Íkiꞌija ajopana wátakana yukuna marí
13
Apú eyá ke, nuweꞌepíkano ajopana, ajopana ke, puraꞌakó chu puraꞌakano. Apú eyá ke, nuweꞌepino kaja Tupana waꞌatéjena, jeꞌechú chiyájena, puraꞌakó chu puraꞌakano. Ilé ke nuweꞌepíkajla puraꞌakajo palá wani, eyá unkachu nuwátala íkiꞌija ajopana inaꞌukena, mapéjari keja nuꞌumakajla, kumu nakú nawaraꞌaká mejé jemaꞌakó keja.
2 Apala nuweꞌepí Tupana purákaꞌalo jaꞌapátakana raꞌapiyá ke; apala nuweꞌepí kaja piyuke nakaje, meꞌechuje ke iꞌimakare inaꞌukejlo nakojé weꞌepíkana; apala nuweꞌepí piyukeja nakaje nakojé. Kaphí kaꞌajná nupechu Tupana chojé, ratatákaloje nojló ipuré rapukuna chiyá penaje; apala nuweꞌepíkajla ilé kaje laꞌakana piyuke, eyá unkachu nuwátala íkiꞌija ajopana inaꞌukena, mapéjari keja nuꞌumakajla.
3 Apala noꞌó kaꞌajná piyuke nunane kamuꞌují laꞌakáñojlo; noꞌó kaja kaꞌajná nokó keraꞌathani chojé ajopana chaya, eyá unkachu nuwátala íkiꞌija ajopana inaꞌukena, unká na penaje ilé ke nulaꞌakare iꞌimalajla nojló.
4 Iná wátakachu íkiꞌija ajopana inaꞌukena, marí ke iná najwaꞌaté: Unká iná yúchaꞌalo nachá kiñaja, unkachu nalaꞌalá inajlo nakaje iná wátaka ke. Inaꞌuké wani iná najwaꞌaté. Unká kaja iná wo iꞌimalá chapú nachá, nacháꞌatakachu iná; unká kaja iná laꞌalá iná nakuwá ajopana cháꞌatajeri ke; unká kaja iná pechu iꞌimalá iná nakuwá: “Nuká weꞌepiri nachaje”, ke.
5 Iná wátakachu íkiꞌija ajopana inaꞌukena, unká iná laꞌalá nakaje mapechúwaka najwaꞌaté; unká kaja kanakújeꞌeke kalé iná najwaꞌaté; unká kaja imaꞌá péchuri kalé iná; unká kaja iná aꞌalá iná nakojó chapú nalaꞌakare iná, kiñaja iná kaꞌaká iná pechu nakiyó riká.
6 Iná wátakachu íkiꞌija ajopana inaꞌukena, unká iná laꞌalá puꞌují iná péchuwa, puꞌuwaré nalaꞌakare aú. Puꞌují iná pechu palá nalaꞌakare aú. Palani purákaꞌaloji chuwá riꞌimakale, puꞌují iná pechu najwaꞌaté.
7 Iná wátakachu íkiꞌija ajopana inaꞌukena, unká iná wátala nalaꞌaká neká unká inaꞌukélaruna ke najluwa. Iná wata inaꞌuké íkiꞌija, nalaꞌaká iná chapú eꞌiyonaja. Palá laꞌajeñó iná amá ajopana inaꞌukena, unká chiyó neꞌemá ñaké. Unká iná jáchoꞌolo íkiꞌija nawátakana chiyá.
8 Unká íkiꞌija pekowáaka wátakana tajnálajo. Akijñojo unká na jaꞌapátalaje Tupana purákaꞌalo raꞌapiyá ke; unká kaja na puraꞌalajo meꞌechuje purákaꞌaloji chu. Nakaje inaꞌuké weꞌepíkare nakojé meꞌetení, unká iꞌimalaje ñaké riwakajé.
9 Nakaje nakiyana nakojeja kalé waweꞌepí meꞌetení; Tupana purákaꞌalo nakiyana yukúnaja kalé weꞌemá inaꞌukejlo meꞌetení, waweꞌepíkale rinakiyánaja kalé nakojé.
10 Waweꞌepíjika wakajé piyukeja nakaje nakojé, unká rinakiyana nakojeja kalé waweꞌepeje reyá aꞌajná ñoꞌojó.
11 Yuwají nuꞌumaké wakajé, nupuraꞌajiko yuwají puraꞌakó ke kaja. Nuꞌujnatake nupéchuwa, yuwají iꞌijnataka ripéchuwa ke kaja. Kaja phíyuꞌuke nuꞌumaká wakajé, nuyurí nuyámojo piyukeja nujyuwako.
12 Ñaké kaja wajló nakaje meꞌetení. Ijama keja waweꞌepika Jesucristo purákaꞌalo nakojé. Iná amaka iná ñaká jupichumi kaná chojé, keja wajló riká. Jeꞌechú chu weꞌemajika wakajé, wamaje Jesucristo. Meꞌetení nuweꞌepí rinakiyánaja nakojé; jeꞌechú chu nuꞌumajika wakajé nuweꞌepeje piyukeja nakaje nakojé. Tupana weꞌepika nunakojé, ke kaja nuweꞌepíjika piyuke rinakojé.
13 Re weji kele nakaje Tupana liyá unká tajnálajo: kaphí Tupana chojé iꞌimakana; nakaje iꞌimajíkare wajló wátakana nakú; íkiꞌija wawátajika pekowáaka. Chaje wani Tupana wátaka wawátaka íkiꞌija riká, ajopana inaꞌukena waꞌaté.