Kaja penaje Pablo kemakare nakú najló marí
16
Numá kaja ijló, ipechu iꞌimakáloje palá weꞌeweló Febe nakú. Tupana jaꞌapiyá jemaꞌajeyo ruká, kajrú roꞌoká Jesucristo jaꞌapiyá jemaꞌajeño, Cencreas e iꞌimakaño, ñathé.
2 Ilaꞌá palá runaku, Tupana jaꞌapiyá jemaꞌajeyo ruꞌumakale. Jesucristo jaꞌapiyá jemaꞌajeño laꞌañó pekowáaka palá, ñakele aꞌá ruñathé nakaje ruwátajikare aú. Kajrú wani roꞌoká ajopana ñathé, nuñathé waꞌató iꞌimaká.
3 Eko palá nujwákeꞌena Priscila, Áquila waꞌatejlo. Pajñakani wajápaka Jesucristo yukuna iꞌimakana nakú.
4 Neká yuríñojla ajopana noka neꞌemaká nuchaya, nalaꞌaká piyá nuká chapú, raú numá nanaku: “Palá nalaꞌaká nuká”, ke. Unká nanákuja kalé numá ñaké, numá kaja piyukeja unká judíona kalé iꞌimakaño, jemaꞌañó Jesucristo jaꞌapiyá nakú ñaké.
5 Eko palá kaja piyukeja Jesucristo jaꞌapiyá jemaꞌajeño awakaño Priscila, Áquila waꞌaté, ñakaré chojejlo. Eko palá kaja nujwákeꞌewe Epénetojlo. Asia teꞌeré e nuꞌumaké wakajé, riká keñoꞌorí wani paineko, ajopana piyá, Jesucristo jaꞌapiyá jemaꞌakana iꞌimaká.
6 Eko palá kaja Maríajlo. Kajrú wani rujápaka ijwaꞌaté.
7 Eko palá kaja nutelona Andrónico, eyá Junia, kélejlo. Nujwákeꞌena neꞌemaká, inaꞌuké wajákelana chu nuꞌumaké wakajé. Palá kaja Jesucristo wakáraꞌakarena nakiyana pechu iꞌimaká nanaku; nupiyá kaja napechu iꞌimá kaphí Jesucristo chojé, riꞌimakáloje neꞌematájeri penaje.
8 Eko palá Ampliátojlo kaꞌajnó. Nujwákeꞌewe wani riká, Jesucristo jaꞌapiyá jemaꞌajeri kaja riká.
9 Eko palá kaja Urbánojlo. Wajwákeꞌewe riká, pajñakani walaꞌakale wajápakaꞌala rijwaꞌaté Jesucrístojlo. Eko palá kaja Estáquisjlo, kajrú kaja nuwátakare riká.
10 Eko palá kaja kaꞌajnó Apélesjlo. Palá rilaꞌakare aú, iná weꞌepí kaphí Jesucristo chojé ripechu. Eko palá kaja Aristóbulojlo, riyajalo, riyani, kélejlo.
11 Eko palá nuteló Herodiónjlo; eko palá kaja Narcísojlo, rejénajlo waꞌaté, Jesucristo jaꞌapiyá jemaꞌajeño kaja neká.
12 Eko palá kaja Trifena, eyá Trifosa, kélejlo kaꞌajnó, neká jápaño kaja Tupánajlo. Eko palá kaja noꞌoweló Pérsidejlo, ruká jápayo kajrú wani Tupánajlo nakaje laꞌakana nakú.
13 Eko palá Rúfojlo, piyukeja weꞌepíkare riká, palá wani remaꞌakale Jesucristo jaꞌapiyá. Eko palá kaja ralojlo. Noló ke kaja ruká nojló, palájneꞌekeru wani ruꞌumakale.
14 Eko palá kaja Asíncrito, eyá Flegente, Hermes, Patrobas, Hermas, kélejlo kaꞌajnó. Eko palá kaja wejena najwaꞌaté iꞌimakáñojlo.
15 Eko palá kaja Filólogojlo, ñaké kaja Júliajlo. Eyá Neréojlo ñaké kaja, reꞌeweló waꞌaté, eyá Olímpasjlo apú. Eko palá kaja Jesucristo jaꞌapiyá jemaꞌajeño najwaꞌaté iꞌimakáñojlo.
16 Ajalaka palá pekowáaka. Piyukeja Tupana jaꞌapiyá jemaꞌajeño maárowa iꞌimakaño kemaño kaja inaku: “Eko palá najló kaꞌajnó”, ke.
17 Nojena, nuwata aꞌaká inakojó mékajena pachaka unká iꞌimalá palá pajwaꞌatécha. Kaja newíñaꞌata nakaje apoꞌojó wani, iweꞌepíkare nakojé liyá, iꞌimá juká naliyá.
18 Apoꞌojó nalaꞌaká napechu keja, nakaje wawakáraꞌajeri Jesucristo wátakare liyá. Palá napurákaꞌalo jemaꞌakó unká weꞌepílaño kajrú nakaje nakojejlo, napajlákaloje najwaꞌaté penaje.
19 Piyukeja weꞌepiño palá wani jemaꞌaká Jesucristo jaꞌapiyá. Nuwata iꞌimaká kapechúruna wani, ilaꞌakáloje palá penaje, ilaꞌaká piyá puꞌuwaré.
20 Yewíchaja Tupana, palá laꞌaká iná pechu, cháꞌataka wajló Jiñá Chiꞌinárikana, rilaꞌaká piyá rijápakaꞌala weꞌiyowá. Eko Jesucristo laꞌá iká palá wani.
21 “Eko palá najló”, ke Timoteo kemaká. Nujwákeꞌewe riká, rijwaꞌaté walaꞌá pajñakani wajápakaꞌala. “Eko palá kaja najló”, ke nutelona Lucio, eyá Jasón, Sosípatro, kele kemaká inaku.
22 Eyá nuká Tercio lanaꞌarí marí papera kaje Pablo jaꞌapiyá, kemari kaja inaku: “Eko palá najló kaꞌajnó”, ke. Jesucristo jaꞌapiyá jemaꞌajeri kaja nuká.
23 Ñaké kaja Gayo kemaká inaku: “Eko palá najló kaꞌajnó”, ke. Rijwaꞌaté nuká maare riñakaré chu, wawakó kaja richojeno pajwaꞌatéchaka. Erasto kemari kaja inaku: “Eko palá najló kaꞌajnó”, ke. Pajimila eyájena liñérute lamáꞌatajeri riká. Ñaké kaja reꞌewé Cuarto kemaká inaku: “Eko palá najló kaꞌajnó”, ke.
24 Eko wawakáraꞌajeri Jesucristo laꞌá piyuke iká palá. Ñaké riꞌimajika.
Palá ripuraꞌakó Tupana nakú yukuna marí
25 Wapuraꞌachó palá Tupana nakú, rikaja kalé laꞌarijla iká palá, ilaꞌakáloje Ripurákaꞌalo, nuꞌumakare ijló yukuna, kemaká ke. Jesucristo yukuna nuꞌumá ijló. Tupana laꞌarí puꞌuwaká nakaje ripechu nakú iꞌimakare. Júpimi iꞌimaká, unká ñaké kalé riꞌimaká puꞌuwaká inaꞌukejlo.
26 Meꞌetení puꞌuwaká wajló riká, Tupana purákaꞌalo jaꞌapátajeño michuna lanaꞌakale riyukuna wajló iꞌimaká, riká ñakeja wani iꞌimakare pechu nakú riꞌimaká ke. Nakaje, meꞌechú iꞌimakare iꞌimaká, yukuna Tupana wakáraꞌari weꞌemaká piyuke ajopánajlo, ajopánajlo ke, napechu iꞌimakáloje kaphí richojé, eyá nemaꞌakáloje wani raꞌapiyá penaje.
27 ¡Tupana, rikaja kalé pajluwaja, kapechuni wani, ñakele rinákuja kalé puraꞌakano palá ñakeja wani Jesucristo palamane aú! Ñaké riꞌimajika.