Abraham michú yukuna marí
4
Chuwa wemaꞌajika mékeka nakaje iꞌimaká, waꞌajuta Abraham michujlo iꞌimaká yukuna.
2-3 Nemakela Abraham nakú, “Palá laꞌajerí riká Tupánajlo”, ke, nakaje rilaꞌakare aú, palá ripechu iꞌimakajla rinakuwá raú, eꞌiyonajaa Tupánajlo unká na penaje riꞌimalajla. Ripurákaꞌalo lanaꞌakéjami kemari: “Kaphí Abraham pechu iꞌimakale Tupana chojé aú rimá rinaku: ‘Palá laꞌajerí riká’ ”, ke.
4 Ñaké riká. Iná jápakachu apú waꞌaté, raꞌá inajlo iná jápakaꞌala wemí. Unká mapeja kalé rilamáꞌataka iná raú; iná jápaka rijwaꞌaté wemí raꞌá inajlo riká.
5 Eyá Tupana, kaphí iná pechu iꞌimaká richojé aú, rilaꞌá iná rijluwa unká japi laꞌalá puꞌuwaré ke, puꞌuwaré laꞌajerí iná iꞌimaká eꞌiyonaja. Unká na walaꞌalá rijló, rilaꞌakáloje ñaké wanaku, eꞌiyonaja rilaꞌá weká palá.
6 David michú puraꞌaró kaja rinaku iꞌimaká, mékeka Tupana laꞌaká inaꞌuké, neꞌemakáloje unká laꞌalaño puꞌuwaré ke rijló. Puꞌuwaré laꞌajeñó neꞌemaká eꞌiyonaja, unká Tupana aꞌalá rinakojó nakaje nalaꞌakare puꞌuwaré.
7 Marí ke David kemaká iꞌimaká:
“Puꞌují péchuruna, piyukeja Tupana amákarona chaje puꞌuwaré nalaꞌakare liyá,
unkale raꞌalá rinakojó puꞌuwaré nalaꞌakare iꞌimaká.
8 Puꞌují péchuri riká, unká Tupana kemalare nakú: ‘Puꞌuwaré laꞌajerí riká’, ke”,
ke David kemaká.
9 ¿Piyukeja mataꞌakeja chinúmaruna nakú chi rimá ñaké, mamataꞌakánaru chinúmaruna nakú waꞌató kaꞌajná? Kaja wemicha iꞌimichaka, Tupana kemari Abraham nakú: “Unká japi puꞌuwaré laꞌajerí ke kalé nojló riká”, kaphí ripechu iꞌimakale richojé.
10 Eta, ¿na wakajé chi rimá rinaku ñaké iꞌimaká? ¿Namataꞌaká richinuma iꞌimaká ejomi kaꞌajná, namataꞌaká riꞌimaká piyá kaꞌajná? Unká namataꞌaká richinuma iꞌimaká ejomi kalé, ripiyá rimá rinaku ñaké iꞌimaká.
11 Rejomi namataꞌá richinuma iꞌimaká; ripiyá Tupana kemari rinaku iꞌimaká: “Unká japi puꞌuwaré laꞌajeri ke kalé riká nojló”, ke, kaphí ripechu iꞌimakale richojé. Ilé ke Abraham iꞌimakale, riyuró piyukeja kaphí Tupana chojé péchuruna piyana ke. Unká mataꞌakeja kalé nachinuma iꞌimaká eꞌiyonaja, Tupana kemari kaja nanaku: “Unká japi puꞌuwaré laꞌajeñó ke kalé neká nojló”, ke.
12 Rikaja kaja Abraham yuriro piyukeja mataꞌakeja chinúmaruna iꞌimakaño piyana ke, napechu iꞌimakale kaphí wani Tupana chojé, júpimi nachiꞌiná michuna pechu iꞌimajika ke kaja, unká chiyó namataꞌá nachinuma iꞌimaká.
Tupana arukari nakaje kaphí richojé péchurunajlo. Riyukuna marí
13 Tupana arukari Abrahamjlo, rilakénamijlo waꞌaté, piyukeja ejaꞌawá yuríkoloje nalakénamijlo penaje. Unká rarukala najló riꞌimaká, nalaꞌakale piyukeja Ripurákaꞌalo lanaꞌakéjami kemaká ke aú. Rilaꞌá nanaku palá, kaphí napechu iꞌimakale richojé.
14 Nakaje Tupana kemakare nakú iꞌimakela Ripurákaꞌalo, júpimi riyuríkare najló iꞌimaká, jaꞌapiyá jemaꞌajéñojloja, unká na penaje kalé iná pechu iꞌimajla kaphí Tupana chojé. Unká kaja na penaje kalé nakaje rarukákare inajlo iꞌimalajla.
15 Tupana wajájeri piyukeja unká laꞌalaño Ripurákaꞌalo, júpimi riyuríkare wajló iꞌimaká, kemaká ke. Kaja rinakojé weꞌepíkana aꞌá inajlo puꞌuwaká puꞌuwaré walaꞌakare. Unkákela riꞌimajla, unká waweꞌepílajla puꞌuwaré walaꞌakare nakojé.
16 Ñakele piyukeja nakaje Tupana kemakare nakú Abrahamjlo iꞌimaká, iꞌimajeri rilakénamijlo, rimaká rinaku ke. Mapeja rilaꞌaká nanaku palá, napechu iꞌimakale kaphí richojé. Unká Ripurákaꞌalo kemaká ke laꞌajéñojloja kalé Tupana aruká nakaje; raruká kaja nakaje kaphí richojé péchurunajlo, Abraham pechu iꞌimaká ke kaja. Ilé kaje aú riká yuriro piyukeja kaphí Tupana chojé péchuruna piyana ke.
17 Tupana purákaꞌalo kemari rinaku: “Noꞌojé piká piyukeja wani inaꞌuké piyana ke penaje”, ke. Riká Tupana, kaphí Abraham pechu iꞌimakare chojé, makápoꞌotari kaja, kaja takaꞌakaño. Rikeñoꞌota kaja nakaje unká joꞌó iꞌimalare, piyukeja laꞌajerí riꞌimakale.
18 Mayanikéruja Abraham kapichákojla iꞌimaká, eꞌiyonaja ripechu iꞌimá kaphí wani Tupana chojé, raú rilaꞌá ripéchuwa kaphí richojé. Ripalamane kajrú wani inaꞌukena mothoꞌoká piyukeja ejaꞌawá chuwá iꞌimaká, Tupana kemaká rijló iꞌimaká ke. Rimá rijló iꞌimaká: “Kajrú wani inaꞌukena iꞌimajika pipalamane aú”, ke.
19 Unká wani Abraham pechu yurila Tupana chojé kaphí iꞌimakana, cien jarechí cha riꞌimaká eꞌiyonaja. Kaja riweꞌepí yewíchaja rená iphaka najló, natakaꞌakáloje, riyajalo waꞌaté, kaja pheñawilana wani neꞌemakale, raú unká kaja meke laꞌajé neꞌerí iꞌimalajla.
20-21 Eꞌiyonaja unká ripechu iꞌimalá Tupana nakú: “Unká kaꞌajná riꞌimalaje nojló, rimaká nojló iꞌimaká ke”. Lanakiya rilaꞌá ripéchuwa kaphí wani Tupana chojé. Palá kaja ripuraꞌakó rinaku, ripechu iꞌimakale rinaku: “Piyukeja wani laꞌajerí riká, ñakele rilaꞌá rimaká inajlo ke”.
22 Ilé ke ripechu iꞌimakale, Tupana kemari rinaku: “Palá wani laꞌajerí riká, kaphí wani ripechu iꞌimakale nochojé”, ke.
23 Unká Abraham nakuja kalé Tupana kemari ñaké iꞌimaká.
24 Rimá kaja wanaku ñaké, wapechu iꞌimakale kaphí riká, Tupana makápoꞌotakare iꞌimaká, Jesucristo chojé aú.
25 Riká Tupana yurí nenoka iꞌimaká, puꞌuwaré walaꞌakare chaya, rejomi rimakápoꞌo piño iꞌimaká. Ñaké rilaꞌakale wachaya, chuwa unká japi puꞌuwaré laꞌajeñó ke kalé weká Tupánajlo.