Iná weꞌepíkaloje mékeka inajlo Tupana purákaꞌalo penaje yukuna marí
7
Nojena, kaja iweꞌepí iwakáraꞌajeño purákaꞌalo nakojé. Raú iweꞌepí kaja marí ejaꞌawá chu weꞌemaká ketánaja kalé riwakáraꞌaka weká.
2 Inanaru wáꞌakako ejomi, ruyajná purákaꞌalo jaꞌapiyá ruká, ruꞌumaká rijwaꞌaté ketana. Rikapicháñaaka ruká ejomi, kaja unká ruꞌumalá raꞌapiyá, ke Tupana purákaꞌalo kemaká runaku.
3 Ñakele ruꞌumakela apú achiñá waꞌaté, re joꞌó kaja ruyajná iꞌimanoja rujwaꞌaté, rulaꞌajla puꞌuwaré raú. Eyá ruyajná kapicháñaaka ruká ejomi, ruꞌumakela apú achiñá waꞌaté, unká rulaꞌalajla puꞌuwaré raú.
4 Ñaké kaja ijló riká, nojena. Pajluwa keja iká Jesucristo waꞌaté. Ñakele ritakaꞌaká iꞌimaká wakajé, rikapichata rijwaꞌató iliyá Moisés purákaꞌalomi, júpimi iꞌimakare jaꞌapiyá. Jesucristo makápoꞌoro piño rapumí chuwá iꞌimaká. Rijwaꞌatéjena weꞌemakale, walaꞌajla piyuke nakaje riꞌimakáloje palá Tupánajlo.
5 Wapechu keja walaꞌajika puꞌuwaré wakajé, waweꞌepike Tupana purákaꞌalo, júpimi riyuríkare wajló nakojé, walaꞌaká piyá puꞌuwaré. Waweꞌepíjika rinakojé eꞌiyonaja, richaje wani wawátake puꞌuwaré laꞌakaná, ñaké walaꞌajika pachá wakapichákojla.
6 Chuwa unká weꞌemalá Moisés purákaꞌalomi jaꞌapiyá, kaja takaꞌakaño ke weꞌemakale riliyá. Ñakele walaꞌajé chuwa Tupana wátaka ke, wajé chuwá wapechu iꞌimakale Ripechu aú.
Puꞌuwaré laꞌajerí nuꞌumaká, riyukuna marí
7 Eta chuwa, ¿wemaje chi Moisés purákaꞌalomi nakú: “Puꞌuwaré iná laꞌakáloje penaje riká”, ke? ¡Unká wani ta ilé kaje penaje kalé riká! Unkákela riꞌimajla, unká nuweꞌepílajla puꞌuwaré nulaꞌakare nakojé. Ripurákaꞌalo kemari: “Piwátaniña pijluwa ajopana nane”. Riwátakana aú nuweꞌepí puꞌuwaré nulaꞌaká.
8 Eꞌiyonaja puꞌuwaré laꞌakaná cháꞌata nupechu, nuweꞌepí mékeka Tupana purákaꞌalo, júpimi riyuríkare wajló, kemaká eꞌiyonaja. Unká chu iná weꞌepila ripurákaꞌalo nakojé, unká kaja iná weꞌepila na aú ka iná laꞌá puꞌuwaré.
9 Jupejé, unká chiyó nuweꞌepí mékeka ripurákaꞌalo kemaká, nuꞌumaké manaꞌija. Nuweꞌepí rinakojé kecha, nuweꞌepí kaja puꞌuwaré nulaꞌakare nakojé. Puꞌuwaré nulaꞌakare pachá nukapichojla.
10 Iná iꞌimakáloje matajnako rijwaꞌaté jeꞌechú chu penaje, iná jemaꞌá Tupana purákaꞌalo jaꞌapiyá. Eꞌiyonaja kalé unká pachá nomaꞌalá raꞌapiyá, nukapichojla.
11 Nuweꞌepí ripurákaꞌalo nakojé, eꞌiyonaja puꞌuwaré laꞌakaná cháꞌata nuká, ñakele nukapichákojla Tupana liyá.
12 Ñakele wemajla Tupana purákaꞌalo, júpimi riyuríkare nakú: “Palani waja riká piyukeja, riwakáraꞌakale walaꞌaká palá, raú weꞌemakáloje unká japi laꞌalaño puꞌuwaré ke Tupánajlo”.
13 Eta, ¿naje chi numá rinaku, “palani riká”, ke, nukapichákojla eꞌiyonaja? Unká ilé ke kalé riká; puꞌuwaré nulaꞌakare pachá nukapichákojla. Ripurákaꞌalo palani aú nuweꞌepí puꞌuwaré nulaꞌakare nakojé.
14 Nuweꞌepí Tupana liyaje ripurákaꞌalo. Ñakele palani riká, eꞌiyonaja kalé unká nuliyá iꞌimalá, nulaꞌakáloje rimaká ke penaje. Kaja puꞌuwaré laꞌakaná cháꞌata nupechu, nulaꞌakáloje puꞌuwaré.
15 Unká nuweꞌepila mékeka nupechu, nájeka unká nulaꞌalá palá. Palá nuwátakare laꞌakana, unká nulaꞌalá. Lanakiya nulaꞌano nakaje unká nuwátalare laꞌakana.
16 Nulaꞌakale nakaje puꞌuwaré, unká nuwátalare laꞌakana, kaje aú nuweꞌepí palani Tupana purákaꞌalo.
17 Ñakele unká nuká kalé laꞌarí puꞌuwaré. Kakámeꞌe nuꞌumakale puꞌuwaré laꞌakaná nakú aú, nulaꞌano ñaké.
18 Nuweꞌepí unká palá laꞌakaná iꞌimalá nupechu nakú, unkale nuliyá iꞌimalá nulaꞌakáloje palá penaje. Re nupechu nakú palá laꞌakaná, eꞌiyonaja unká meke laꞌajé nulaꞌalá ñaké.
19 Unká nulaꞌalá palá nuwátakare laꞌakana, eyá puꞌuwaré unká nuwátalare laꞌakana, kaje nulaꞌá.
20 Nulaꞌakachu nakaje unká nuwátalare laꞌakana, nulaꞌá riká, puꞌuwaré laꞌakaná iꞌimakale nuwakáraꞌajeri ke.
21 Ñakele nuweꞌepí chuwa nuwátakajla palá laꞌakaná, eꞌiyonaja unká nupechu iphala ñaké laꞌakana lokópaꞌala.
22 Nupechu aú kajrú nuwátaka Tupana purákaꞌalo,
23 re kalé nupechu nakú nakaje unká yurila nuꞌujnataka nupéchuwa palá. Riká, puꞌuwaré laꞌakaná nupechu nakú iꞌimakare, unká yurila nulaꞌaká na palá, kaja wajákeja keja nuká rijwaꞌaté.
24 Ilé kaje laꞌarí kamuꞌují wani nupechu, kapichákajo penaje nuꞌumakale Tupana liyá. ¿Na iꞌimatárijla nuká riliyá?
25 Tupánaja kalé iꞌimatárijla nuká riliyá, raú numá rijló: “Palá pilaꞌaká nuká, piꞌimatájikale nuká Jesucristo palamane aú”, ke. Nuwata Tupana purákaꞌalo kemaká ke laꞌakana, eꞌiyonaja unká nuliyá iꞌimalá ñaké laꞌakanajlo, puꞌuwaré laꞌakaná cháꞌatakale nupechu.