Jesucristo palamane yukuna marí
5
Kaja chuwa unká Tupana aꞌalá rinakojó puꞌuwaré walaꞌakare, kaphí wapechu iꞌimakale richojé, raú palá weká rijwaꞌaté Jesucristo palamane aú.
2 Jesucristo palamane aú weká chuwa Tupana leꞌejena inaꞌukena, kaphí wapechu iꞌimakale richojé, raú palá weká, raꞌakale wañathé. Puꞌují kaja wapechu, waweꞌepíkale weꞌemajika palá wani rijwaꞌaté ñakeja.
3 Unká raú ja kalé wapechu puꞌují; wapechu iꞌimajé kaja puꞌují, chapú kaje yajwé wamájika wakajé. Chapú kaje yajwé wamákare laꞌarí wapechu kaphí wani Tupana chojé, wajñaꞌakáloje riká panaku.
4 Ilé ke wapechu iꞌimajika ee kaphí, chapú kaje yajwé wamájika wakajé ee, palá Tupana pechu iꞌimajika wanaku. Raú unká wapechu laꞌalajo ujwí riliyá.
5 Unká wapechu laꞌaló ujwí Tupana liyá, kajrú wani riwátakale weká, Ripechu weꞌiyá iꞌimakare palamane aú. Raú kaja wawata riká íkiꞌija.
6 Wekó, unká meke laꞌajé weꞌematálajla wekó iꞌimaká, raú Jesucristo takaꞌarí rená chu, puꞌuwaré walaꞌakare chaya iꞌimaká.
7 Unká na yurílajla richó mapeja ajopánajlo, nenókaloje riká apú chaya penaje, palá laꞌajerí riꞌimaká eꞌiyonaja. Apala pajluwa kaꞌajná wátarijla nenoka riká apú chaya, palá wani rilaꞌakale kaꞌajná riꞌimaká.
8 Puꞌuwaré laꞌajeñó joꞌó weꞌemaké wakajé, Tupana yurí Jesucristo takaꞌaká puꞌuwaré walaꞌakare chaya iꞌimaká. Raú waweꞌepí íkiꞌija wani riwátaka weꞌemaká.
9 Unká Tupana aꞌalaje piño rinakojó puꞌuwaré walaꞌakare, raú chuwa unká japi laꞌalaño puꞌuwaré ke weká rijló. Weꞌemajó kaja riwajájika inaꞌuké wakajé liyá, Jesucristo palamane aú.
10 Chapú wani joꞌó wapechu iꞌimaká Tupana nakú iꞌimaká wakajé, rilamáꞌata weꞌemaká rijluwa, riwakáraꞌakale Riꞌirí Jesucristo takaꞌaká wachaya, raú weꞌemakóloje kapichákajo liyá.
11 Unká ilé keja kalé weꞌemajika; richaje wani wapechu iꞌimajika palá Tupana nakú, Jesucristo palamane aú weꞌemakale chuwa palá wani Tupana waꞌaté.
Adán michú yukuna marí
12 Pajluwaja inaꞌuké pachá puꞌuwaré laꞌakaná keñoꞌó marí ejaꞌawá chu iꞌimaká. Ripachá kaja piyukeja inaꞌukena kapichó marí ejaꞌawá chu. Reyá wakeñoꞌó kapichákajo, puꞌuwaré laꞌajeñó waja weꞌemakale.
13 Unká chiyó Moisés lanaꞌá Tupana purákaꞌalo júpimi iꞌimaká, kaja puꞌuwaré laꞌakaná iꞌimá ejaꞌawá chu. Riwakajé unká nanaku kemakana iꞌimaké: “Puꞌuwaré laꞌajeñó neká”, ke.
14 Adán michú iꞌimaká, eyá aꞌajná Moisés michú iꞌimaká ejená, natakaꞌá piyukeja iꞌimaká, nalaꞌakale puꞌuwaré. Unká nalaꞌalá puꞌuwaré, Adán laꞌaká iꞌimaká ke, eꞌiyonaja nakapichó kaja ripachá. Riká unká laꞌalá Tupana wakáraꞌaka ke iꞌimaká.
15 Nakaje unká wani paala Adán laꞌakare iꞌimaká, nakú unká meke laꞌajé wemalajla nakaje, Tupana yuríkare wajló, ke kaja riká. Pajluwa inaꞌuké laꞌaká pachá puꞌuwaré, piyukeja inaꞌukena kapichó, eꞌiyonaja kalé Tupana weꞌepiri wamuꞌují pajluwa inaꞌuké palamane aú. Riká Jesucristo, piyukeja ajopana chaje iꞌimaká, laꞌarí palá kajrú wani inaꞌukena nakú.
16 Pajluwaja laꞌaká pachá puꞌuwaré, piyukeja inaꞌukena kapichó. Eyá nakaje Tupana aꞌakare wajló Jesucristo palamane aú, weꞌemaojla kapichákajo liyá, weꞌemakáloje raú unká japi puꞌuwaré laꞌajeñó ke kalé Tupánajlo.
17 Pajluwaja laꞌaká puꞌuwaré pachá, takaꞌakaje keñoꞌó piyukeja inaꞌukejlo iꞌimaká. Eyá pajluwaja kaja palamane aú, Tupana aꞌarí wajé iꞌimakaje, inaꞌuké iꞌimakáloje rijwaꞌaté jeꞌechú chu ñakeja wani, unká riwemí aú kalé riká. Jesucristo takaꞌakale nachaya iꞌimaká, palamane riká neꞌemakáloje unká japi puꞌuwaré laꞌajeñó ke kalé Tupánajlo.
18 Puꞌuwaré Adán laꞌaká iꞌimaká pachá, piyukeja inaꞌukena kapichó Tupana liyá. Eyá nakaje palá Jesucristo laꞌakare iꞌimaká, laꞌarí palá kajrú inaꞌukena nakú, neꞌemakáloje matajnako Tupana waꞌaté penaje.
19 Unká pachá pajluwaja inaꞌuké jemaꞌalá palá Tupana jaꞌapiyá, piyukeja inaꞌukena puꞌuwaré laꞌajeñó waja. Eꞌiyonaja kalé pajluwa inaꞌuké jemaꞌakale wani Tupana jaꞌapiyá, kajrú inaꞌukena iꞌimajika lamáꞌatakejami ke rijló.
20 Tupana purákaꞌalo, júpimi riyuríkare najló iꞌimaká, nakojé weꞌepíkana aꞌarí inajlo puꞌuwaká puꞌuwaré iná laꞌakare, raú iná weꞌepí kaja Tupana weꞌepika puꞌuwaré laꞌajeñó muꞌují.
21 Kapichájeño penájena waja weꞌemaká, walaꞌakale puꞌuwaré. Tupana weꞌepíkale wamuꞌují, rilaꞌá weká palá laꞌajeñó ke rijluwa. Raꞌá kaja wajló iꞌimakaje, weꞌemakáloje rijwaꞌaté matajnako wawakáraꞌajeri Jesucristo palamane aú.