13
Jemaꞌá palá piyuke iwakáraꞌajeño jaꞌapiyá, Tupana liyaje wakáraꞌakaje iꞌimakale. Ñakele meꞌetení wakáraꞌakaño iká, Tupana aꞌakárena neká.
2 Ñakele unkachu jemaꞌalá iwakáraꞌajeño jaꞌapiyá, unká ilaꞌalá Tupana wakáraꞌaka ke. Unká jemaꞌalaño naꞌapiyá, wajákana iꞌimajeri.
3 Unká palá laꞌajeñó keroꞌoló nawakáraꞌajeño piyá; puꞌuwaré laꞌajeñó keroꞌoñó napiyá. Palá laꞌajerí piꞌimajika ee, unká na penaje pikeroꞌoló piwakáraꞌajeño piyá, palá piwakáraꞌajeño pechu iꞌimakale pinaku raú.
4 Tupana waꞌaté jápajeño ke neká, nalaꞌakáloje palá nakaje ijló. Eyá puꞌuwaré laꞌajerí piꞌimajika ee, pikeroꞌojó iwakáraꞌajeño piyá. Tupana waꞌaté jápajeri ke riká, ñakele nawajajla kaja puꞌuwaré laꞌajeñó.
5 Ñakele jemaꞌá iwakáraꞌajeño jaꞌapiyá; ikeroꞌokó nawajaka iká piyá; jemaꞌá naꞌapiyá, iweꞌepíkale kaja palani naꞌapiyá jemaꞌakana iꞌimakale.
6 Iteꞌeré eyá wakáraꞌajeño kejáꞌañono iliyá liñeru, raú nalaꞌakáloje nakaje inaꞌukejlo rewá penaje. Tupana jaꞌapiyá ke najápaka, riká naweꞌepí natukumó.
7 Aꞌá najló liñeru nakejáꞌakare iliyá, naꞌakáloje ajopana ñathé raú. Nakejaꞌa iliyá liñeru keꞌiyapejé nakaje penaje. Aꞌá najló riká; iphá naꞌapí; ipechu iꞌimá kaja nanaku palá.
8 Itajata iliyó lewérikaje; iwata íkiꞌija ajopana; itajátaniña iliyó ajopana wátakana íkiꞌija. Íkiꞌija ajopana wátakana aú, iná laꞌá Tupana purákaꞌalo Moisés lanaꞌakare iꞌimaká ke.
9 Ripurákaꞌalo kemari: “Pilaꞌaniña pimanáicho ajopana waꞌaté; pinóniña inaꞌuké; pataꞌaniña kaja ajopana nane; piwátaniña kaja pijluwa apú nane”, ke rimaká. Piyukeja ilé ripurákaꞌalo wakáraꞌari weká nakú, wemajla: “Piwata íkiꞌija apú, piwátaka pikó ke kaja”.
10 Wátari íkiꞌija apú, unká laꞌalá riká chapú. Ñakele kajrú pekowáaka wátakana aú iná laꞌá piyuke Tupana purákaꞌalo kemaká ke.
11 Piyukeja ilé kaje aú iweꞌepí mékeka weká meꞌetení. Unká weꞌechú kaꞌalá iꞌimalá wajló kajrú watukumó, júpimi wajé wakeñoꞌoká Ripurákaꞌalo jaꞌapiyá jemaꞌakana iꞌimaká wakajé ke kaja. Meketana iꞌimajemi, Jesucristo iphájeri majó wawáꞌaje rijwaꞌató jeꞌechú chojé.
12 Yewíchaja iná meꞌetaka ke ejéchami weká. Unká chiyó jemaꞌá Jesucristo jaꞌapiyá, kalajeruni chu ke iꞌimajika puꞌuwaré laꞌakaná nakú. Eyá chuwa Jesucristo jaꞌapiyá jemaꞌakale, mejámaꞌatani chu ke iká palá laꞌakaná aú. Iꞌimá Jesucristo wátakana nakú, yewíchaja riphájikale.
13 Ñakele walaꞌachí chuwa palá nakaje, mejámaꞌatani chu ke weꞌemakale. Wachiraꞌaniño ají ñoꞌojó ke yuwéraꞌakajo nakú; weꞌejnaniña kaja nakajmókaꞌalo kajrú nawíyoꞌokare ejo; walaꞌaniña kaja wamanáicho; walaꞌaniña piyukeja nakaje unká paala iꞌimakare; wapechu iꞌimaniña kaja chapú panakuwáaka; weꞌemachi palá ajopana waꞌaté.
14 Wawakáraꞌajeri Jesucristo chojé wapechu iꞌimajika ee kaphí, walaꞌajé riwátaka ke, ñakele unká wawátalaje puꞌuwaré laꞌakaná wapechu keja.