Iná kemaká piyá neꞌiyajena Jesucristo jaꞌapiyá jemaꞌajeño nakú: “Puꞌuwaré laꞌajeñó neká”, ke. Riyukuna marí
14
Re kaꞌajná Jesucristo jaꞌapiyá jemaꞌajeño nakiyana awakaño ijwaꞌaté. Apala unká joꞌó naweꞌepila palá naka iná ajñákajla nakojé. Iꞌimá najwaꞌaté palá; akhaꞌákaniño najwaꞌaté, unkale ipechu ke kalé napechu iꞌimakale.
2 Neꞌiyajénajlo palani riꞌimi ajñakana. Eyá neꞌiyajena unká joꞌó wani weꞌepílaño palá Tupana purákaꞌalo nakojé, ñakele unká najñala riꞌimi, napechu iꞌimakale: “Unká paala iná laꞌaká riꞌimi ajñakana aú”.
3 Ñakele unká paala riꞌimi ajñájeño akhaꞌaká unká ajñálaño riꞌimi maná; unká kaja paala unká ajñálaño riꞌimi akhaꞌaká riꞌimi ajñájeño maná, Tupana pechu iꞌimakale rejenowaja palá nanaku.
4 Unká meke laꞌajé pimalajla Tupana jaꞌapiyá jemaꞌajeri nakú, na aú ka rilaꞌaká puꞌuwaré. Riwakáraꞌajeri wani kemájeri rijló na aú ka rilaꞌaká palá, eyá na aú ka rilaꞌaká puꞌuwaré. Palá nakaje jáchoꞌojiko rijló, Tupana aꞌajíkale riñathé.
5 Eyá marí apú: Re inaꞌuké nakiyana pechu weꞌechú kaꞌalá nakú: “Apú weꞌechú kaꞌalá chaje riká”, ke. Eyá neꞌiyajena pechu weꞌechú kaꞌalá nakú: “Rejenowaja riká”, ke. Pilaꞌá pipechu nakú riꞌimaká ke.
6 Yuriri riká weꞌechú kaꞌalá Tupánajlo, riwakajé riphákaloje raꞌapí penaje, laꞌarí riwakajé Tupana wátaka ke. Eyá keꞌiyapejé ajñaka nakaje, ajñari riká riphákaloje Tupana jaꞌapí penaje. Rimá kaja rijló: “Palá pilaꞌaká nuká”, ke. Eyá unká ajñala nakaje nakiyana, Tupana jaꞌapí riphákaloje penaje, unká ajñala reꞌiyajé nakaje, rimá kaja kalé rijló: “Palá pilaꞌaká nuká”, ke.
7 Unká wajluwa penaje kalé weká marí ejaꞌawá chu; unká kaja wajluwa penaje kalé watakaꞌá.
8 Tupana leꞌejena weká, kajmuruna weꞌemaká marí ejaꞌawá chu ketana; rileꞌejena kaja weꞌemajika, watakaꞌajika ejomi.
9 Ilé ke weꞌemakáloje penaje Jesucristo takaꞌá iꞌimaká. Rejomi rimakápoꞌo piño iꞌimaká, riꞌimakáloje kaja takaꞌakaño, eyá kajmuruna joꞌó iꞌimakaño, kele wakáraꞌajeri.
10 ¡Eta piká! ¿Naje pimá pejena nakiyana nakú: “Unká paala nalaꞌaká”, ke? ¿Naje unká piphala naꞌapí? Piyukeja weká táraꞌajeño Tupana jimaje, rimakáloje wanaku meke laꞌajeñoka weꞌemaká.
11 Tupana kemari marí ke rinakuwá:
“Nakaje numakare nakú, iꞌimajeri numaká rinaku ke.
Piyukeja inaꞌukena táraꞌajeño nujimaje neꞌerúpachi aú;
piyukeja kaja iphájeño noꞌopí”, ke rimaká.
12 Piyukeja weká, pajluwano ke, kemájeño Tupánajlo nakaje walaꞌakare nakú, marí ejaꞌawá chu weꞌemaká ketana.
13 Ilé ke riꞌimajíkale, wapuraꞌaniño puꞌuwaré panakuwáaka. Palani weꞌejnataka wapéchuwa palá nakaje laꞌakana nakú, walaꞌaká piyá ajopana Jesucristo jaꞌapiyá jemaꞌajeño chapú. Apala wapachá kaꞌajná napechu yurijla kaphí Tupana chojé iꞌimakana.
14 Jesucristo waꞌateje nuꞌumakale, nuweꞌepí unká iná laꞌalá puꞌuwaré keꞌiyapejé aꞌajnejí ajñakana aú. Apala iná pechu aꞌajnejí nakiyana nakú: “Puꞌuwaré nulaꞌajika, nojñájika ee riká”, ke. Raú ajñájeri riká, laꞌajeri puꞌuwaré.
15 Apala aꞌajnejí, pajñákare jimaje kaꞌajná, unká paala apú Jesucristo jaꞌapiyá jemaꞌajeri pechu iꞌimaká pinaku. Ilé ke pilaꞌaká aú, unká piwátala riká íkiꞌija. Apala nakaje pajñákare pachá, unká ripechu iꞌimalá kaphí Tupana chojé. Richaya waꞌató Jesucristo takaꞌarí iꞌimaká.
16 Piweꞌepí unká pilaꞌalá puꞌuwaré nakaje ajñakana aú. Eꞌiyonaja apala neꞌiyajénajlo unká ñaké kalé riká, raú napuraꞌó pinaku puꞌuwaré. Pilaꞌaniña ilé ke, napuraꞌakó piyá pinaku puꞌuwaré.
17 Wawakáraꞌajeri Tupana unká aꞌalá rinakojó aꞌajnejí, iꞌirakaje, kaje. Riwata weꞌemaká unká japi laꞌalaño puꞌuwaré ke rijló; riwata kaja weꞌemaká palá pajwaꞌatéchaka; riwata kaja wapechu iꞌimaká puꞌují Ripechu jaꞌapiyá iꞌimakana aú.
18 Ilé ke iꞌimakaño laꞌañó Tupana wátaka ke. Ilé ke laꞌakana palani Jesucrístojlo, palani kaja inaꞌukejlo.
19 Ñakele walaꞌachí nakaje palá, weꞌemakáloje palá pajwaꞌatéchaka, waꞌakáloje kaja pañathéchaka palá.
20 Papichátaniña nakaje palá Tupana laꞌakare pichaya iꞌimaká, aꞌajnejí pajñákare aú. Piyukeja aꞌajnejí, ajñakaje penaje riká. Eꞌiyonaja unká paala iná laꞌaká, iná ajñákachu nakaje, jimaje kaꞌajná apú pechu yurijla kaphí Tupana chojé iꞌimakana.
21 Ñakele wajñániña riꞌimi; weꞌeraniña kaja kawí kaje; walaꞌaniña nakaje, jimaje apala wejena nakiyana kaꞌajná pechu yurijla kaphí Tupana chojé iꞌimakana raú.
22 Piweꞌepí unká pilaꞌalá puꞌuwaré nakaje pajñákare aú. Tupana weꞌepiri mékeka pipechu rinaku. Pilaꞌakachu nakaje riwátaka ke, piweꞌepí kaja palani pijló riꞌimajika, raú unká pipechu kawílaꞌalajo rinaku. Puꞌují pipechu iꞌimajika raú.
23 Eyá unkachu piweꞌepila palá aꞌajnejí pajñákare nakojé: palani kaꞌajná Tupánajlo riká, unká kaꞌajná. Rajñakana aú pilaꞌá puꞌuwaré, pajñákale riká unká piweꞌepila palá rinakojé eꞌiyonaja. Ilé ke pilaꞌaká aú, pilaꞌá puꞌuwaré.