Iná laꞌakáloje palá ajopana inaꞌukénajlo penaje yukuna marí
15
Weká, júpimi pechu iꞌimakaño kaphí Tupana chojé, aꞌajeño wanakojó wajé wani keñoꞌokaño napéchuwa laꞌakana kaphí richojé. Ñakele walaꞌaniña nakaje wajlúwaja, riꞌimakáloje palá wajloja kalé penaje.
2 Walaꞌachí nakaje, riꞌimakáloje palá ajopana nakú. Waꞌachí pañathéchaka, wapechu iꞌimakáloje richaje, richaje ke kaphí Tupana chojé.
3 Unká Jesucristo laꞌalá rijlúwaja nakaje iꞌimaká. Tupana purákaꞌalo kemaká rinaku, ke riꞌimaká rijló. Rimá Tupánajlo: “Piyukeja inaꞌukena akhaꞌakare pimaná, jaꞌaró nunakojé”, ke.
4 Tupana purákaꞌalo, nalanaꞌakare júpimi iꞌimaká, nalanaꞌá, nalaꞌakáloje wenakú raú penaje. Rinakojé weꞌepíkana aú, unká wapechu laꞌalajo ujwí Tupana liyá, raú kaphí wapechu iꞌimajika richojé.
5 Tupana palamane weꞌemá nakaje iꞌimajíkare wátakana nakú. Eko ripalaꞌatá ipechu, chapú kaje yajwé amákare liyá; eko raꞌá kaja iñathé, iꞌimakáloje palá pajwaꞌatéchaka Jesucristo palamane aú.
6 Raú iká piyukeja puraꞌajeño palá, pajñakani, Jesucristo jaraꞌapá Tupana nakú.
7 Ipechu iꞌimá palá panakuwáaka, Jesucristo pechu iꞌimaká palá wanaku ke kaja.
8 Jesucristo iphari majó iꞌimaká, rilaꞌakáloje judíonajlo nakaje, rimakare nakú waꞌajútaya michúnajlo iꞌimaká ke. Raú waweꞌepí Tupana laꞌakano nakaje rimaká rinaku ke.
9 Riphá kaja majó iꞌimaká, unká judíona kalé iꞌimakaño puraꞌakóloje kaja palá Tupana nakú, riweꞌepíkale namuꞌují. Tupana purákaꞌalo lanaꞌakéjami kemari rinaku iꞌimaká:
“Raú nupuraꞌajó palá pinaku piyukeja eꞌiyowá.
Notaneje kaja pijló piyale, puꞌují nupechu iꞌimakale pinaku”, ke rimaká.
10 Re kaja Ripurákaꞌalo nakiyana kemari: “Ipechu iꞌimá puꞌují, piyukeja inaꞌukena, Tupana leꞌejena inaꞌukena waꞌaté”.
11 Eyá rimá kaja:
“Piyukeja inaꞌukena, piyukeja wani,
puraꞌajeño palá Tupana nakú”.
12 Isaías lanaꞌarí kaja marí ke iꞌimaká:
“Jesé lakénami nakiyana, pajluwa jáchoꞌojero,
riwakáraꞌakaloje piyukeja inaꞌukena penaje.
Kaphí kaja napechu iꞌimajika richojé”, ke rimaká.
13 Nuwata Tupana, laꞌarí kaphí wapechu, laꞌaká puꞌují ipechu, ikawílaꞌako piyá nakaje nakú raꞌapiyá jemaꞌakana aú. Nuwata Ripechu laꞌaká kaphí wani ipechu, raú richaje, richaje ke ipechu iꞌimakáloje kaphí nakaje palá rilaꞌajíkare ijló wátakana nakú.
14 Nojena, nuweꞌepí iweꞌepika ajopana inaꞌukena muꞌují. Iweꞌepí kaja palá laꞌakaná nakojé, ñakele iweꞌepí kaja penakúchaka laꞌakana.
15 Marí nulanaꞌakare chu ijló, numá keꞌiyapejé nakaje yukuna nakú, ipechu kapicháñaaka piyá riká. Unká nowó laꞌaló riyukuna iꞌimakana ijló jaꞌapejé, Tupana palamane aú nulanaꞌakale riká riwakáraꞌaka ke.
16 Jesucristo waꞌaté jápajeri nuká, ñakele noꞌó unká judíona kalé iꞌimakaño ñathé. Tupana yukuna iꞌimajeri nuká, ñakele nuꞌumá riꞌimataka inaꞌuké kapichákajo liyá yukuna najló, Ripechu palamane aú, neꞌemakáloje Tupana leꞌejena inaꞌukena.
17 Jesucristo chuwá nuꞌumakale, puꞌují nupechu, raú palá nulaꞌaká nujápakaꞌala Tupánajlo.
18 Kaphí nupechu ke nupuraꞌakó nakaje nakú, Jesucristo aꞌakale nuñathé nuꞌumakáloje riyukuna palá unká judíona kalé iꞌimakáñojlo, nemaꞌakáloje Tupana jaꞌapiyá penaje. Nakaje numakare nakú aú, nakaje nulaꞌakare aú waꞌaté, neꞌiyajena jemaꞌañó raꞌapiyá.
19 Nulaꞌano kaja Ripechu aú neꞌiyowá nakaje Tupánaja kalé weꞌepíkare laꞌakana. Ilé ke riꞌimakale nojló, nulaꞌá palá nujápakaꞌala riyukuna iꞌimakana aú ajopana, ajopana ke, rewá iꞌimakáñojlo. Jerusalén ewá nuꞌumá riyukuna najló, ñaké kaja nuꞌumaká riyukuna Iliria eyájenajlo.
20 Nuwata Jesucristo yukuna iꞌimakana, unká joꞌó wani jemaꞌalaño riyukúnajlo ewá, unkale nuwátala riyukuna iꞌimakana piño kaja jemaꞌakaño riyukuna penájeminajlo.
21 Raú nulaꞌajé Tupana purákaꞌalo lanaꞌakéjami kemaká ke:
“Unká joꞌó wani jemaꞌalaño riyukuna, jemaꞌajeño riyukuna,
raú naweꞌepeje unká wani nemaꞌalare yukuna iꞌimaká nakojé”.
Pablo wátaka Roma ejo iꞌijnakana yukuna marí
22 Ilé ke jápakaje iꞌimakale nojló, unká meke laꞌajé nuꞌujnalá amaje. Pulapé nuwátakajla ichaje iꞌijnakana.
23 Chuwa, kaja nuñapata nujápakaꞌala laꞌakana maárowa. Júpicha wani nupechu ichaje iꞌijnakana nakú,
24 raú España teꞌeré ejo nuꞌujnajika wakajé, nuyurejo nunakuwá ijwaꞌaté meketánaja, rejomi kalé nuwata aꞌaká nuñathé, noꞌopákaloje piño ilé eyá, ají ke nuwátaka ejo iꞌijnakana.
25 Paineko nuꞌujnataje liñeru nawakátakare nojena Jerusalén e iꞌimakáñojlo.
26 Jesucristo jaꞌapiyá jemaꞌajeño Macedonia e iꞌimakaño, eyá Acaya e iꞌimakaño, wátaño liñeru awakátakana, nawakáraꞌakaloje riká kamuꞌují laꞌakaño Jerusalén ewá iꞌimakáñojlo.
27 Napechu nakú riꞌimaká ke nawakáraꞌaka najló liñeru. Unká na kalé wakáraꞌa nalaꞌakáloje ñaké penaje. Judíona, kaphí péchuruna Tupana chojé, laꞌañó palá unká judíona kalé iꞌimakaño nakú, neꞌemakale najló Tupana yukuna, raú ke kaja nalaꞌaká nanaku palá.
28 Ilé liñeru nuꞌujnataje najló paineko, rejomi nuꞌujnajé España teꞌeré ejo. Rejo iꞌijnakana wakajé nomaje iká.
29 Nuweꞌepí palá wani Tupana laꞌajika weká Jesucristo palamane, ilé ñoꞌojó nuphájika ichaje wakajé.
30 Nojena, wawakáraꞌajeri Jesucristo chuwá iꞌimakaño weká. Tupana Pechu laꞌarí wapechu palá, wawátakaloje íkiꞌija pekowáaka. Ñakele numá ijló, ipuraꞌakóloje Tupana waꞌaté nuchaya penaje.
31 Imá Tupánajlo, rimejñátakaloje nuká, unká jemaꞌalaño Tupana jaꞌapiyá, Judea teꞌeré e iꞌimakaño liyá. Eyá liñeru, nujñaꞌatákare nojena Jerusalén e iꞌimakáñojlo, iphákaloje palá nanaku, puꞌují napechu iꞌimakáloje raú.
32 Ñakele Tupana wátajika ee, nuwata inaku iphákana palá, puꞌují nupechu ke, rejéchami nuwatánaꞌakaloje.
33 Eko Tupana, laꞌarí iná pechu palá, iꞌimá ijwaꞌaté piyukeja. Ñaké riꞌimajika.