Tupana iꞌimataka Israel lakénami nakiyana kapichákajo liyá yukuna marí
11
Ipechu iꞌimaniña: “Chuwa unká Tupana wátala rileꞌejena inaꞌukena, Israel lakénami”. Nuweꞌepí unká ñaké kalé riká. Israel lakénami nakiyana nuká; Abraham michú, eyá Benjamín michú, kele lakénami nakiyana nuká.
2 Unká chiyó neꞌemá, Tupana kemari Israel lakénami nakú: “Nuleꞌejena inaꞌukena neꞌemajika”, ke. Ñakele meꞌetení unká riyurila nawátakana íkiꞌija. Kaja iweꞌepí mékeka nemaká Tupana purákaꞌalo jaꞌapátajeri Elías michú nakú. Rarukata Tupánajlo mékeka Israel lakénami laꞌaká iꞌimaká, rimá rijló: a
3 “Nuwakáraꞌajeri, kaja nenota piyuke pipurákaꞌalo jaꞌapátajeño michuna. Nakajyaꞌatá kaja piyuke napirana nenókarena pijló pukuna. Nukaja kalé yuriro pajluwaja, iphari paꞌapí, eyá chuwa nawata kaja nonókana”, ke rimaká Tupánajlo.
4 Raú Tupana kemari rijló iꞌimaká: “Kaja nuꞌuwapá nujluwa ajopana eꞌiyayá siete mil achiñana, unká wani táraꞌalaño neꞌerúpachi aú nachiꞌinárikana Baal jenami jimaje”.
5 Ñaké kaja inaꞌuké meꞌetení. Re wejápaja judíona nakiyana Tupana iꞌiwapakárena rijluwa, riweꞌepíkale namuꞌují.
6 Ñakele unká nakaje iná laꞌakare aú kalé Tupana weꞌepí iná muꞌují, ripalamane aú ja riweꞌepí iná muꞌují. Riꞌiwapakela iná rijluwa nakaje iná laꞌakare aú, unká iná muꞌují weꞌepíkana aú kalé riꞌiwapakajla iná.
7 Ilé ke riꞌimakale, unká piyukeja kalé Israel lakénami iphátaka nakaje nawátakare Tupana liyá iꞌimaká. Nawata nakaje nalaꞌakare aú Tupana pechu iꞌimaká palá nanaku. Jemaꞌañó raꞌapiyaja kalé riꞌiwapakárena, eyá ajopana pechu rilaꞌá ijnú, unkale nemaꞌalá raꞌapiyá.
8 Marí ke Ripurákaꞌalo lanaꞌakéjami kemaká nanaku: “Unká pachá nemaꞌalá Tupana jaꞌapiyá, rilaꞌá napechu ijnú. Ñakele ñakeja napechu meꞌetení. Tupana aꞌarí najló nejlú, namákaloje penaje, eꞌiyonaja mejluruna ke neká. Raꞌá kaja najló neꞌejwí, nemaꞌakáloje penaje, eꞌiyonaja meꞌejwiruna ke neká”, ke rimaká.
9 Ñakeja kaja David michú kemaká nanaku iꞌimaká:
“Nawakono naꞌajnewá ajñaje pajwaꞌatéchaka,
eꞌiyonaja mapéjari ke nalaꞌaká riká, raú nalaꞌá puꞌuwaré.
Ripachá Tupana wajaje neká.
10 Palani nayuriko mejluruna ke, namaka piyá.
Palani kaja najló chapú kaje yajwé amákana ñakeja”,
ke rimaká nanaku.
11 Eyá chuwa, judíona laꞌaká puꞌuwaré pachá, ¿ñakeja chi neꞌemajika puꞌuwaré laꞌakaná nakú? ¡Unká wani neꞌemalaje ilé ke! Nalanakiya ajopana jemaꞌañó Tupana jaꞌapiyá, riꞌimatákaloje neká kapichákajo liyá. Judíona weꞌepika riꞌimataka neká aú, ñaké kaja nawátaka riꞌimakáloje najló.
12 Judíona yuríkale naliyó Tupana purákaꞌalo kemaká ke laꞌakana aú, chuwa kajrú ajopana inaꞌukena, unká judíona kalé iꞌimakaño, jemaꞌaká raꞌapiyá. Rejomi kalé kajrú judíona nakiyana paꞌajiko piño napumí chuwá Ripurákaꞌalo kemaká ke laꞌajé.
13 Re nakaje nuwata nakú kemakana iká, unká judíona kalé iꞌimakáñojlo. Ijló nuꞌumá Jesucristo yukuna. Palani nojló nujápakaꞌala, ripenaje Tupana wakáraꞌakale nuꞌumaká.
14 Nuwata kaja nukáꞌana judíona nakiyana wátaka Tupana iꞌimataka neká kapichákajo liyá.
15 Júpimi nayurí raꞌapiyá jemaꞌakana iꞌimaká. Napumí chojé Tupana aꞌarí kajrú ajopana, neꞌemakáloje rijwaꞌatéjena penaje. Palá riꞌimajika piño judíonajlo. Kajmuchaji iꞌimaká kaja takaꞌakáñojlo, ke kaja riꞌimajika najló, napechu pajnoꞌojiko ee Tupana ejo Jesucristo jaꞌapiyá iꞌimakana aú.
16 Abraham michú, rilakena michuna waꞌaté, iꞌimaño Tupana leꞌejena iꞌimaká. Ñakele nalakénami nakiyana iꞌimajeño kaja rileꞌejena. Raꞌapare iꞌimaká aꞌawanajlo, ke Abraham iꞌimaká rilakénamijlo.
17 Júpimi judíona nakiyana yuriño Tupana jaꞌapiyá jemaꞌakana, Abraham lakénami neꞌemaká eꞌiyonaja. Eyá Tupana aꞌarí napumí chojé iká, unká judíona kalé iꞌimakaño, iꞌimakáloje rileꞌejena inaꞌukena penaje. Ñakele chuwa Tupana palamane iká, júpimi judíona iꞌimaká ripalamane ke kaja.
18 Iká, Tupana aꞌakárena napumí chojé, unká meke laꞌajé laꞌalajla inakuwá kajrú najló, unká ikó kalé aꞌakale ikó napumí chojé. Kaphí ipechu iꞌimakale Tupana chojé, iyuró napumí chojé. Ñakele ripalamane iká najwaꞌaté pajluwa keja.
19 Apala ipechu iꞌimajé: “Tupana kaꞌarí judíona nakiyana iꞌimaká, unká pachá napechu iꞌimalá kaphí richojé, napumí chojé raꞌakáloje weꞌemaká”, ke.
20 Ke joꞌó riká. Rikaꞌá neꞌemaká neꞌiyayá, unká pachá napechu iꞌimalá kaphí richojé. Eyá raꞌá iꞌimaká napumí chojé, kaphí ipechu iꞌimakale Tupana chojé. Ñakele unká naje kalé ilaꞌajla inakuwá nacháꞌatajeño ke. Eko amá ikó palá, ilaꞌaká piyá puꞌuwaré.
21 Unká Tupana amalo rileꞌejena inaꞌukena judíona chaje iꞌimaká; rikaꞌá neꞌemaká, unká pachá napechu iꞌimalá kaphí richojé. Unká kaja ramálajo ichaje, unkájika ee ipechu iꞌimá kaphí richojé.
22 Kaja iweꞌepí palá wani mékeka Tupana laꞌaká inaꞌuké. Eyá iweꞌepí kaja mékeka riwajájika neká, napechu yuríkale richojé iꞌimakana kaphí. Inaku rilaꞌá palá iꞌimaká, ipechu iꞌimakale kaphí Jesucristo chojé. Iyuríjika ee richojé iꞌimakana kaphí, riwajaje kaja iká.
23 Judíona pechu iꞌimajika ee piño kaphí Tupana chojé, ripaꞌataje piño neká. Rikaja kalé weꞌepiri napaꞌatákana piño napumí chuwá.
24 Raꞌá iká rileꞌejena inaꞌukena apumí chojé, unká judíona kalé iꞌimaká eꞌiyonaja. Ñakele ripaꞌataje judíona piño, neꞌemakáloje rileꞌejena penaje.
Kaja penaje Tupana iꞌimatájeri Israel lakénami nakiyana kapichákajo liyá. Riyukuna marí
25 Nojena, nuwata iweꞌepika nakaje Tupana pechu nakú iꞌimakare nakojé; unká nuwátala ilaꞌaká inakuwá kajrú weꞌepíkaño ke. Neꞌiyajena judíona yuriño naliyó kaphí Tupana chojé iꞌimakana. Ñakeja neꞌemajika aꞌajná, kajrú unká judíona kalé iꞌimakaño pechu iꞌimajika kaphí Tupana chojé, ejená.
26 Rejéchami riꞌimatájika piyuke Israel lakénami nakiyana, kaphí péchuruna richojé iꞌimakaño, kapichákajo liyá. Marí ke Ripurákaꞌalo lanaꞌakéjami kemaká nanaku:
“Sión eyá pajluwa iphájeri neꞌemataje.
Riká iꞌimatájeri Jacob lakénami puꞌuwaré laꞌakaná liyá.
27 Nuꞌumatájika neká puꞌuwaré laꞌakaná liyá ejomi,
nulaꞌajé najwaꞌaté nakaje numakare nanaku júpimi iꞌimaká ke”, ke rimaká.
28 Judíona nakiyana, unká aꞌalaño nanakojó Tupana iꞌimataka inaꞌuké kapichákajo liyá yukuna, laꞌañó nekó chapú péchuruna Tupana nakú. Ilé ke neꞌemakale, iká jemaꞌajla raꞌapiyá, riꞌimatákaloje iká kapichákajo liyá Jesucristo palamane aú. Tupana wajwena joꞌó judíona, riꞌiwapakale rijluwa naꞌajútaya michuna iꞌimaká.
29 Unká ripaꞌatala iná liyá nakaje raꞌakare inajlo iꞌimaká; unká kaja riyurílaje iná, riꞌiwapakare rijluwa iꞌimaká ejomi.
30 Júpimi unká jemaꞌalá Tupana jaꞌapiyá; unkale judíona jemaꞌalá raꞌapiyá iꞌimaká, riweꞌepí imuꞌují.
31 Meꞌetení ñaké kaja, unká nemaꞌalá Tupana jaꞌapiyá; nalanakiya iká jemaꞌañó chuwá raꞌapiyá. Riweꞌepí imuꞌují, ke kaja riweꞌepíjika namuꞌují.
32 Ñaké waja piyuke inaꞌukena Tupánajlo, unkale nemaꞌalá raꞌapiyá. Ilé ke neká rejenowaja, riweꞌepíkaloje namuꞌují.
33 Kajrú wani weꞌepika nakaje Tupana. Unká na wani kalé yuriro riyami; unká na kalé iphátarijla ripechu; unká na kalé iꞌimárijla palá nakaje rimakare nakú yukuna; unká kaja na kalé weꞌepírijla mékeka riꞌimajika.
34 ¿Na chi weꞌepírijla mékeka Tupana iꞌijnataka ripéchuwa nakaje nakú? ¿Na chi laꞌarijla renakú?
35 ¿Na chi aꞌarí Tupánajlo júpimi nakaje iꞌimaká, ripaꞌatákaloje riliyá riká penaje?
36 Tupana liyaje waja piyukeja nakaje, ripalamane riꞌimakale. Ñakele rileꞌejé waja riká. ¡Palani Tupana nakú puraꞌakano palá ñakeja wani! Ñaké riꞌimajika.