Tupana Pechu jaꞌapiyá iꞌimakana yukuna marí
8
Chuwa unká Tupana wajálaje pajluwa keja iꞌimakaño Jesucristo waꞌaté, laꞌañó Tupana Pechu wakáraꞌaka ke, unká laꞌalaño nakaje napechu keja.
2 Wajé iꞌimakaje, Tupana Pechu jaꞌapiyá iꞌimakana aú, iná iꞌimaó puꞌuwaré laꞌakaná chiyá. Raꞌapiyá jemaꞌakana aú iná laꞌá Tupana wátaka ke; raú kaja iná iꞌimaó kapichákajo liyá.
3 Unká meke laꞌajé walaꞌalá Tupana purákaꞌalo kemaká ke, unkale wapechu iphala rilaꞌakana lokópaꞌala. Riwakáraꞌa Riꞌirí majó iꞌimaká. Weká ke kaja riꞌimaká inaꞌuké, marí ejaꞌawá chu riꞌimaká wakajé. Tupana yurí nenoka riká wapumí chojé iꞌimaká, piyukeja puꞌuwaré walaꞌakare chaya, raú raꞌapata weká puꞌuwaré laꞌakaná chiyá.
4 Rilaꞌá ñaké wachaya iꞌimaká, ripalamane aú walaꞌakáloje palá nakaje ripurákaꞌalo kemaká ke. Kaja unká jupejé weꞌemajika ke kalé weká meꞌetení, Tupana Pechu jaꞌapiyá weꞌemakale.
5 Puꞌuwaré laꞌakaná nakú iꞌimakaño, kaja keja puꞌuwaré laꞌakaná nakú neká, unká nawátala riyuríkana naliyó. Eyá Tupana Pechu jaꞌapiyá iꞌimakaño laꞌañó palá raꞌapiyá.
6 Wátaño nakaje laꞌakana puꞌuwaré napechu keja, kapichájeño. Eyá laꞌañó nakaje palá Tupana Pechu jaꞌapiyá ke, iꞌimajeño matajnako rijwaꞌaté, unká na nakojé kalé napechu kawílaꞌo.
7 Wátaño nakaje laꞌakana napechu keja, pechu chapú Tupana nakú. Unká nawátala Ripurákaꞌalo nakojé weꞌepíkana; unká kaja naliyá iꞌimalá, nemaꞌakáloje raꞌapiyá penaje.
8 Ñakele napechu keja laꞌakaño nakaje, unká meke laꞌajé laꞌalaño nakaje palani iꞌimakare Tupánajlo.
9 Eyá iká, kaja unká ilaꞌalá nakaje ipechu keja. Tupana Pechu wátaka ke laꞌajeñó iká, Ripechu iꞌimakale eꞌiyá. Unká Tupana Pechu iꞌimalare eꞌiyá, unká Jesucristo waꞌateje kalé riká
10 Jesucristo Pechu jaꞌapiyá iná iꞌimakachu, iná pechu iꞌimajé makapichako rijwaꞌaté jeꞌechú chu. Marí ke ijló riká, Tupana amákole ichaje puꞌuwaré ilaꞌakare liyá, raú lamáꞌatakejami ke iká puꞌuwaré ilaꞌakare liyá. Iná napona kapichájero, iná laꞌakale puꞌuwaré aú.
11 Re Tupana Pechu eꞌiyá. Ripechu aú rimakápoꞌota Jesucristo iꞌimaká; Ripechu iꞌimakare eꞌiyá aú iꞌimajé matajnako rijwaꞌaté.
12 Ñakele nojena, walaꞌaniña chuwa nakaje wapechu keja.
13 Iꞌimajika ee nakaje laꞌakana nakú ipechu keja, ikapichajo; eyá ilaꞌajika ee nakaje Tupana Pechu jaꞌapiyá ke, unká iꞌimalaje puꞌuwaré laꞌakaná nakú ipechu keja. Raú iꞌimajé matajnako Tupana waꞌaté.
14 Laꞌañó Tupana Pechu wakáraꞌaka neká ke, Tupana yaní neká.
15 Unká Tupana aꞌalá ijló Ripechu, riwajákaloje iká, ikeroꞌokóloje piño kaꞌajná penaje. Raꞌá ijló Ripechu, raú iꞌimakáloje riyani nakiyana. Ripechu jaꞌapiyá ke wemá rijló: “Paꞌayú”, ke.
16 Ripechu jaꞌaró wapechu eꞌiyajé, raú wemá Tupana nakú: “Riyani weká”, ke.
17 Tupana arukari wajló kajrú nakaje jeꞌechú chu; riká yuréjero wajló, riyani weꞌemakale. Nakaje raꞌakare Jesucrístojlo, raꞌajé kaja wajló. Wajñaꞌakachu chapú kaje yajwé panaku, rijñaꞌaká panaku riꞌimaká ke kaja, weꞌemajé kaja rijwaꞌaté. Palani wani kaje waꞌaté weꞌemajé rijwaꞌaté, Jesucristo iꞌimaká ke kaja.
18 Nuweꞌepí piyukeja chapú kaje yajwé wamákare meꞌetení, unká iꞌimalaje meke wajló, palá wani weꞌemajíkale rijwaꞌaté.
19 Tupana makápoꞌotajeri weká riyani, weꞌemakáloje rijwaꞌaté penaje. Piyukeja nakaje rikeñoꞌótakare iꞌimaká, iꞌimajeri kaja palani riwakajé.
20 Piyukeja nakaje rikeñoꞌótakare iꞌimaká, unká iꞌimalá palá meꞌetení, júpimi riꞌimaká ke. Apichátakejami ke riká, puꞌuwaré inaꞌuké laꞌakare pachá. Eꞌiyonaja Tupana iꞌimatájeri riká kapichákajo liyá, raú palani riꞌimajika piño.
21 Makapichako Tupana yaní iꞌimajika wakajé, ñaké kaja piyukeja nakaje iꞌimajika wajé.
22 Waweꞌepí meꞌetení maárejecha, kewájraꞌakajo nakú piyukeja nakaje Tupana keñoꞌótakare iꞌimaká. Kajrú kaja ramaka kewini yajwé, inanaru amaka kewini yajwé ruꞌurí amako rojló piyá, ke kaja.
23 Unká rukaja kalé amayo kewini yajwé; weká amaño kaja chapú kaje yajwé. Tupana aꞌakarénajlo Ripechu weꞌemaká eꞌiyonaja, chapú kaje yajwé amájeño weká. Paineko raꞌá wajló Ripechu iꞌimaká; kéchami raꞌajika piño wajló nakaje palani wani, rimájikale wanaku: “Nuyani wani iká”, ke. Riwakajé raꞌajé wajló wajé wanapona, unká kapichákajo penaje kalé iꞌimajíkare. Riká wátakana nakú weká maare.
24 Tupana iꞌimatari weká kapichákajo liyá, wapechu iꞌimakale kaphí richojé. Waweꞌepí raꞌajika wajló wanapona wajé. Riká wátakana nakú weká. Nakaje, unká joꞌó wamálare, wátakana nakú weká chuwa. Nakaje, iná amákare meꞌetení, unká iná iꞌimalá wátakana nakú.
25 Nakaje wawátakare wátakana nakú weká. Unká joꞌó wamala riká, ñakele wajñaꞌá kachuwa chapú kaje yajwé panaku riwátakana nakú, weꞌemajika ketana, eꞌiyonaja unká wayurílaje riwátakana.
26 Tupana Pechu aꞌarí wañathé, unkale waliyá iꞌimalá, walaꞌakáloje wekó riwátaka ke. Unká waweꞌepila palá Tupana waꞌaté puraꞌakano, ñakele Ripechu puraꞌaró wachaya rijwaꞌaté. Unká meke laꞌajé iná kemalajla puraꞌakajo aú, meke rimaká wanaku rijló.
27 Eyá Tupana weꞌepiri piyukeja mékeka inaꞌuké pechu, weꞌepiri kaja palá piyukeja Ripechu kemakare nakú rijló nakojé. Tupana pechu nakú nakaje iꞌimaká, ke Ripechu puraꞌakó rileꞌejena inaꞌukena chaya rijwaꞌaté.
Unká na kalé cháꞌataka weká yukuna marí
28 Waweꞌepí Tupana laꞌajika piyukeja nakaje palá íkiꞌija wátakaño rikajlo, ráchoꞌokoloje palá najló. Kaja riꞌiwapá rijluwa neꞌemaká, júpimi ripechu nakú riꞌimaká ke.
29 Unká chiyó ejaꞌawá iꞌimá, kaja riweꞌepí mékajenaka iꞌimajika raꞌapiyá jemaꞌajeño. Riꞌiwapá rijluwa weꞌemaká, weꞌemakáloje riyani penaje, Riꞌirí Jesucristo palamane aú. Pheꞌejrí ke riká kajrú rejénajlo.
30 Tupana iꞌiwapari rijluwa weká ajopana inaꞌukena eꞌiyayá. Riꞌiwapá weꞌemaká, weꞌemakáloje unká japi laꞌalaño puꞌuwaré ke rijló, waꞌaté weꞌemakáloje rijwaꞌaté palá ñakeja wani.
31 ¡Meke palá wani Tupana pechu wanaku! Wajwaꞌaté riká, raꞌakáloje wañathé penaje, ñakele unká chapú, ajopana laꞌakare weká, cháꞌatalaje weká.
32 Unká Tupana mejñátala Riꞌirí iꞌimaká, nenoka piyá riꞌimaká; raꞌá riꞌimaká, ritakaꞌakáloje piyukeja wachaya. Ñakele raꞌajé kaja wajló, Riꞌirí Jesucristo waꞌaté, piyukeja nakaje rimakare nakú iꞌimaká.
33 Unká na kemalaje meke Tupánajlo, rimakale riꞌiwapakárena nakú: “Unká japi laꞌalaño puꞌuwaré ke neká nojló”, ke.
34 ¿Na chi wajájeri weká? Jesucristo takaꞌarí wachaya iꞌimaká ejomi, rimakápoꞌo piño. Eyá meꞌetení, riká Tupana awaꞌá, kaꞌañá chojó pitá, wachaya puraꞌakano nakú rijwaꞌaté.
35 Íkiꞌija Jesucristo wátakarena weká, unká na kalé jáchoꞌotarijla weká riliyá, íkiꞌija wani riwátakale weká. Unká kaja riyurílaje wawátakana íkiꞌija. Apala wajñaꞌajé kaꞌajná chapú kaje yajwé panaku; apala kamuꞌují wapechu laꞌajiko kaꞌajná; apala wajñaꞌajé meꞌepijí panaku kaꞌajná; apala walaꞌajé kamuꞌují aꞌarumakaji nakú kaꞌajná; apala neꞌerataje kaꞌajná wamaná. Ilé ke kaꞌajná riꞌimajika wajló, eꞌiyonaja unká wani Jesucristo yurílaje weká, íkiꞌija wani riwátakale weká.
36 Marí ke Tupana purákaꞌalo lanaꞌakéjami kemaká:
“Wemaꞌakale paꞌapiyá, jimaje nawata wenókana weꞌechú kaꞌalá keja.
Ovéjana, nawáꞌakarena nenókelana ejo, ke nalaꞌaká weká”.
37 Ilé ke kaꞌajná nalaꞌajika weká, eꞌiyonaja cháꞌatajeño weꞌemajika, kajrú wani wátaka weká aꞌakale wañathé.
38 Ñakele nuweꞌepí unká na kalé jáchoꞌotarijla weká Tupana liyá, riwátaka piyá weká íkiꞌija. Takaꞌakaje kaꞌajná, iꞌimakaje kaꞌajná, rijwaꞌatéjena jeꞌechú chiyájena kaꞌajná, jiñana kaꞌajná, wawakáraꞌajeño kaꞌajná, nakaje meꞌetení iꞌimakare kaꞌajná, aꞌajná ñoꞌojó chami iꞌimajíkare kaꞌajná,
39 neká yenuwa iꞌimakárena kaꞌajná, kawakala jakú iꞌimakárena kaꞌajná. ¡Unká wani na kalé jáchoꞌotarijla weká Tupana liyá, riwátaka piyá weká íkiꞌija wani! Waweꞌepí ñakeja wani riꞌimajika wajló, wawakáraꞌajeri Jesucristo laꞌakale weká palá wani.