Isarael lakénami nakiyana yukuna marí
10
Nojena, íkiꞌija wani nuwátaka nukáꞌana jemaꞌaká Jesucristo jaꞌapiyá, neꞌemakóloje kapichákajo liyá penaje. Raú ñakeja nupuraꞌakono nachaya Tupana waꞌaté.
2 Nuweꞌepí nawátaka wani nakaje laꞌakana palá Tupánajlo, eꞌiyonaja unká naweꞌepila naka laꞌakana riꞌimakáloje palani rijló.
3 Raú nalaꞌá nakaje napechu nakú riꞌimaká keja, neꞌemakáloje unká japi laꞌalaño puꞌuwaré ke rijló. Eꞌiyonaja unká naꞌalá nanakojó nakaje Tupana kemakare nakú.
4 Jesucristo laꞌarí piyukeja nakaje, júpimi Tupana purákaꞌalo lanaꞌakéjami kemaká ke. Kaphí iná pechu iꞌimaká Jesucristo chojé aú, Tupana kemari iná nakú: “Unká japi puꞌuwaré laꞌajeri ke kalé nojló riká”.
5 Moisés purákaꞌalomi kemari: “Laꞌajeño pajimato Tupana purákaꞌalo kemaká keja kalé iꞌimajeño makapichako Tupana waꞌaté jeꞌechú chu”.
6-7 Eyá jáchoꞌojeño puꞌuwaré laꞌakaná chiyá, kaphí napechu iꞌimakale Tupana chojé nakú, rimaje kaja: “Ipechu iꞌimaniña: ‘¿Na jáchoꞌojero jeꞌechú chojé, Jesucristo witúkaꞌakaloje majó raú penaje? ¿Na kaꞌajná witúkaꞌaje kawakajo, Jesucristo jáchoꞌokoloje majó kaja takaꞌakaño iꞌimaká eꞌiyayá?’ ”, ke rimaká.
8 Kaja iweꞌepí palá Tupana purákaꞌalo nakojé; kaphí kaja ipechu richojé. Riká purákaꞌaloji weꞌemá yukuna ijló, ipechu iꞌimakáloje kaphí richojé.
9 Ajopánajlo pimájika ee Jesucristo nakú: “Nuwakáraꞌajeri riká”, ke, eyá pipechu nakú riꞌimajika ee: “Tupana makápoꞌotari piño riꞌimaká”, ke aú piꞌimajó kapichákajo liyá.
10 Iná pechu iꞌimaká kaphí Jesucristo chojeja aú, iná iꞌimaó. Iná numá aú iná kemá iná nakuwá: “Kaphí nupechu Jesucristo chojé, riꞌimatákaloje nuká kapichákajo liyá”.
11 Tupana purákaꞌalo kemari: “Kaphí richojé péchuri unká kemalaje rinakuwá: ‘Unká na penaje kalé nomaꞌá raꞌapiyá’, ke.
12 Rejenowaja piyukeja inaꞌukena Tupánajlo: judíona iꞌimakaño, eyá unká judíona kalé iꞌimakaño, rejenowaja neká rijló. Riká pajluwaja, piyukeja inaꞌukena wakáraꞌajeri, kajrú raꞌaká puraꞌañó rijwaꞌaté ñathé”,
13 Ripurákaꞌalo kemakale: “Iná kemakachu Tupánajlo, riꞌimatákaloje iná kapichákajo liyá, riꞌimataje iná riliyá raú”.
14 Eꞌiyonaja kalé unká Tupana iꞌimatálaje inaꞌuké kapichákajo liyá, unkájika ee napechu iꞌimá kaphí richojé. Unká napechu iꞌimalaje kaphí richojé, unkájika ee na iꞌimá najló riyukuna. Unká meke laꞌajé nemaꞌalajla raꞌapiyá, unkájika ee na iꞌijná riyukuna iꞌimajé najló.
15 ¿Meke laꞌajé chi neꞌejnajla riyukuna iꞌimajé, unkachu na wakáraꞌala neká? Tupana purákaꞌalo kemari: “Meke palá wani Tupana yukuna jaꞌapátajeño laꞌaká, nephákachu inaꞌuké nakú riyukuna iꞌimajé najló”.
16 Unká piyukeja kalé aꞌañó nanakojó Tupana iꞌimataka iná kapichákajo liyá yukuna. Isaías kemaká rinaku iꞌimaká, keja riká, rimá: “Nuwakáraꞌajeri, ¿naje mekeleja kalé jemaꞌañó paꞌapiyá, weꞌemaká piyukuna najló eꞌiyonaja?”
17 Ñakele iná jemaꞌaká aú Jesucristo yukuna iná pechu iꞌimajla kaphí Tupana chojé.
18 Kaja Israel lakénami jemaꞌá riyukuna iꞌimaká. Tupana purákaꞌalo kemari nanaku:
“Tupana wakáraꞌari inaꞌuké iꞌijnaká piyuke nateꞌeré nakuwá riyukuna iꞌimajé najló, ritajákaꞌalo ewá waꞌató.
Kaja natajata riyukuna iꞌimakana piyuke ejaꞌawá chu iꞌimakáñojlo”, ke.
19 Israel lakénami weꞌepiño riyukuna, eꞌiyonaja unká naꞌalá nanakojó riká. Ilé kajé aú riyukuna yuriro ajopánajlo. Moisés lanaꞌarí nayukuna iꞌimaká:
“Tupana kemari Israel lakénami nakú:
‘Noꞌojé ajopana inaꞌukena nujwaꞌatéjena penaje.
“Nawejáputenami neká”, ke imaká nanaku.
Eꞌiyonaja neká noꞌojé nuleꞌejena inaꞌukena penaje, nuyúchaꞌatakaloje iká raú’,
ke Tupana kemaká najló iꞌimaká”.
20 Unká Isaías wo laꞌaló riyukuna iꞌimakana piyá. Rilanaꞌá kaja riyukuna marí ke:
“Tupana kemari: ‘Unká weꞌepílaño nunakojé, weꞌepéjeño nunakojé.
Unká kejáꞌalaño nuyukuna, weꞌepéjeño naka nuká’, ke rimaká”.
21 Isaías kemari kaja Israel lakénami nakú iꞌimaká: “Tupana kemari nanaku: ‘Unká nawátala noꞌopiyá jemaꞌakana; chapú nawó nuchá. Najló numá waꞌajini wani, napalaꞌatákaloje napéchuwa puꞌuwaré nalaꞌakare liyá penaje’ ”, ke.