꞌakana waꞌató, rikapichátaje naliyá. Rejéchami raꞌajika Raraꞌapá Tupánajlo piyuke raꞌapiyá jemaꞌajeño, riꞌimakáloje nawakáraꞌajeri penaje.

25 Riká cháꞌatajeri piyuke chapú péchuruna rinaku.

26 Rejomi kaja penaje, richáꞌataje takaꞌakaje inaꞌukejlo, rejéchami kaja unká takaꞌakaje iꞌimalaje.

27 Tupana purákaꞌalo lanaꞌakéjami kemari: “Tupana aꞌarí Jesucristo, piyukeja inaꞌukena jemaꞌakáloje raꞌapiyá penaje”. “Piyukeja”, ke, rimaká aú, unká rimalá Tupana nakú, remaꞌakáloje kaja raꞌapiyá penaje. Riká aꞌarí Jesucristo, piyukeja nakaje iꞌimakáloje rileꞌejé waja penaje.

28 Riká aꞌajeri piyukeja nakaje, riꞌimakáloje Jesucristo jaꞌapiyá penaje. Rejomi Riꞌirí Jesucristo aꞌajeri piño piyukeja Raraꞌapajlo, piyukeja yuríkoloje rijló penaje. Rejéchami kaja piyukeja nakaje iꞌimajika Tupana jaꞌapiyá waja.

29 Chuwa numájika piño ijló makápoꞌokajo yukuna nakú: Neꞌiyajena wakáraꞌaño ajopana laꞌaká neká bautizar, nayuríkoloje kaja takaꞌakaño apumí chojé. ¿Naje kaꞌajná nalaꞌá ñaké? Unkákela iná makápoꞌolajojla, unká na penaje kalé nalaꞌajla ilé ke.

30 Weꞌechú kaꞌalá keja wamaka chapú kaje yajwé.

31 Nojena, weꞌechú kaꞌalá keja kaja neꞌerataka numaná. Ilé kaje waꞌateja nuká, inaꞌuké jemaꞌakáloje Tupana jaꞌapiyá penaje. Numá ijló ilé ke, puꞌují nupechu iꞌimakale inaku, wawakáraꞌajeri Jesucristo jaꞌapiyá jemaꞌajeño iꞌimakale.

32 Éfeso e nuꞌumaké wakajé, chapú wani inaꞌuké laꞌaká nuꞌumaká. Nuꞌumaká najló Jesucristo yukuna chona nalaꞌaké nuká chapú. Unká na penaje iná ñaꞌalajla ilé kaje panaku, unkákela kaja takaꞌakaño makápoꞌolojla piño. Ilé ke riꞌimakela, numajla neꞌiyajena kemaká nanakuwá ke: “¡Wajñachi waꞌajnewá, wayuwériꞌicho, akijñojo wakapichájikole!”

33 Jemaꞌaniña pajlákachina jaꞌapiyá. Jemaꞌá meke nemaká: “Palá laꞌajeñó wákeꞌena iꞌimakachu unká inaꞌukélaruna, napichata najwákeꞌena palá laꞌakaná liyá”, ke.

34 Iꞌijnatá piño ipéchuwa palá. Eꞌiyajena nakiyana mapechúruna ke Tupana nakojé weꞌepíkanajlo. Numá inaku ilé ke, raú nopáñaꞌatakaloje inaku penaje.

35 Apala iná kemá kaꞌajná: “¿Meke kaꞌajná kaja takaꞌakaño makápoꞌojiko piño? ¿Meke kaꞌajná nanapona iꞌimajika namakápoꞌojiko ejomi?”

36 ¡Ilé ke kemaká unká wani weꞌepila rinakojé! Marí ke riká: Iná ejátakachu nakaje icha ijí, rikapichó meketánaja, rejomi reñoꞌó.

37 Nakaje icha ijí iná ejátakare, kajné kaꞌajná, apú nakaje icha ijí kaꞌajná, apoꞌojó riká rina liyá.

38 Richa ijí, iná ejátakare, nakiyá rina jeñoꞌorí. Keꞌiyapejé nakaje icha ijí, raú keꞌiyapejé kaja rina paliyáaka. Tupana laꞌarí keꞌiyapejé riká, riphákaloje rinakojó penaje.

39 Apoꞌojó inaꞌuké napona, kamejérina napona liyá; apoꞌojó kaja kayuphéruna napona, ajopana kamejérina napona liyá; apoꞌojó kaja kayuphéruna napona, jíñana napona liyá.

40 Ñaké kaja piyukeja nakaje, iná amákare jeꞌechú chu, ejaꞌawá chu waꞌaté. Apoꞌojó waja riká paliyáaka; apoꞌojó kaja ramákana paliyáaka.

41 Apoꞌojó kamú kamaré, keri kamaré liyá; apoꞌojó kaja keri kamaré, iwijrina kamaré liyá; apoꞌojó kaja iwijrina eꞌiyowá kamaré paliyáaka.

42 Kaja takaꞌakaño iꞌimaká penájemi napona iꞌimajé kaja apoꞌojó paliyáaka, namakápoꞌojiko ejomi. Najaꞌá támijimina, rejeja nakapichó. Namakápoꞌojiko piño ejéchami, kaja unká kapichákajo penaje kalé neꞌemajika, reyá aꞌajná ñoꞌojó.

43 Támijimi najaꞌakare ee, puꞌuwareni riká; namakápoꞌojiko piño ejomi, palani riꞌimajika.

44 Marí ejaꞌawá chu najaꞌá kaja takaꞌaká tami. Eyá wamakápoꞌojiko ejomi, re kaja wanapona iꞌimajé wajé, rijwaꞌaté weꞌemakáloje jeꞌechú chu.

45 Tupana keñoꞌótari inaꞌuké iꞌimaká. Paineko rikeñoꞌótakare ií iꞌimari Adán. Reyá inaꞌuké keñoꞌó ejaꞌawá chu iꞌimakana. Kapechuni, kajmuni Adán iꞌimaká. Eyá Jesucristo iꞌimari kaja Adán ke, ripalamane aú inaꞌuké nakiyana iꞌimajíkale matajnako jeꞌechú chu.

46 Unká jeꞌechú chu iꞌimakana iꞌimalá wajló paineko, ejaꞌawá chu iꞌimakánaja kalé, rapumí chojé weꞌemajé jeꞌechú chu.

47 Teꞌerí nakiyá keñoꞌótakanami Adán iꞌimaká, eyá Jesucristo iphari jeꞌechú chiyá.

48 Teꞌerí nakiyá Tupana keñoꞌótari Adán napona iꞌimaká. Riká keja kaja weká marí ejaꞌawá chu. Eyá Jesucristo jaꞌapiyá jemaꞌajeno napona iꞌimajé rinapona ke kaja.

49 Adán, Tupana keñoꞌótari teꞌerí nakiyá iꞌimaká, iꞌimari weká ke kaja. Jesucristo, jeꞌechú chiyá iphaka majó iꞌimaká, ke kaja weꞌemajika.

50 Nojena, nuwata marí nakú kemakana ijló: Unká méñoꞌojo wanapona, weꞌemakare waꞌaté marí ejaꞌawá chu, iꞌimalajla Tupana waꞌaté jeꞌechú chu, riwakáraꞌaka e. Wanapona, weꞌemakare waꞌaté maare, kapichájero, unká méñoꞌojo riꞌimalajla makapichako.

51 Nuwata iweꞌepika marí, michoꞌojneji inaꞌuké liyá iꞌimaká: Unká piyukeja inaꞌukena takaꞌalaje. Jesucristo iphájika majó wakajé, Tupana apiyákaje wanapona, kaja takaꞌakaño napona waꞌaté.

52 Kiñaja, pherú keja, Tupana apiyákajika wanapona. Marí ke riꞌimajika, riphájika rená chojé kaja penaje wakajé: Luwiluwí kaje mejé keñoꞌojiko ejéchami, kaja takaꞌakaño makápoꞌojo. Reyá aꞌajná ñoꞌojó unká wani na takaꞌalaje. Waꞌató ke Tupana apiyákajika weká, kajmuruna joꞌó iꞌimajíkaño, napona.

53 Kapichákajo penaje iꞌimakaño weká, eꞌiyonaja Tupana apiyákaje weká, weꞌemakáloje makapichako rijwaꞌaté.

54 Ilé riꞌimajika aú, riꞌimajé Ripurákaꞌalo lanaꞌakéjami kemaká rinaku ke: “Tupana palamane, unká inaꞌuké takaꞌalaje riwakajé.

55 Rejéchami, unká takaꞌakaje laꞌalaje weká chapú. Reyá aꞌajná ñoꞌojó, unká takaꞌakaje cháꞌatalaje inaꞌuké piño”, ke rimaká.

56 Meꞌetení takaꞌakaje cháꞌataka inaꞌuké, puꞌuwaré nalaꞌakare pachá. Tupana purákaꞌalo, júpimi nemaꞌajíkare jaꞌapiyá iꞌimaká, kemari na aú ka walaꞌaká puꞌuwaré. Unká wemaꞌalá raꞌapiyá pachá aú, watakaꞌá.

57 ¡Palá wani Tupana laꞌaká weká, richáꞌatakale wajló takaꞌakaje wawakáraꞌajeri Jesucristo palamane aú!

58 Ñakele nojena, íkiꞌija nuwátakarena, ipechu iꞌimá ñakeja kaphí Jesucristo chojé. Iꞌimá pajluwaja chuwá péchuruna raꞌapiyá iꞌimakana aú. Ilaꞌá nakaje richaje, richaje ke, riꞌimakáloje palá Tupánajlo. Ilé ke laꞌakana nakuja iꞌimajé, iweꞌepíkale unká mapeja kalé riká, walaꞌakare Jesucristo waꞌaté, rijló.