Meꞌechuje purákaꞌaloji chu puraꞌakano Tupana Pechu aú yukuna marí
14
Tupana Pechu palamane aú iná wata íkiꞌija ajopana inaꞌukena. Iweꞌepí itukumó Tupana liyaje weꞌepíkaje wátakana ijluwa. Palani weꞌepíkaje raꞌá inajlo, ripalamane aú iná jaꞌapata palá ajopánajlo Tupana purákaꞌalo raꞌapiyá ke.
2 Puraꞌaró meꞌechuje purákaꞌaloji chu, kemari Tupánajlo nakaje nakú. Rijloja kalé rimá, unká rimalá rinaku ajopana inaꞌukénajlo, unkale naweꞌepila meke kemakánaka riká. Ripechu aú Tupánajloja kalé rimá riká, ajopánajlo michoꞌojneji riꞌimakale.
3 Eyá jaꞌapátari Tupana purákaꞌalo ajopánajlo, jaꞌapátari riká raꞌapiyá, raú naweꞌepíkaloje richaje, richaje ke nakaje Tupana wátakare nalaꞌaká nakojé. Ripurákaꞌalo laꞌarí kaja napechu kaphí, nalaꞌakó piyá ujwí; ripalaꞌatá kaja napechu chapú kaje chiyá.
4 Puraꞌaró meꞌechuje purákaꞌaloji chu, laꞌarí ripéchuwaja kalé kaphí ripurákaꞌalo aú. Eyá jaꞌapátari Tupana purákaꞌalo Jesucristo jaꞌapiyá jemaꞌajéñojlo, laꞌarí napechu kaphí remaꞌakana aú.
5 Nuwátajla piyukeja iká puraꞌakó meꞌechuje purákaꞌaloji chu, eꞌiyonaja richaje nuwátaka iweꞌepika Tupana purákaꞌalo jaꞌapátakana raꞌapiyá, palani remaꞌajéñojlo riꞌimakale. Kaja unká méñoꞌojo iná weꞌepila meke meꞌechuje purákaꞌaloji chu puraꞌajero kemaká. Ripurákaꞌalo jaꞌapátajeri iꞌimakachu, palani kaja riká remaꞌajéñojlo, naweꞌepíkaloje richaje, richaje ke, Tupana nakojé raú.
6 Nojena, nuꞌujnakela ichaje ee kaꞌajná, apala nupuraꞌojla ijwaꞌaté meꞌechuje purákaꞌaloji chu, unká na penaje kalé ijló riꞌimakajla. Eyá numakela kaꞌajná ijló nakaje nakú ipuraꞌakó chu, Tupana kemakare nakú nojló, nowíñaꞌatajla iká Ripurákaꞌalo nakú, noꞌopátajla kaja ijló Tupana purákaꞌalo raꞌapiyá. Kaji purákaꞌaloji iꞌimárijla palani ijló.
7 Unkachu kewirí mejé iꞌimalá palanakiya, palanakiya ke, unká iná weꞌepílajla na yáleka naphoꞌó. Unkachu guitarra mejé iꞌimalá palanakiya, palanakiya ke, unká kaja iná weꞌepílajla na jataníkajeka nawaraꞌá.
8 Suráana wakáraꞌajeri kaꞌajná wakáraꞌa rileꞌejena suráana, ajopana waꞌaté nókajo. Namaka napinana waíchaka aú, naphoꞌó luwiluwí kaje chojé. Rejéchami naꞌakó nalekare jaꞌapejé, nenókakoloje najwaꞌaté penaje. Eyá apoꞌojó nemaꞌakela rimejé, unká naꞌalajla nanakojó nalekare.
9 Ñaké kaja ijló riká: iná puraꞌakochu meꞌechuje purákaꞌaloji chu, unká ajopana weꞌepila meke kemakánaka riká, ñakele unká na penaje riꞌimalajla najló.
10 Re kajrú ajopana, keꞌiyapejena inaꞌukena, marí ejaꞌawá chu, puraꞌañó napuraꞌakó chu waja. Meꞌechuje waja riká ajopánajlo, richu puraꞌajéñoja kalé weꞌepiño mékeka nemaká.
11 Unkachu nomaꞌalá apú puraꞌakó, riweꞌepí ajopana nakiyana nuká. Ñaké kaja nupechu iꞌimakajla rinaku, unkale nomaꞌalá ripurákaꞌalo.
12 Ñakele palani iwátaka ijluwa weꞌepíkaje Tupana Pechu aꞌakare ijló, raú aꞌakáloje ajopana Jesucristo jaꞌapiyá jemaꞌajeño ñathé, naweꞌepíkaloje richaje, richaje ke, Tupana purákaꞌalo nakojé.
13 Marí ke palani meꞌechuje purákaꞌaloji chu puraꞌakano: Iná puraꞌajiko ee meꞌechuje purákaꞌaloji chu, iná kejaꞌa Tupana liyá inajluwa weꞌepíkaje, iná jaꞌapátakaloje palá riyukuna ajopánajlo.
14 Nupuraꞌajiko ee Tupana waꞌaté meꞌechuje purákaꞌaloji chu, nupechu nakuwaja kalé nupuraꞌó rijwaꞌaté, eꞌiyonaja unká nuweꞌepila meke kemakánaka riká.
15 ¿Meke chi nulaꞌakajla? Tupana Pechu jaꞌapiyá ke nupuraꞌajiko rijwaꞌaté. Nupuraꞌajó kaja rijwaꞌaté purákaꞌaloji ajopana jemaꞌakare chu; notaneje kaja rijló riyale, Ripechu jaꞌapiyá ke. Nuwata kaja ajopana weꞌepika meke kemakánaka riká.
16 Apala pipuraꞌó kaꞌajná Tupana waꞌaté meꞌechuje purákaꞌaloji chu. Palá rilaꞌakare piká yukuna kaꞌajná piꞌimá rijló richu. Apú kaꞌajná jemaꞌarí pipuraꞌakó rijwaꞌaté meꞌechuje purákaꞌaloji chu, unká weꞌepílajla meke kemakánaka riká, raú unká méñoꞌojo raꞌajipalá pijló rinakojé.
17 Apala palá kaꞌajná piꞌimaká Tupánajlo palá rilaꞌakare piká yukuna, eꞌiyonaja unká raꞌalá apú ñathé, riweꞌepíkaloje richaje, richaje ke, Tupana nakojé raú.
18 Kajrú nupuraꞌakó Tupana waꞌaté meꞌechuje purákaꞌaloji chu. Inakiyana puraꞌakó richu, chaje íkiꞌika nupuraꞌakó Tupana waꞌaté richu. Ñakele numá rijló: “Palá pilaꞌaká nuká raú”, ke.
19 Eꞌiyonaja ajopana Jesucristo jaꞌapiyá jemaꞌajeño waꞌaté nowakákochu, unká nuꞌumalá yuku najló meꞌechuje purákaꞌaloji chu. Nuꞌumakela waphereni yuku najló richu kaꞌajná, unká na penaje riꞌimalajla najló, unkale nemaꞌalajla riyukuna. Eyá nuꞌumakela najló yuku metajlani kaꞌajná napuraꞌakó chu, naweꞌepijla palá rinakojé.
20 Nojena, iꞌijnatániña ipéchuwa, yuwaná iꞌijnataka napéchuwa ke; iꞌijnatá palá ipéchuwa, pheñawilana iꞌijnataka napéchuwa ke. Unká yuwaná, kapajareruna ñani iꞌimakaño, iꞌijnatala napéchuwa puꞌuwaré laꞌakaná nakú. Iꞌimá ñaké kaja.
21 Tupana purákaꞌalo lanaꞌakéjami kemari: “Ajopana teꞌeré eyájena jaꞌapátajejla nupurákaꞌalo napuraꞌakochu marí teꞌerí nakú iꞌimakáñojlo, eꞌiyonaja unká naꞌalaje nanakojé riká”, ke Tupana kemaká nanaku.
22 Meꞌechuje purákaꞌaloji jemaꞌakana, unká aꞌalajla unká jemaꞌalaño Jesucristo jaꞌapiyá ñathé, unkale naweꞌepila meke kemakánaka riká. Tupana purákaꞌalo jaꞌapátakana raꞌapiyá jemaꞌajéñojlo aꞌajla nañathé, napechu iꞌimakáloje kaphí richojé.
23 Pajluwa kaꞌajná iphari ijwaꞌaté awakajo, unká Tupana jaꞌapiyá jemaꞌajeri kalé riká. Remaꞌaká aú kaꞌajná ipuraꞌakó meꞌechuje purákaꞌaloji chu, ripechu iꞌimajla inaku: “Jewíñamina kaꞌajná neká”, ke.
24 Eyá jaꞌapátakela Tupana purákaꞌalo raꞌapiyá ke, unká ripechu iꞌimalajla ñaké inaku, rejéchami kaja puꞌuwaré rilaꞌakare aꞌakojla rijló puꞌuwaká raú. Raú riꞌijnatajla ripéchuwa rinakuwá: “¿Naje marí ke wani nuká?”, ke.
25 Nakaje ripechu nakuja iꞌimakare jaꞌojla rijló puꞌuwaká, Tupana purákaꞌalo jemaꞌakana aú. Marí kaje aú ritáraꞌojla kaꞌajná riꞌirúpachi aú, rimakáloje Tupánajlo palá rilaꞌakare rijló yukuna.
Neꞌemakáloje palá nawakákaꞌalo ñakarelana chu penaje yukuna marí
26 Ñakele nojena, awakájiko wakajé, ilaꞌajé marí ke: Inakiyana kaꞌajná atanéjeño Tupánajlo palá rilaꞌakare iká yálena. Eyá ajopana kaꞌajná jewíñaꞌatajeño iká palá laꞌakaná nakojé. Eyá ajopana kaꞌajná iꞌimajeño ijló wajé nakaje Tupana kemakare najló nakú. Ajopana kaꞌajná puraꞌajeño meꞌechuje purákaꞌaloji chu, eyá ajopana jaꞌapátajeño nakaje nemájikare nakú ijló richu. Ilé ke laꞌakana palani ijló, ilaꞌakáloje richaje, richaje ke, Tupana wátaka ke.
27 Awakako wakajé, nuwata ilaꞌaká marí ke: Inakiyana kaꞌajná puraꞌajeño meꞌechuje purákaꞌaloji chu. Iyamá kaꞌajná, weji kele kaꞌajná, keleja puraꞌajeño richu pajewémichaka, eyá apú jaꞌapátaje inaꞌukénajlo napurákaꞌalo.
28 Unkájika ee na jaꞌapata najló napurákaꞌalo, napuraꞌaniño nakaje meꞌechuje purákaꞌaloji chu. Nekámika keja nupuraꞌajiko kachuwa richu napechu nakuwaja Tupana waꞌaté.
29 Ñaké kaja numaká jaꞌapátaño Tupana purákaꞌalo raꞌapiyá ke nakú. Palani kaja iyamá, weji kele kaꞌajná puraꞌajiko pajewémichaka, pajewémichaka ke. Eyá ajopana kemájeño napurákaꞌalo nakú na liyájeka riká: Tupana Pechu kemakare rijló kaꞌajná riká, unká kaꞌajná.
30 Awakákajo nakú iꞌimajika ee kaꞌajná, pajluwaja yáꞌajo awaꞌá. Remaꞌajé kaꞌajná apú iꞌimaká yuku ijló, eꞌiyowá ke kaꞌajná Tupana Pechu kemájika rijló nakaje nakú, rimakáloje ijló rinaku penaje. Ilé ke riꞌimajika ee, iꞌimari yuku ijló, tajátajeri riyukuna, apú puraꞌakóloje rejomi penaje.
31 Ilé ke piyukeja neká, apú, apú ke, kemájika mékeka Tupana Pechu kemakare nakú ijló nakú. Pajewémichaka ke neꞌemajika ijló riyukuna. Ilé ke laꞌakana aú, piyukeja jemaꞌajika nakaje yukuna palá, raú ipechu iꞌimajé kaphí Tupana purákaꞌalo jemaꞌakana aú.
32 Tupana purákaꞌalo jaꞌapátajeri puraꞌajero meketánaja, ajopana puraꞌakóloje rijewemi penaje.
33 Ilé ke nalaꞌajika, Tupana laꞌakale inaꞌuké pechu palá. Unká rikechíraꞌala napechu.
34 Marí ke Jesucristo jaꞌapiyá jemaꞌajeño laꞌajika ñaké waja nawakako wakajé: Unká nayurílaje inaana kemaká nakaje nakú Jesucristo jaꞌapiyá jemaꞌajénajlo. Tupana purákaꞌalo lanaꞌakéjami kemaká nanaku, ke nalaꞌajika riwakajé.
35 Nawátajika ee nakaje yukuna kejáꞌakana naluna liyá, nakejáꞌaje riyukuna, nephájikaja nañakaré chojé ee. Unká paala inaana puraꞌakó awakákaꞌalo eꞌiyá.
36 Iweꞌepí marí: Unká iká kalé keñoꞌoñó Tupana purákaꞌalo jaꞌapátakana ajopánajlo, ajopánajlo ke. Unká kaja ikaja kalé jemaꞌañó raꞌapiyá; ajopana, ajopana ke jemaꞌañó kaja raꞌapiyá.
37 Re kaꞌajná pajluwaja inakiyana pechu rinakuwá: “Tupana Pechu aꞌarí nojló weꞌepíkaje, noꞌopátakaloje ripurákaꞌalo raꞌapiyá ajopánajlo penaje”, ke. Iweꞌepeje kewaka riká, rimájika ee nunaku: “Tupana wakáraꞌari Pablo lanaꞌaká ijló piyuke ilé ke”.
38 Unkaja ke remaꞌá marí nulanaꞌakare jaꞌapiyá, unká kaja jemaꞌalaje rimakare nakú jaꞌapiyá.