Waweꞌepíkaloje watukumó nakaje laꞌakana Tupánajlo penaje yukuna marí
12
Nojena, íkiꞌija wani Tupana weꞌepika wamuꞌují. Ñakele numá ijló, aꞌakáloje ikó rijló, raú iweꞌepíkaloje itukumó riwátaka ke laꞌakana. Ñaké laꞌakana aú puꞌují ripechu iꞌimajika inaku, iphákale wani raꞌapí.
2 Ñakele ilaꞌaniña chuwa ajopana, unká jemaꞌalaño raꞌapiyá, laꞌaká ke. Iyurí rilaꞌaká ipechu wajé ke, raú iꞌimakáloje palá nakaje laꞌakana nakuja. Ñaké laꞌakana aú iweꞌepeje naka Tupana wátaka iná laꞌaká nakojé; wajé nakaje chuwá iꞌimakana aú iweꞌepeje naka palani rijló.
3 Tupana palamane riwakáraꞌa nowíñaꞌataka inaꞌuké. Ñakele numá ijló, iꞌijnatániña ipéchuwa inakuwá: “Kajrú nakaje nakojé weꞌepikaño weká”, ke. Tupana aꞌarí péchuji pajluwánojlo, pajluwánojlo ke, ilaꞌakáloje nakaje riwátaka ke raú.
4 Pajluwa wanapona, eꞌiyonaja keꞌiyapé rinakiyana tamákaꞌatako, walaꞌakáloje keꞌiyapejé nakaje raú; unká pajluwaja rinakiyana kalé laꞌá piyuke nakaje.
5 Ñaké kaja weká Jesucristo jaꞌapiyá jemaꞌajeño: kajrú wani weká, eꞌiyonaja pajluwaja keja weká rijwaꞌaté; pañathéchaka aꞌakana nakuja weká pajwaꞌatéchaka.
6 Walaꞌakáloje keꞌiyapejé nakaje penaje Tupana aꞌarí wajló weꞌepíkaje apujlo, apujlo ke, ripalamane aú walaꞌakáloje nakaje pajlokaka. Pijló kaꞌajná raꞌá weꞌepíkaje, paꞌapátakaloje ajopánajlo Ripurákaꞌalo raꞌapiyá ke, kaphí pipechu iꞌimaká richojé lokópaꞌala.
7 Eyá raꞌakárejlo péchuji, raꞌakáloje palá ajopana ñathé, aꞌajeri ñaké palá ajopana ñathé. Eyá raꞌakárejlo péchuji, rewíñaꞌatakaloje ajopana palá, jewíñaꞌatajeri kaja ñaké palá ajopana.
8 Eyá raꞌakárejlo péchuji palá ajopana pechu palaꞌatákana, ñaké riꞌimajika ajopana pechu palaꞌatákana nakuja. Tupana Pechu palamane aú re kaꞌajná inajlo ñóꞌope nakaje, iná aꞌakáloje kamuꞌují laꞌakaño ñathé raú. Palani mamejajné, puꞌují iná pechu ke, iná aꞌaká najló riká.
Nakaje Jesucristo jaꞌapiyá jemaꞌajeño laꞌaká yukuna marí
9 Iwata íkiꞌija pekowáaka; ilaꞌaniña mapeja íkiꞌija pekowáaka wátakana jenami. Iꞌijnatá ipéchuwa chapú puꞌuwaré laꞌakaná nakú; palá laꞌakanaja iweꞌepí itukumó.
10 Iwata íkiꞌija pekowáaka, pajluwaja yaní iꞌimakale; iphá kaja paꞌapíchaka.
11 Iꞌimá wéchiruna; iꞌimaniña ijnuruna nakaje laꞌakana nakú Tupánajlo.
12 Puꞌují ipechu ke iꞌimá, palá Tupana laꞌajíkale iká; ilaꞌá kaja kaphí ipéchuwa, amájika chapú kaje yajwé wakajé; iyuríniña rijwaꞌaté puraꞌakano.
13 Aꞌá Jesucristo jaꞌapiyá jemaꞌajeño ñathé, nakaje nalaꞌajíkare kamuꞌují nakú aú. Aꞌatá yaꞌajnaya iphákaño inaku, nayuríkoloje ijwaꞌaté iñakaré chu.
14 Ipuraꞌó Tupana waꞌaté laꞌañó iká chapú nakú; imá rijló nanaku, rilaꞌakáloje neká palá; imaniña rijló, rilaꞌakáloje neká chapú.
15 Ipechu iꞌimá puꞌují, puꞌují pechu iꞌimakaño waꞌaté; eyá kamuꞌují pechu iꞌimakaño waꞌaté, ipechu iꞌimá kaja kamuꞌují.
16 Iꞌimá palá pajwaꞌatéchaka; ilaꞌaniña inakuwá ajopánajlo nacháꞌatajeño ke. Iꞌimá palá jaꞌapejé péchuruna waꞌaté; ipechu iꞌimaniña inakuwá, “kajrú weꞌepíkaño weká”, ke.
17 Apú laꞌajika ee kaꞌajná piká chapú, pilaꞌaniña kaja riká ñaké pinakojó. Pilaꞌá palá, palá ajopana pechu iꞌimakáloje nakaje pilaꞌakare nakú.
18 Ilaꞌá ipechu lokópaꞌala palá, iꞌimakáloje palá pajwaꞌatéchaka.
19 Nojena, kajrú wani nuwátakarena, ilaꞌaniña chapú ajopana, nalaꞌaká iká ke kaja. Ipuraꞌaniño ileꞌejé jakumi nakú; iyurí neká Tupánajlo. Riká wajájeri neká, Tupana purákaꞌalo lanaꞌakéjami kemaká ke. Rimá Tupana nakú: “Nuká wajájeri inaꞌuké, puꞌuwaré nalaꞌakare pachá; nuká kaja aꞌajeri najló nakaje nalaꞌakare wemí”, ke.
20 Eyá rimá kaja: “Chapú pinaku péchurijlo meꞌepijí iꞌimajika ee, paꞌá rijló aꞌajnejí; makaꞌaní riꞌirajika ee juni, paꞌá kaja rijló juni. Ilé ke pilaꞌajika ee rinaku palá, kajrú wani papáñaꞌatajika rinaku raú”.
21 Piyuríniña puꞌuwaré laꞌakaná cháꞌataka piká; picháꞌata puꞌuwaré laꞌakaná palá laꞌakaná aú.