5 Jesucristo palamane aú Tupana aꞌarí nuꞌumaká, nuꞌumakáloje raꞌapiyatéjena nakiyana, rejomi nulaꞌakáloje riwakáraꞌaka nuká ke, nuꞌujnakáloje riyukuna iꞌimajé ajopánajlo, ajopánajlo ke, nateꞌeré ewá raꞌapiyá jemaꞌajeño iꞌimakáloje raú penaje.

6-7 Nanakiyana kaja iká, Roma ewá iꞌimakaño. Íkiꞌija Tupana wátaka iká, ñakele riwata iꞌimaká Jesucristo jaꞌapiyá jemaꞌajeño, iꞌimakáloje rileꞌejena inaꞌukena nakiyana raú. Eko wachiꞌinárikana Tupana, eyá wawakáraꞌajeri Jesucristo waꞌaté, laꞌá iká palá, ipechu kawílaꞌako piyá nakaje nakojé.

8 Paineko nuwata Tupánajlo kemakana inaku: Palá pilaꞌaká neká, ajopana puraꞌakole nanaku palá, napechu iꞌimakale kaphí Tupana chojé Jesucristo palamane aú.

9 Tupánajlo nulaꞌá nakaje nupechu lokópaꞌala ejé; nuꞌumá riꞌimataka kaphí Jesucristo chojé péchuruna kapichákajo liyá yukuna ajopánajlo. Rikaja kalé weꞌepiri kewaka nakaje numakare nakú.

10 Nupuraꞌakó kewá Tupana waꞌaté, nupuraꞌó kaja inaku rijwaꞌaté, riwátajika kecha nuꞌujnakáloje amaje.

11 Nuwata amákana, numakáloje ijló meke Tupana laꞌaká palá raꞌapiyá jemaꞌajeño nakú Ripechu jaꞌapiyá iꞌimakana aú, ipechu iꞌimakáloje richaje kaphí richojé.

12 Nuwata kaja waꞌaká pañathéchaka richaje ke, wapechu iꞌimakáloje kaphí Jesucristo chojé.

13 Nojena, nuwata kaja iweꞌepika methú ke nuwátakajla ichaje iꞌijnakana, nomákaloje iká penaje, eꞌiyonaja maárejecha unká meke laꞌajé nuꞌujnalá kaꞌajnó. Nuwata ichaje iꞌijnakana, nukaꞌátakaloje neꞌiyajena eꞌiyajé, napechu iꞌimakáloje Jesucristo chojé kaphí. Ñaké nulaꞌaká ajopana, unká judíona kalé iꞌimakaño nakiyana, apú ewá, apú ewá ke.

14 Piyukeja inaꞌukénajlo riyukuna iꞌimakana noꞌó nunakojó: kajrú weꞌepíkaño nakaje nakojé, eyá unká weꞌepílaño kajrú nakaje nakojejlo waꞌató.

15 Ñakele nuwata wani kaja iká Roma e iꞌimakáñojlo Jesucristo yukuna iꞌimakana.

16 Unká nopáñaꞌalo Jesucristo yukuna iꞌimakana jaꞌapí. Aꞌajeño nanakojó riká, iꞌimajeño kapichákajo liyá. Paineko judíona jemaꞌañó riyukuna iꞌimaká, rejomi unká judíona kalé iꞌimakaño waꞌató jemaꞌañó kaja riyukuna.

17 Riyukuna jemaꞌakana aú waweꞌepí Tupana laꞌaká kaphí richojé péchuruna palá, neꞌemakáloje unká japi laꞌalá puꞌuwaré iꞌimaká ke rijluwa raú. Ñaké kaja Ripurákaꞌalo lanaꞌakéjami kemaká: “Kaphí richojé péchuruna iꞌimajeño matajnako jeꞌechú chu rijwaꞌaté”.

18 Waweꞌepí Tupana, jeꞌechú chu iꞌimakare, yúchaꞌako íkiꞌija wani piyuke inaꞌukena, puꞌuwaré laꞌakana nakuja iꞌimakaño cha, unkale naꞌalá nanakojó kewákaje purákaꞌaloji.

19 Palá iná weꞌepíkajla Tupana nakojé, rikoja raꞌakale inajlo puꞌuwaká naka riká.

20 Unká iná amala Tupana, eꞌiyonaja iná iꞌijnatákachu palá iná péchuwa nakaje rilaꞌakare nakú, iná weꞌepijla naka riká. Rikeñoꞌota piyukeja nakaje iꞌimaká, raú iná weꞌepí kewaka piyukeja wani nakaje laꞌajerí riká. Ñakeja wani riꞌimajika. Piyukeja nakaje Tupana laꞌakare aú iná weꞌepí re riká, ñakele unká meke laꞌajé puꞌuwaré laꞌajeñó kemalajla: “Unká waweꞌepila rinakojé”, ke.

21 Palá naweꞌepika Tupana nakojé, eꞌiyonaja unká wani nephala raꞌapí nachiꞌinárikana ke; unká kaja nemalá rijló: “Palá pilaꞌaká weká”, ke. Lanakiya neꞌejnatá napéchuwa mapeja wani nakaje nakú, ñakele piyukeja nakaje neꞌejnatákare nakú napéchuwa, unká iꞌimalaje na penaje najló. Kalajerúwaka iná iꞌimakachu, unká na iná amala. Ilé ke kaja najló nakaje piyukeja neꞌejnatákare nakú napéchuwa.

22 “Kapechúruna wani weká”, ke napechu nanakuwá, eꞌiyonaja mapechúruna ke wani neká.

23 Kaja napiyaka Tupana, unká tajnákajo penaje kalé iꞌimakare, nakaje jenami kaje aú. Kapichájeño penájena jenami nalaꞌá najluwa. Nephá makaꞌaphana, kamejérina, juni yajné, kajena jenami jaꞌapí, nanaku napechu iꞌimakale, “neká wachiꞌinárikana”, ke. Eyá Tupana, unká kapichákajo penaje kalé iꞌimajika, jaꞌapí unká nephala.

24 Ilé ke nalaꞌaká pachá, Tupana yurí neká, nalaꞌakáloje puꞌuwaré napechu keja pajwaꞌatéchaka, paini wani nayukuna jemaꞌakana.

25 Re Tupana, eꞌiyonaja napechu keja nakeñoꞌótaka najluwa rapumí chojé apoꞌojó riyukuna, nemaꞌakáloje pajlakaje purákaꞌaloji jaꞌapiyá penaje. Ñaké iꞌimakale, chuwa nephá neká, Tupana keñoꞌótakarena iꞌimaká penájemina, jaꞌapí. Lanakiya nayurí naliyó piyukeja nakaje keñoꞌótajeri jaꞌapí iphákana. Riká Tupana keñoꞌótari piyukeja nakaje iꞌimaká, ñakele raꞌapija kalé iphákana palani ñakeja wani. Ñaké riká.

26 Ilé ke nalaꞌaká pachá, Tupana yurí nalaꞌaká puꞌuwaré napechu keja. Paini wani nayukuna jemaꞌakana: Kaja naluna inaana yuriño naliyó achiñana waꞌaté iꞌimakana, nalaꞌakáloje namanáicho nekámika apaꞌawelo waꞌaté.

27 Ñaké kaja achiñana yurika naliyó inaana waꞌaté laꞌakana, napajnoꞌokóloje panakuwáaka nekámika namanáicho laꞌakana nakú pajwaꞌatéchaka. Puꞌuwaré laꞌakaná pajwaꞌatéchaka nakuja neꞌejnatá napéchuwa. Paini wani ilé ke laꞌakana, raú nalaꞌá kaja nanapona chapú wani.

28 Unká pachá nawátala Tupana jaꞌapiyá jemaꞌakana, riyurí neká, nalaꞌakáloje piyukeja puꞌuwaré, napechu nakú riꞌimaká ke, raú nalaꞌá nakaje unká wani paala.

29 Piyukeja wani napechu puꞌuwaré panakuwáaka, namanáicho kaje laꞌakana pajwaꞌatéchaka, nakuja napechu. Nawata kajrú nakaje najluwa; neꞌejnatá kaja napéchuwa chapú ajopana laꞌakana nakú; chapú péchuruna neká; inaꞌuké nójeño neká; mapeja kaja nakulaka ajopana liyá nókakajo; pajlákachina neká; puꞌuwaré péchuruna neká; kachapújreꞌekena kaja neká.

30 Puꞌuwaré napuraꞌakó ajopana nakú; chapú kaja napechu Tupana nakú; nalaꞌá kaja ajopana unká inaꞌukélaruna ke najluwa; unká nephala ajopana jaꞌapí; nalaꞌá kaja nanakuwá weꞌepiño ke wani; nanakuwaja napuraꞌó palá; puꞌuwaré laꞌakaná, namanáicho laꞌakana, kajeja naweꞌepí natukumó; unká kaja nayani jemaꞌalá nachiꞌiná jaꞌapiyá.

31 Unká wani nawátala kewákaje purákaꞌaloji nakojé weꞌepíkana; unká kaja nawátala rimaká ke laꞌakana; unká napechu iꞌimalá palá na nakú; unká naweꞌepila na nakú khaí.

32 Kaja naweꞌepí mékeka Tupana kemaká ilé ke iꞌimakaño nakú, rimá: “Nakapichajo nuliyá ñakeja wani”, ke, eꞌiyonaja unká wani nayurila naliyó ñaké laꞌakana. Palá kaja napechu laꞌakó, ajopana laꞌakachu najwaꞌaté nalaꞌaká ke.