Tupana kemájeri inaꞌuké nakú: mékajenaka neká kewákaje purákaꞌaloji chuwá. Riyukuna marí
2
Marí ke numaká inaꞌuké nakú aú, kaꞌajná pimá: “Meke puꞌuwaré wani laꞌajeñó neká. Ilé kaje pachá Tupana wajaje neká”, ke kaꞌajná pimaká. Eta piká. Ñaké kaja laꞌajerí piká, ñakele pimaká nanaku aú: “Tupana wajaje neká”, ke. Pinakuwá waꞌató pimá ñaké, Tupana wajájikale kaja piká. Unká méñoꞌojo pipuraꞌalajo pichayo, puꞌuwaré laꞌajerí kaja piꞌimakale.
2 Waweꞌepí Tupana wajaka inaꞌuké, nalaꞌakale puꞌuwaré, numakare nakú pachá aú. Unkale nalaꞌalá kewákaje purákaꞌaloji kemaká ke, pachá riwajaje neká.
3 Piká kaꞌajná kemari apú nakú: “Puꞌuwaré laꞌajerí riká”, ke, ñaké kaja laꞌajerí piꞌimaká eꞌiyonaja. Eta, ¿meke chi pipechu pinakuwá? Apala meke kaꞌajná pipechu: “Unká kaꞌajná Tupana wajálaje nuká”, ke.
4 Unká wani piwátala Tupana weꞌepika pimuꞌují. Kajrú wani rijñaꞌaká panaku puꞌuwaré pilaꞌakare, riwátakale pipajnoꞌotaka pipéchuwa puꞌuwaré pilaꞌakare liyá, riwátakale kaja pinaku laꞌakana palá, eꞌiyonaja piphá paꞌapiwá kajrú wani rijló.
5 Meꞌejwirú ke wani pilaꞌaká pinakuwá. Unká wani pipajnoꞌotala pipéchuwa puꞌuwaré pilaꞌakare liyá, pachá pawakata kajrú wani pijluwa chapú kaje yajwé amákana Tupana wajájika inaꞌuké wakajejlo. Riwakajé Tupana kemájeri piyukeja inaꞌukena nakú mékeka nalaꞌakana iꞌimajika, nakaje nalaꞌakare iꞌimaká lokópaꞌala.
6 Puꞌuwaré nalaꞌakare lokópaꞌala, riwajaje neká piyukeja; eyá palá laꞌajeñó, rilaꞌajé nakú palá. Palá nalaꞌakare lokópaꞌala, rilaꞌajé nanaku palá.
7 Palá laꞌajeñó iꞌimajeño palá laꞌakaná nakuja. Nawata Tupana pechu iꞌimaká palá nanaku; nawata kaja makapichako jeꞌechú chu iꞌimakana rijwaꞌaté. Ileruna inaꞌukena nakú Tupana laꞌajé palá; raꞌajé neká, neꞌemakáloje matajnako jeꞌechú chu rijwaꞌaté penaje.
8 Eyá unká wani jemaꞌalaño raꞌapiyá cha riyúchaꞌajo. Riwajaje neká, unká pachá naꞌalá nanakojó kewákaje purákaꞌaloji, rilanakiya nalaꞌakáloje puꞌuwaré.
9 Kajrú wani puꞌuwaré laꞌajeñó amájika chapú kaje yajwé, kewini kaje yajwé waꞌaté. Ilé ke nakaje iꞌimajika judíonajlo, eyá unká judíona kalé iꞌimakáñojlo waꞌató.
10 Nalanakiya, palá Tupana pechu iꞌimajika palá laꞌakaño nakú. Ripuraꞌajó kaja nanaku palá; rilaꞌajé napechu palá wani. Ilé keja nakaje iꞌimajika piyukeja palá laꞌakáñojlo, judíonajlo, eyá unká judíona kalé iꞌimakáñojlo waꞌató.
11 Unkale Tupana wátala inaꞌuké nakiyana ajopana chaje íkiꞌija aú, rimaje piyukeja inaꞌukena nakú rejenowaja palá, mékeka nalaꞌakana iꞌimajika.
12 Piyukeja inaꞌukena ejaꞌawá chu iꞌimakaño laꞌaká puꞌuwaré; piyukeja Tupana kemájika wanaku, mékeka rilaꞌajika weká, nakaje walaꞌakare lokópaꞌala. Eyá unká judíona kalé iꞌimakaño nakú, rimaje mékeka nalaꞌakana iꞌimajika, naweꞌepika nakaje nakojé lokópaꞌala. Eyá judíonajlo re Tupana purákaꞌalo, Moisés michú lanaꞌakare iꞌimaká, yuró. Mékeka nemaꞌaká raꞌapiyá lokópaꞌala, rimaje nanaku mékeka rilaꞌajika neká.
13 Tupánajlo, unká iná iꞌimalá palá laꞌajeñó ke Ripurákaꞌalo jemaꞌakánaja; rijló, palá laꞌajeñó laꞌañó Ripurákaꞌalo kemaká ke.
14 Neꞌiyajénajlo unká Tupana purákaꞌalo, Moisés lanaꞌakare iꞌimaká, yurilo. Unká judíona kalé iꞌimakaño neká, eꞌiyonaja nalaꞌá ripurákaꞌalo nakiyana kemaká ke, naweꞌepíkale ñaké laꞌakana palani. Ripurákaꞌalo keja najló riká napechu nakú.
15 Nakaje nalaꞌakare aú, iná weꞌepí naweꞌepika palá laꞌakaná nakojé, Tupana wátaka ke. Nakaje napechu nakú iꞌimakare aú, naweꞌepí nalaꞌaká nakaje, unká paala kaꞌajná, palani kaꞌajná.
16 Tupana kemájeri piyukeja inaꞌukena nakú mékeka nalaꞌakana iꞌimajika. Riwakajé rimaje kaja nakaje, meꞌechú napechu nakú iꞌimakare, nakú waꞌató. Jesucristo iꞌimataka inaꞌuké kapichákajo liyá yukuna nuꞌumá inaꞌukejlo; riyukuna iꞌimakana nakuja nuká.
Tupana purákaꞌalo, Moisés lanaꞌakare iꞌimaká, yukuna marí
17 Iká kemaño inakuwá: “Judíona jáꞌana weká”, ke, ilaꞌakale Tupana purákaꞌalo, Moisés lanaꞌakare, kemaká ke, raú ilaꞌá inakuwá ajopana cháꞌatajeño ke.
18 Ñakele iweꞌepí palá mékeka riwátaka ilaꞌaká nakaje. Tupana purákaꞌalo, júpimi riyuríkare ijló iꞌimaká, jewíñaꞌatari kaja iká, ilaꞌakáloje palá penaje.
19 Ñakele iká judíona pechu inakuwá: “Weká jewíñaꞌatañojla ajopana unká weꞌepílaño Tupana nakojé, naweꞌepíkaloje rinakojé penaje”, ke ipechu.
20 Kaja iweꞌepí Tupana purákaꞌalo Moisés lanaꞌakare nakojé. Riká kemari kewákaje nakaje nakú, raú kalé ipechu inakuwá: “Unká weꞌepílaño Tupana purákaꞌalo nakojé jenakú laꞌajeñó weká. Wejapa weꞌepíkaño Tupana nakojé jewíñaꞌatajeño kaja weká”, ke ipechu inakuwá.
21 Palani piyukeja ilé ke ilaꞌakare, jewíñaꞌatakale ajopana, eꞌiyonaja iká, ¿naje unká jewíñaꞌatala ikó paineko? Jewíñaꞌata kaꞌajná ajopana, nataꞌaká piyá, eta iká, ¿naje jataꞌá?
22 Imá kaja kaꞌajná ajopánajlo, nalaꞌaká piyá namanáicho ajopana waꞌaté, ajopana waꞌaté, ke, eta iká, ¿naje ilaꞌá ñaké? Chapú ipechu nakaje jenami, nalaꞌakare nachiꞌinárikanawa penaje, nakú. Eta, ¿naje chi aꞌajná jataꞌá nachiꞌinárikana jenami ñakarelana chiyá, nakaje kawemí nojé richu iꞌimakare?
23 Weꞌepiño ke wani ilaꞌaká inakuwá, iweꞌepíkale Tupana purákaꞌalo Moisés lanaꞌakare nakojé, eꞌiyonaja kalé unká wani iphala Tupana jaꞌapí, unkale jemaꞌalá raꞌapiyá.
24 Kewaka riká, Tupana purákaꞌalo lanaꞌakéjami kemakare inaku iꞌimaká, rimá: “Nakaje ilaꞌajíkare pachá, ajopana unká jemaꞌalaño Tupana jaꞌapiyá, puraꞌajeño puꞌuwaré Tupana nakú”.
25 Jemaꞌarí piyukeja Tupana purákaꞌalo Moisés lanaꞌakare iꞌimaká jaꞌapiyajlo, palani mataꞌakeja chinúmari, remaꞌakale Tupana purákaꞌalo jaꞌapiyá. Eyá unká jemaꞌalá raꞌapiyajlo, unká na penaje mataꞌakeja chinúmari iꞌimalá. Unká japi namataꞌalá richinuma keja riká, unkale remaꞌalá Tupana purákaꞌalo. a
26-27 Eyá ajopana, unká judíona kalé iꞌimakaño, laꞌakachu Tupana purákaꞌalo, Moisés lanaꞌakare iꞌimaká, kemaká ke, rileꞌejena neká raú, unká mataꞌakeja kalé nachinuma iꞌimaká eꞌiyonaja. Neká kemájeño mataꞌakeja chinúmaruna iꞌimakaño nakú, mékeka nalaꞌakana iꞌimajika, nakaje nalaꞌakare marí ejaꞌawá chu neꞌemaká ketana pachá. Re Tupana purákaꞌalo najló, eꞌiyonaja unká nemaꞌalá raꞌapiyá.
28 Unká kaja Tupana leꞌejena kalé piyukeja inaꞌukena, mataꞌakeja chinúmaruna iꞌimakaño.
29 Laꞌarí Tupana purákaꞌalo kemaká ke, judío jaꞌa wani. Yuriri puꞌuwaré laꞌakaná, Tupana leꞌejé; ilé kaje unká amalo iná napona nakú. Tupana Pechu laꞌarí iná pechu palá, iná laꞌakáloje palá raú penaje. Tupana pechu iꞌimakachu rinaku palá, iná weꞌepí rileꞌejé riká.