Tupana iꞌiwapaka Israel lakénami rijluwa yukuna marí
9
Jesucristo jaꞌapiyá jemaꞌajeri nuká, ñakele kewaka numaká, unká nupajlala. Tupana Pechu aꞌarí nuñathé, raú nuweꞌepí kewaka piyuke nakaje numakare nakú.
2 Kamuꞌují wani nupechu nujluwa weꞌechú kaꞌalá keja. Kewini wani nojló piyukeja nakaje nukáꞌana judíona laꞌakare.
3 Raꞌakela nañathé, nóchoꞌojla Jesucristo jaꞌapiyá iꞌimakana chiyá nukapichákoloje napumí chojé. Ñaké laꞌakana aú noꞌokela nañathé nemaꞌakáloje Tupana jaꞌapiyá penaje. Nulaꞌajla ñaké nachaya, nukáꞌana wani neꞌemakale.
4 Israel lakénami nakiyana neká. Tupana iꞌiwapari neꞌemaká neꞌemakáloje riyani penaje. Riꞌimá najwaꞌaté iꞌimaká; ripuraꞌó kaja nakaje nakú najwaꞌaté iꞌimaká, riyuríkoloje ñaké penaje; riyurí kaja najló Ripurákaꞌalo, nemaꞌakáloje raꞌapiyá; rimá kaja najló nephákaloje raꞌapí; raruká kaja najló kajrú nakaje iꞌimaká.
5 Waꞌajútaya michuna lakénami neká, ñakele pajluwa yaní keja weká najwaꞌaté. Wanakiyana kaja riká Jesucristo, piyukeja nakaje miná. Ñakeja wani inaꞌuké puraꞌajíkaro nakú palá riká. Ñakeja riꞌimajika.
6 Ilé ke neꞌemaká eꞌiyonaja, unká Tupana yurila Israel lakénamijlo nakaje laꞌakana, rimaká rinaku najló iꞌimaká ke. Eꞌiyonaja neꞌiyajena, Israel lakénami, laꞌañó nanakuwá: unká rilakénami japi kalé neká ke.
7 Unká kaja rilakénami wani kalé piyukeja Abraham michú lakénami. Tupana kemari rijló iꞌimaká: “Piꞌirí Isaac palamane pilakénami iꞌimajeño kajrú”.
8 Raú iná weꞌepí piyuke kaphí péchuruna Tupana chojeja kalé riyani, nanákuja kalé iná kemajla nalakénami.
9 Tupana kemari Abrahamjlo iꞌimaká: “Nupaꞌajiko piño majó wakajé, Sara iꞌirí iꞌimajeri rukapi”.
10 Iyamá Rebeca micholo yaní iꞌimaká achiñana. Iyamá namothoꞌoká iꞌimaká. Naraꞌapá ií iꞌimari Isaac. Rilakénami nakiyana kaja weká.
11-12 Unká chiyó namothoꞌó, unká chiyó kaja nalaꞌá palá kaꞌajná, puꞌuwaré kaꞌajná, Tupana kemari naló Rebécajlo mékeka neꞌemajika pajwaꞌatéchaka. Rimá rojló: “Paineko amájiko pijló, iꞌimajeri rijmeremi waꞌaté jápajeri”, ke.
13 Tupana purákaꞌalo lanaꞌakéjami kemaká nanaku iꞌimaká keja riꞌimaká najló. Rimá: “Jacob nuwátaje, eyá Esaú unká”.
14 ¿Wemaje chi raú Tupana nakú: “Unká paala rilaꞌaká”, ke? ¡Unká wani wemalaje ilé ke rinaku!
15 Tupana kemari Moisesjlo iꞌimaká: “Nuwátajikare muꞌujija kalé nuweꞌepeje”.
16 Ñakele unká iná liyaje kalé, Tupana weꞌepíkaloje iná muꞌují penaje. Unká na kalé iná laꞌajla Tupánajlo, riweꞌepíkaloje iná muꞌují raú, riweꞌepíkale riwátakarena muꞌujija kalé.
17 Ripurákaꞌalo lanaꞌakéjami chu kemari mékeka Tupana kemaká Egipto eyájena iꞌimakánajlo. Rijló rimá: “Nuyurí piꞌimaká neꞌemakana penaje iꞌimaká, piweꞌepíkaloje piyukeja wani laꞌajerí nuká. Piyukeja wani inaꞌukena jemaꞌakáloje nakaje nulaꞌakare yukuna, penaje nuyurí piꞌimaká neꞌemakana”, ke rimaká rijló.
18 Ñakele riwátakarena muꞌujija kalé Tupana weꞌepí, eyá unká riwátalarena muꞌují unká riweꞌepila. Rilaꞌá kaja inaꞌuké pechu ijnú, naweꞌepika piyá rinakojé.
19 Ilé ke riꞌimakale, pimaje kaꞌajná nojló: “¿Naje chi aꞌajná Tupana kemari inaꞌuké nakú meke laꞌajeñoka neká, nalaꞌakachu apoꞌojó riwátaka ke liyá?”
20 Eta piká, ¿na chi piká, pimakáloje Tupánajlo?: “Marí ke pilaꞌajika nakaje”, ke. ¿E chi pukapé nakiyana, nalaꞌakare nakaje aú, kemaká rilaꞌajérijlo?: “¿Naje pilaꞌá nuká ilé ke?”
21 Jápari nakaje laꞌakana nakú pukapé aú, laꞌarí riká riwátaka ke. Keꞌiyapé nojé nakaje rilaꞌá raú, nalamáꞌatakaloje nanane richojé penaje kaꞌajná, namothoꞌokáloje richojé penaje kaꞌajná.
22 Tupana wátari inaꞌuké weꞌepika mékeka riwajájika puꞌuwaré laꞌajeñó nakojé, eyá naweꞌepíkaloje kaja raú piyukeja laꞌajérika riká. Penaje rijñaꞌá panaku kajrú puꞌuwaré laꞌajeñó. Unká riwajala neká kiñaja.
23 Ilé ke rilaꞌaká aú, waweꞌepí meke rilaꞌaká wanaku palá wani nakojé. Kepeni wani ripalamane wajló. Unká chiyó weꞌemá, riweꞌepí wamuꞌují iꞌimaká weꞌemakáloje palá rijwaꞌaté.
24 Riꞌiwapá rijluwa riwátakarena judíona iꞌimakaño eꞌiyayá. Ñaké kaja riꞌiwapaká rijluwa riwátakarena, unká judíona kalé iꞌimakaño, eꞌiyayá.
25 Tupana purákaꞌalo, Oseas michú lanaꞌakare iꞌimaká, kemari rinaku:
“Unká nuleꞌejena kalé neká”, ke nemakárena nakú iꞌimaká, numaje nakú: “Chuwa nuleꞌejena inaꞌukena neká”, ke.
“Unká nuwátalarena iꞌimaká penájemi, nuwátaje chuwa”, ke numaká.
26 Numá najló iꞌimaká: “Unká nuleꞌejena inaꞌukena kalé iká”, ke.
Numaje kaja najló: “Tupana, ñakeja wani iꞌimajika, yaní iká chuwa”, ke.
27 Eyá Isaías michú kemari israelítana nakú: “Íkiꞌiruna wani Israel lakénami. Neꞌemakela juni jalomi leꞌejé keꞌepé ke íkiꞌika, eꞌiyonaja kalé mekeleja nanakiyana iꞌimajeñó kapichákajo liyá.
28 Yewíchaja Tupana wajaka puꞌuwaré laꞌajeñó iphaka rená chojé piyukeja inaꞌukénajlo”, ke rimaká.
29 Rikaja kaja Isaías kemari:
“Unkákela Tupana, piyukeja wani laꞌaká nakaje, weꞌepijla wamuꞌují,
júpimi wakapichojla piyukeja,
Sodoma eyájena, eyá Gomorra eyájena michuna kapichako iꞌimaká, ke kaja”,
ke rimaká.
Tupana iꞌimataka inaꞌuké kapichákajo liyá yukuna marí.
30 Eta chuwa, ¿meke wemájika unká judíona kalé iꞌimakaño nakú? Tupana kemari nanaku: “Palá laꞌajeñó neká nojló”, ke, kaphí napechu iꞌimakale richojé. Unká na nalaꞌalá palá, Tupana iꞌimatákaloje neká kapichákajo liyá penaje, eꞌiyonaja riꞌimatá neká riliyá, kaphí napechu iꞌimakale richojé.
31 Lanakiya judíona laꞌañojla nakaje Tupana purákaꞌalo, júpimi riyuríkare najló, kemaká ke, rimakáloje nanaku: “Unká japi puꞌuwaré laꞌajeñó ke kalé nojló neká”, ke. Eꞌiyonaja unkale napechu iꞌimalá kaphí richojé, unká ramalo nachaje puꞌuwaré nalaꞌakare liyá.
32 ¿Naje? Kaja napechu: “Palá walaꞌakale aú weꞌemajó kapichákajo liyá”, ke. Unkale nawátala Jesucristo, neꞌemá inaꞌuké jipa nakojé tujlaꞌatákaño ke. Raú nakapichó.
33 Jesucristo nakú Tupana purákaꞌalo kemari “jipa”, ke. Rimá rinaku:
“Nuyureje pajlúwaꞌala jipa pajimila Sión (Jerusalén) e.
Rinakojé neꞌiyajena tujlaꞌatajo, eyá kaphí richojé péchuruna unká kapichálajo”.