3
Ilé ke riꞌimakale ijló aú, kaꞌajná marí ke inakiyana pechu iꞌimá: “Unká na penaje kalé wajló judío jáꞌana iꞌimakana; unká kaja na penaje kalé wajló wakerákoꞌopana achiñana chinuma mataꞌakana iꞌimalá, unkale raú kalé weꞌemá Tupana leꞌejena”, ke kaꞌajná ipechu.
2 Judíona joꞌó cháꞌataño ajopana, najló Tupana yuríkale ripurákaꞌalo.
3 Neꞌiyajena unká jemaꞌalaño ripurákaꞌalo jaꞌapiyá, raú unká kaja nalaꞌalá rimaká ke. Unká Tupana yurílaje raú rimaká ke nakaje laꞌakana.
4 ¡Unká wani riꞌimalaje ilé ke! Tupana kemaká nakaje laꞌakana nakú iꞌimaká chuwá rilaꞌajé riká, kewákaje purákaꞌaloji chuwá. Pajlákachina waja inaꞌukena, eyá Tupana unká ñaké kalé. Ripurákaꞌalo kemari rinaku:
“Piyukeja weꞌepéjeño rilaꞌaká nakaje rimaká rinaku ke,
raú richáꞌataje piyukeja puraꞌajeño puꞌuwaré rinaku”, ke rimaká Tupana nakú.
5 Apala ipechu iꞌimá kaꞌajná: “Palá laꞌajerí Tupana, eyá weká puꞌuwaré laꞌajeñó. Puꞌuwaré walaꞌakare ijlunami chojé wamá palá nakaje rilaꞌakare, ñakele palani puꞌuwaré laꞌakana. Eta, ¿naje riwajá inaꞌuké richona? Ilé kaje kalé, unká paala”, ke kaꞌajná ipechu Tupana nakú.
6 Unká wani ilé ke kalé riká. Tupana laꞌarí palá. Mapeja ramákelo iná chaje, unká méñoꞌojo rimalajla piyuke inaꞌuké nakú: na aú ka nalaꞌá palá, ke.
7 Apala marí ke ipechu: “Mapeja nupajlájika aú, kaꞌajná ajopana kemájeño Tupana nakú: ‘Unká pajlala riká; inaꞌuké kalé pajlaño mapeja, eyá riká unká pajlala’ ”. Ilé ke napechu iꞌimakela palá Tupana nakú, unká naje nemajla inaku: “Puꞌuwaré laꞌajeñó neká”, ke.
8 Nemá kaꞌajná: “Palani puꞌuwaré laꞌakaná, rijlunami chojé nakaje Tupana laꞌakare amákole palá. Ilé ke Pablo jewíñaꞌataka inaꞌuké rinaku iꞌimaká”, ke nemaká nunaku. ¡Mapeja napajlaka ta! Ilé ke nemaká nunaku pachá Tupana wajaje neká.
Puꞌuwaré laꞌajeñó waja piyukeja inaꞌukena. Riyukuna marí
9 ¿Meke chi ipechu inakuwá? “Judíona weꞌemakale, wacháꞌata ajopana”, ¿ke chi ipechu? ¡Unká wani ta! Kaja piyukeja weká, puꞌuwaré laꞌajeñó waja: judíona, eyá unká judíona kalé iꞌimakaño waꞌató.
10 Tupana purákaꞌalo lanaꞌakéjami kemari:
“Unká pajluwa iꞌimalá laꞌarí palá.
11 Unká na kalé wátari Tupana nakojé weꞌepíkana;
unká na pechu iꞌimalá Tupana wátaka ke laꞌakana nakú.
12 Puꞌuwaré laꞌajeñó waja piyukeja inaꞌukena.
Rejenowaja napechu puꞌuwaré laꞌakaná nakú.
Unká na iꞌimalá palá laꞌajerí;
unká wani pajluwa ñani kaꞌajná iꞌimalá.
13 Ulawí, natoꞌotákare chojé támijimi, ke nanúrupi aphú,
pajlakaje waja napurákaꞌalo.
Jeí laꞌaká chapú iná raꞌapare aú, ke kaja nalaꞌaká iná chapú napurákaꞌalo aú.
14 Puꞌuwaré nojé waja purákaꞌaloji jáchoꞌoro nanuma chiyá.
15 Mapéjari kaje pachá nawata ajopana inaꞌukena nókana.
16 Naꞌapaka ewá nalaꞌá chapú inaꞌuké.
Napachá kajrú ajopana amaka chapú kaje yajwé.
17 Unká naweꞌepila palá pajwaꞌatéchaka iꞌimakana nakojé;
18 unká wani napechu nakú Tupana jaꞌapí iphákana iꞌimalá”,
ke Tupana purákaꞌalo lanaꞌajéjami kemaká.
19 Waweꞌepí piyukeja ripurákaꞌalo, Moisés lanaꞌakare iꞌimaká, kemaká piyukeja inaꞌukena nakú: “Puꞌuwaré laꞌajeñó waja neká, unkale nalaꞌalá rimaká ke”. Piyukeja wani inaꞌukena nakú rimaje mékeka nalaꞌakana iꞌimajika.
20 Unká na kalé kemájeri rinakuwá: “Chuwa kaja lamáꞌatakejami ke nuká Tupánajlo, nulaꞌakale ripurákaꞌalo, júpimi riyuríkare najló iꞌimaká kemaká ke”. Riká aú iná weꞌepí na aú ka iná laꞌaká puꞌuwaré.
Kaphí iná pechu iꞌimakachu Jesucristo chojé, Tupana iꞌimatari iná kapichákajo liyá. Riyukuna marí
21 Unká Tupana purákaꞌalo kemaká ke laꞌakana aú kalé rilamáꞌata weká puꞌuwaré walaꞌakare liyá. Ripurákaꞌalo Moisés lanaꞌakare, eyá ripurákaꞌalo jaꞌapátajeño michuna kemaño kaja ñaké rinaku iꞌimaká.
22 Kaphí iná pechu iꞌimaká Jesucristo chojé aú Tupana lamáꞌatari iná rijluwa, palá laꞌajerí iná iꞌimakale rijló raú. Ñaké waja riká piyukeja inaꞌukénajlo.
23 Piyukeja weká laꞌañó puꞌuwaré, unká na kalé laꞌarí palá Tupana wátaka ke.
24 Eꞌiyonaja kalé Tupana laꞌarí wanaku palá, riweꞌepíkale wamuꞌují. Jesucristo palamane weꞌemakale, riweꞌepí wanaku, unká japi puꞌuwaré laꞌajeñó ke kalé weká rijló.
25 Tupana yuriri nenoka Jesucristo, ritakaꞌakáloje aꞌawaná apiyákakanami nakojé wapumí chojé. Ilé ke rilaꞌaká wachaya palamane, ramó kaphí richojé péchuruna chaje, puꞌuwaré walaꞌakare liyá. Riwakajé rira iꞌijná itapuwa aphumi chiyá. Ilé ke rilaꞌakale, iná weꞌepí Jesucristo palamane Tupana amako wachaje, puꞌuwaré walaꞌakare liyá, raú unká japi puꞌuwaré laꞌajeñó ke kalé weká rijló.
26 Jupi wani rijñaꞌaká panaku weꞌemaká; meꞌetení ejená, riyaꞌatá wajló mékeka rilaꞌaká weꞌemaká, weꞌemakáloje palá laꞌajeñó. Palá laꞌajerí wani Tupana, ñakele rilaꞌá kaja palá laꞌajeñó penaje piyukeja kaphí Jesucristo chojé péchuruna.
27 Marí ke kemakana unká iꞌimalá inajlo: “Tupana purákaꞌalo, júpimi riyuríkare wajló iꞌimaká, kemaká ke laꞌajerí nuká, ñakele palá Tupana pechu nunaku raú”. Unká ñaké kalé riká. Kaphí Jesucristo chojé iꞌimakana aú ja kalé iná iꞌimá unká japi laꞌalá puꞌuwaré ke Tupánajlo.
28 Kaja waweꞌepí mékeka iná iꞌimaká, iná iꞌimakáloje unká japi laꞌalá puꞌuwaré ke Tupánajlo. Kaphí Jesucristo chojé iꞌimakana aú ja kalé iná iꞌimá palani ke rijló. Unká Tupana purákaꞌalo, júpimi riyuríkare wajló iꞌimaká, kemaká ke laꞌakana aú kalé.
29 ¿Meke ke chi ipechu Tupana nakú: “Judíonajlo penájeja kalé riká”, ke kaꞌajná? ¿Unká chi piyukeja inaꞌukénajlo penaje kalé riká? Aꞌa, piyukeja wani inaꞌukénajlo penaje Tupana.
30 Re pajluwaja wachiꞌinárikana, unká na apú iꞌimalá. Rejenowaja Tupánajlo judíona, unká judíona kalé iꞌimakaño waꞌaté. Kaphí Jesucristo chojé péchuruna iꞌimaño unká japi laꞌalaño puꞌuwaré ke rijló.
31 Apala ipechu: “Chuwa unká na penaje kalé wajló Tupana purákaꞌalo, júpimi riyuríkare wajló iꞌimaká; kaja kaphí wapechu Tupana chojé, ñakele unká na penaje kalé riká”, ke kaꞌajná ipechu. ¡Unká ñaké kalé riká! Kaphí Jesucristo chojé iꞌimakana aú iná laꞌá rimaká ke.