Jesucristo palamane aú iná iꞌimá palá laꞌajerí. Riyukuna marí
6
Eta chuwa, ¿meke chi weꞌemajika? ¿Ñakeja chi weꞌemajika puꞌuwaré laꞌakaná nakú, raú Tupana weꞌepíkaloje richaje wani wamuꞌují?
2 ¡Unká wani ta weꞌemalaje ilé ke laꞌakana nakú! Kaja takaꞌakaño ke weká puꞌuwaré laꞌakanajlo, ñakele unká na penaje weꞌemalajla re joꞌó kaja puꞌuwaré laꞌakaná nakú.
3 Iweꞌepí pajluwa keja wayuriko Jesucristo waꞌaté, raú nalaꞌá bautizar raꞌapiyá jemaꞌajeño. Pajluwa keja weꞌemakale rijwaꞌaté, watakaꞌá kaja rijwaꞌaté pajñakani nenoka wakajé riꞌimaká.
4 Jesucristo takaꞌaká, eyá rimakápoꞌoko piño iꞌimaká, jenami nalaꞌá raú. Ripechu jaꞌapiyá iꞌimakana aú weká wajé iꞌimakaje jaꞌapiyá. Piyukeja wani laꞌajerí Jesucristo jaraꞌapá iꞌimakale, rimakápoꞌota riꞌimaká.
5 Pajluwa keja weꞌemakale Jesucristo waꞌaté aú, ritakaꞌaká wachaya iꞌimaká aú, kaja watakaꞌá ke rijwaꞌaté iꞌimaká. Eyá rimakápoꞌoko piño iꞌimaká wakajé, wamakápoꞌo ke kaja rijwaꞌaté iꞌimaká.
6 Kaja waweꞌepí piyukeja nakaje, puꞌuwaré walaꞌakare iꞌimaká, kapichó, Jesucristo takaꞌaká wachaya iꞌimaká wakajé. Raú rikapichata waliyá piyuke puꞌuwaré walaꞌakare iꞌimaká, weꞌemaká piyá puꞌuwaré laꞌakaná nakuja.
7 Kaja takaꞌaká penájemi, unká meke laꞌajé laꞌalá puꞌuwaré.
8 Waweꞌepí kaja watakaꞌá ke Jesucristo waꞌaté iꞌimaká, raú kaphí wapechu richojé, waweꞌepíkale weꞌemajika rijwaꞌaté ñakeja wani.
9 Waweꞌepí Jesucristo makápoꞌoko iꞌimaká, eyá chuwa kaja unká ritakaꞌalaje piño, unká méñoꞌojo kapichákajo cháꞌatalaje piño riká.
10 Ritakaꞌá pajluwa peja piyuke puꞌuwaré inaꞌuké laꞌakare chaya iꞌimaká; eyá meꞌetení kajmuni riká, rilaꞌakáloje piyukeja Tupana wátaka ke.
11 Ipechu iꞌimá inakuwá: kaja takaꞌakaño ke puꞌuwaré laꞌakanajlo. Eyá Jesucristo waꞌaté iꞌimá kajmuruna ke, ilaꞌakáloje palá piyuke nakaje Tupánajlo.
12 Ñakele iyuríniña puꞌuwaré laꞌakaná cháꞌataka iká. Kapichákajero penaje iná napona, ñakele ilaꞌaniña puꞌuwaré, inapona wátaka ilaꞌaká ke.
13 Ilaꞌaniña puꞌuwaré inapona aú, lanakiya iyurí ichó Tupánajlo. Inaꞌuké kaja takaꞌakaño iꞌimaká penájemi ke iká, makápoꞌoño piño, iꞌimakáloje kajmuruna penaje. Ñakele ilaꞌá piyukeja palá Tupana wátaka ke,
14 raú unká puꞌuwaré laꞌakaná cháꞌatalaje iká. Chuwa unká Tupana purákaꞌalo, Moisés lanaꞌakare iꞌimaká, jaꞌapiyá kalé iká, Jesucristo palamane iꞌimakale, raú ilaꞌá palá.
Apú waꞌaté jápajeño ke weká yukuna marí
15 Eta chuwa, unkale weꞌemalá Tupana purákaꞌalo Moisés lanaꞌakare jaꞌapiyá, ¿aú chi walaꞌajé puꞌuwaré, Tupana palamane weꞌemakale? ¡Unká wani ta walaꞌalaje ilé ke!
16 Kaja iweꞌepí apú waꞌaté jápajeri iná iꞌimakachu, iná jemaꞌá palá raꞌapiyá, rijwaꞌateje iná iꞌimakale. Ñaké kaja iká: jemaꞌajika ee puꞌuwaré laꞌajerí wakáraꞌajeri jaꞌapiyá, ikapichajo; eyá jemaꞌajika ee Tupana jaꞌapiyá, iꞌimajé palá laꞌakaná nakuja.
17 Palá wani Tupana laꞌaká inaku: puꞌuwaré laꞌakaná nakuja wani iꞌimaké, eꞌiyonaja wechi jemaꞌaká newíñaꞌatakare iká nakú jaꞌapiyá iꞌimaká.
18 Ñakele chuwa unká puꞌuwaré laꞌajerí wakáraꞌajeri jaꞌapiyá kalé iká, kaja meꞌetení palá laꞌakaná nakú wakáraꞌajeri jaꞌapiyá iká.
19 Nuweꞌepí unká joꞌó iweꞌepila palá piyukeja, meke kemakana numakare nakú ijló, nakojé. Júpimi ipechu iꞌimaké puꞌuwaré kaje laꞌakana nakuja. Chuwa ilaꞌá piyukeja palá, Jesucristo palamane aú iꞌimakáloje palá laꞌajeñó penaje.
20 Iꞌimajika wakajé puꞌuwaré laꞌakaná wakáraꞌajeri jaꞌapiyá, unká wani iwátake palá laꞌakaná.
21 Eta chuwa, ¿na aú chi puꞌuwaré laꞌakaná aꞌá iñathé iꞌimaká? Meꞌetení kajrú wani apáñaꞌako ilé ke ilaꞌajíkare iꞌimaká jaꞌapí. Ripachá ikapichákojla,
22 eꞌiyonaja chuwa unká jemaꞌalá puꞌuwaré laꞌakaná wakáraꞌajeri jaꞌapiyá. Kaja iꞌimaó riliyá, ñakele ilaꞌá meꞌetení Tupana wátaka ke. Ilé ke laꞌakana aꞌajeri kajrú wani iñathé, iꞌimakáloje palá laꞌajeñó penaje; ripalamane kaja iꞌimajé matajnako jeꞌechú chu Tupana waꞌaté.
23 Re riwemí puꞌuwaré laꞌajéñojlo: nakapichajo Tupana liyá, ilé ke riwemí iꞌimajika najló. Tupana aꞌarí inajlo iꞌimakaje, iná iꞌimakáloje matajnako wawakáraꞌajeri Jesucristo waꞌaté. Mapeja raꞌaká riká, unká riwemí iꞌimalá.